Jeremaia 24:1-10
-
Ol gutpela fik na ol fik nogut (1-10)
24 King Nebukatnesar* bilong Babilon i kisim Jekonia,*+ pikinini man bilong Jehoiakim,+ em king bilong Juda, na ol bikman bilong Juda, na ol saveman bilong wokim ol samting, na ol man bilong wokim ol samting long ain samting,* na bringim ol i go lusim Jerusalem na go kalabus long Babilon.+ Orait bihain long dispela, long wanpela visen Jehova i soim mi 2-pela basket fik i stap long tempel bilong Jehova.
2 Wanpela basket i gat ol gutpela fik, olsem ol namba 1 pikinini fik i mau long gaden. Tasol narapela basket i gat ol fik nogut, ol i nogut olgeta na man i no inap kaikai.
3 Na Jehova i askim mi olsem: “Jeremaia, yu lukim wanem samting?” Na mi tok: “Mi lukim ol pikinini fik; ol gutpela fik i gutpela tumas, tasol ol fik nogut i nogut tru na man i no inap kaikai.”+
4 Orait na Jehova i givim dispela tok long mi olsem:
5 “Mi Jehova, God bilong lain Israel, mi tok olsem, ‘Mi bin salim ol Juda i go kalabus long graun bilong ol Kaldia. Mi bai mekim gut long ol olsem ol dispela gutpela pikinini fik.
6 Mi bai putim ai long ol na bai gutpela samting i ken kamap long ol. Na mi bai mekim ol i kam bek long dispela kantri.+ Mi bai mekim ol i kamap strongpela lain na mi no ken daunim ol; mi bai planim ol na mi no ken kamautim ol.+
7 Na mi bai givim tingting long ol na bai ol i save olsem mi yet, mi Jehova.+ Na ol bai kamap ol manmeri bilong mi, na mi bai kamap God bilong ol,+ long wanem, long bel olgeta bilong ol, ol bai kam bek long mi.+
8 “‘Na olsem ol dispela fik nogut em man i no inap kaikai,+ Jehova i tok olsem: “Mi bai mekim wankain samting long King Sedekaia+ bilong Juda, ol bikman bilong em, na liklik hap lain bilong Jerusalem em ol i stap long dispela kantri, na tu, ol lain i stap long graun bilong Isip.+
9 Mi bai mekim ol manmeri bilong ol kantri long graun i pret nogut tru taim ol i lukim samting nogut mi mekim long ol.+ Ol manmeri bai tok nogut long ol; na taim ol manmeri i laik stori long bagarap i bin painim wanpela lain, ol bai yusim eksampel bilong ol. Na long olgeta hap we mi salim ol i go long en, ol manmeri bai tok bilas long ol na tok olsem bagarap i ken painim ol.+
10 Mi bai mekim ol birua i kam pait long ol,+ na mi bai salim bikpela hangre long ol, na bikpela sik long ol,+ i go inap ol i dai na pinis long dispela graun em mi bin givim long ol na long ol tumbuna papa bilong ol.”’”
Ol Futnot
^ Hib., “Nebukatresa,” em narapela wei bilong spelim dispela nem.
^ Narapela nem bilong em Jehoiakin na narapela Jekonia.
^ O ating, “ol man bilong wokim ol strongpela banis samting.”
