Mupailo wa Mwami ncikozyanyo cambotukonzya kupaila alimwi azintu nzyotukonzya kupailila. Jesu wakapaila mupailo ooyu ciindi basikwiiya bakwe nobakamulomba kuti: “Mwami, kotuyiisya kupaila.” (Luka 11:1) Nokuba boobo, Mupailo wa Mwami, naa mupailo wakuti Taateesu, tauli mupailo ulikke Leza ngwamvwa. a Muciindi caboobo, Jesu wakali kutondezya kuti Mupailo wa Mwami ncikozyanyo camipailo Leza njaswiilila.

Mucibalo eeci tulalanga-langa makani aatobela:

•  Ino majwi nzi aali mu Mupailo wa Mwami?

•  Ino majwi aali mu Mupailo wa Mwami aamba nzi?

•  Sena kwiinduluka majwi aali mu Mupailo wa Mwami nenzila ilikke yakupaila?

•  Ino tweelede kupaila buti?

•  Mipailo iimbi yaambidwe mu Bbaibbele

 Mupailo wa Mwami uulembedwe ku Matayo 6:9-13, ulembedwe munzila ziindene-indene mubusanduluzi bwama Bbaibbele amwi. Amubone zikozyanyo zyobilo eezyi.

 Bbaibbele lya Busanduluzi Bwanyika Mpya: “Taateesu ooli kujulu, alisalazyigwe zina lyako. Abuboole Bwami bwako. Akucitwe kuyanda kwako ansi aano mbubonya mbuli kujulu. Kotupa sunu cakulya cesu cabuzuba obuno; alimwi kotulekelela zibi zyesu, mbubonya andiswe mbotubalekelela batubisyila. Alimwi utatunjizyi mumasunko, pele utuvwune kumubi.”

 The Bible in Tonga Lyamu 1963: “Taateesu ooli kujulu, alilemekwe izina lyako, abuze Bwami bwako, alucitwe luyando lwako, ansi ano mbubonya mbuli kujulu. Utupe sunu zilyo nzitubula, utulekelele milandu yesu, mbubonya mbuli mbutubalekelede aswe bali amilandu kulindiswe, utatweenzyi mukutepaulwa, utuvune kumubi.”

 Nzyaakali kuyiisya Jesu zileendelana ancaamba Magwalo aambi, aboobo tulakonzya kulangila kuti zibeela zimwi zyamu Bbaibbele zilakonzya kutugwasya kumvwisya ncowaamba Mupailo wa Mwami.

“Taateesu ooli kujulu”

 Cileelela kwaamba Leza kuti “Taateesu” mukuti nguwakatulenga alimwi wakatupa buumi.—Isaya 64:8.

“Alisalazyigwe zina lyako”

 Izina lya Leza lyakuti, Jehova, lyeelede kulemekwa alimwi akubonwa kuti lilasalala. Bantu balatola lubazu mukusalazya zina lya Leza kwiinda mukwaamba zyabube bwakwe alimwi akuzyibya bamwi makanze aakwe.—Intembauzyo 83:18; Isaya 6:3.

“Abuboole Bwami bwako”

 Bwami bwa Leza nimfwulumende yakujulu yalo yeendelezyegwa a Jesu kali Mwami. Alimwi Jesu wakatuyiisya kupailila mfwulumende eeyi kuti italike kweendelezya nyika yoonse.—Daniele 2:44; Ciyubunuzyo 11:15.

“Akucitwe kuyanda kwako ansi aano mbubonya mbuli kujulu”

 Mbubonya mbokutakwe bubi alimwi alufwu kujulu, makanze aa Leza kujatikizya nyika ngakuti bantu kabakkala lyoonse mane kukabe kutamani munyika muli luumuno akuliiba.—Intembauzyo 37:11, 29.

“Kotupa sunu cakulya cesu cabuzuba obuno”

 Tweelede kusyoma Mulengi wesu kuti nguutupa cakulya azintu nzyotuyandika kutegwa tuzumanane kupona.—Milimo 17:24, 25.

“Kotulekelela zibi zyesu, mbubonya andiswe mbotubalekelela batubisyila”

 Bantu boonse balabisya alimwi bayandika kulekelelwa. Pele ikuti katuyanda kulekelelwa a Leza, tweelede kulekelela bamwi ikuti batulubizyila.—Matayo 6:14, 15.

“Utatunjizyi mumasunko, pele utuvwune kumubi”

 Jehova Leza kunyina natusunka kucita cibi. (Jakobo 1:13) Pele tulasunkwa “amubi,” Saatani Diabolosi—alimwi iwiitwa kuti “Sikusunka.” (1 Johane 5:19; Matayo 4:1-4) Tulomba Jehova kuti atugwasye kuzumanana kumumvwida ciindi notusunkwa kucita zintu zibyaabi.

 Jesu wakapa Mupailo wa Mwami kuti kauli cikozyanyo. Taweelede kwiindulukwa bbala abbala. Katanapa Mupailo wa Mwami, Jesu wakacenjezya kuti: “Ciindi nomupaila, mutanikwaambi majwi ngoonya cakwiinduluka-induluka.” (Matayo 6:7) Ciindi naakapa mupailo wacikozyanyo aciindi cimwi, wakabelesya majwi aaindene.—Luka 11:2-4.

 Nzila mbotu yakupaila nkumwaambila Leza kuzwa ansi aamoyo zintu nzyotuyeeya alimwi ambotulimvwa.—Intembauzyo 62:8.

 Mupailo wa Mwami utupa cikozyanyo cibotu cambotukonzya kupaila munzila njaswiilila Leza. Amubone kweendelana kuliko atupango tumwi twamu Bbaibbele tujatikizya mupailo.

•   Amupaile buyo kuli Leza

   Lugwalo: “Muzintu zyoonse, kwiinda mumupailo akukombelezya antoomwe akulumba, amumuzyibye Leza nzyomulomba.”—Bafilipi 4:6.

   Bupanduluzi: Mipailo yesu yeelede kuunka kuli Leza, kutali kuli Jesu, Mariya naa kubasaante. Majwi aakusaanguna aakuti “Taateesu,” aali mu Mupailo wa Mwami atuyiisya kuti tweelede kupaila buyo kuli Jehova Leza.

•   Amupailile zintu zyeendelana akuyanda kwa Leza

   Lugwalo: “Kufwumbwa cintu ncotumulomba ceendelana akuyanda kwakwe, ulatumvwa.”—1 Johane 5:14.

   Bupanduluzi: Tulakonzya kupailila zintu zili zyoonse zyeendelana akuyanda kwa Leza. Jesu wakatuyiisya kuyanda kwa Leza mbokuyandika kwiinda mukubikkilizya majwi aakuti “akucitwe kuyanda kwako” mu Mupailo wa Mwami. Tulakonzya kuzyiba kuyanda kwa Leza kujatikizya nyika alimwi abantu kwiinda mukwiiya Bbaibbele.

•   Amupailile zintu zimulibilisya

   Lugwalo: “Kowaala mukuli wako uuminya mumaanza aa Jehova, eelyo walo uyookulanganya.”—Intembauzyo 55:22.

   Bupanduluzi: Leza ulazibikkila maano zintu zitupa kulibilika. Mbubonya Jesu mbwaakabikkilizya zintu izyakali kumujatikizya mu Mupailo wa Mwami, andiswe tulakonzya kupailila zintu nzyotuyandika buzuba abuzuba, kulomba busolozi ciindi notuyanda kupanga zyakusala, kulomba lugwasyo ciindi notuli mumapenzi, alimwi akulomba kulekelelwa zibi zyesu. b