Buk Song 38:1-22
Devit i raitim dispela song bilong ol manmeri i ken tingim ol samting.
38 Jehova, yu no ken stretim mi long taim yu belhat,Na yu no ken stretim mi long taim yu belhat nogut tru.+
2 Ol spia bilong yu i sutim mi i go insait tru,Na han bilong yu i pusim mi i go daun.+
3 Yu kros nogut tru long mi olsem na mi sik.*
Mi mekim sin olsem na mi no stap bel isi.+
4 Ol rong bilong mi i daunim mi stret.+
Ol i olsem kago i hevi tru, na i hevi tumas long mi karim.
5 Ol sua bilong mi i gat planti susu na i sting tru.
Mi mekim pasin kranki tru, olsem na dispela i kamap long mi.
6 Mi bel hevi tru na mi pilim nogut tru;Long olgeta de mi wokabaut wantaim sore.
7 Mi gat sik;+Insait long bodi bilong mi i hat nogut tru olsem paia i kukim.
8 Mi no inap pilim wanpela samting na mi bagarap tru;Bel bilong mi i pilim nogut tru na dispela i mekim mi pilim pen na mi singaut.
9 Jehova, yu save long olgeta laik bilong mi,Bel bilong mi i krai na dispela i no hait long yu.
10 Lewa bilong mi i pam strong, na strong bilong mi i pinis,Ai bilong mi i tudak na mi no moa lukluk gut.+
11 Ol pren na ol wantok bilong mi i abrusim mi, long wanem, mi gat hevi,Na ol man mi save gut long ol, ol tu i no laik i kam klostu long mi.
12 Ol man i laik kilim mi i dai, ol i putim ol trap bilong trapim mi;Na ol man i laik bagarapim mi, ol i mekim tok bilong bagarapim mi;+Long olgeta de ol i save tok giaman.
13 Tasol mi olsem yaupas, na mi no laik harim wanpela tok;+Na mi olsem mauspas, na mi no opim maus.+
14 Mi kamap olsem man i no inap harim toktok,Em maus bilong em i no inap mekim wanpela tok bilong strongim sait bilong em.
15 Jehova, mi wet long yu tasol,+Na Jehova, God bilong mi, yu bin bekim tok long mi.+
16 Mi bin tok olsem: “Yu no ken larim ol i amamas long dispela samtingNa yu no ken larim ol i litimapim nem bilong ol yet sapos lek bilong mi i wel.”
17 Klostu mi laik pundaun,Na mi pilim pen oltaim.+
18 Sin bilong mi i mekim na mi tingting planti;+Na mi autim rong bilong mi.+
19 Ol birua bilong mi i strong tumas na ol i strongpela man,*Ol man i heitim mi nating, ol i kamap planti tru.
20 Mi mekim gutpela pasin long ol tasol ol i bekim pasin nogut long mi;Ol i birua long mi, long wanem, mi bihainim gutpela pasin.
21 Jehova, yu no ken lusim mi.
God, yu no ken i stap longwe long mi.+
22 Jehova, yu man bilong kisim bek mi,+Yu mas i kam hariap na helpim mi.
Ol Futnot
^ Hib., “bodi bilong mi i bagarap.”
^ O ating, “Tasol ol man i birua nating long mi, ol i planti.”
