Buk Song 62:1-12
Tok i go long dairekta. Jedutun.* Devit i raitim dispela song.
62 Bai mi stap isi na wetim God wanpela tasol.
Em tasol i save kisim bek mi.+
2 Tru tumas, em i olsem bikpela ston na man bilong kisim bek mi na em i strongpela ples hait bilong mi;+I no gat wanpela samting bai mekim mi pundaun.+
3 Hamas taim moa bai yupela i pait long wanpela man bilong kilim em i dai?+
Yupela olgeta i olsem banis i krungut, em ston banis i redi long pundaun.*
4 Ol i pasim tok wantaim bilong daunim em long bikpela namba* em i holim;Ol i amamas long mekim tok giaman.
Long maus ol i mekim tok long gutpela samting i ken painim em, tasol long bel bilong ol, ol i laik bai bagarap i mas painim em.+ (Selah)
5 Bai mi stap isi na wetim God wanpela tasol+Long wanem, mi bilip na wet long em tasol.+
6 Tru tumas, em i olsem bikpela ston na man bilong kisim bek mi na em i strongpela ples hait bilong mi;I no gat wanpela samting bai mekim mi pundaun.+
7 God wanpela tasol i save kisim bek mi na givim biknem long mi.
God i olsem strongpela ston na ples hait bilong mi.+
8 Yupela ol manmeri, oltaim yupela i mas trastim em.
Autim olgeta tingting i stap long bel bilong yupela long em.+
God em i ples hait bilong yumi.+ (Selah)
9 Ol man i samting nating olsem win i kamap long maus tasol,Yu no inap bilip long ol man.+
Na taim yu putim ol long skel na skelim wantaim win i kamap long maus, hevi bilong ol i liklik tru.+
10 Yupela i no ken bilip long pasin bilong giaman na strong long kisim ol samting bilong ol arapelaNa no ken bilip olsem pasin bilong stilim ol samting bai helpim yupela.
Sapos ol mani kago bilong yupela i kamap planti, no ken bilip long en.+
11 Tupela taim mi bin harim God i tok olsem,God i gat bikpela strong.+
12 Jehova, yu save soim gutpela pasin laikim,*+Na yu save bekim pe i stret long ol pasin olgeta man wan wan i mekim.+
Ol Futnot
^ O ating, “Yupela olgeta, i olsem em i wanpela banis yupela i pas long en, em wanpela banis ston klostu i laik pundaun.”
^ O, “biknem bilong em.”
