1, 2. Stori long raun bilong Maria, na eksplenim wai na em i hatwok long sindaun gut.

 MARIA i sindaun long donki, tasol em i hatwok long sindaun gut. Em i bin raun long rot inap planti aua pinis. Josep i wokabaut i go pas, na Maria i bihainim em long rot i go long Betlehem. Maria i pilim gen bebi i muv insait long bel bilong em.

² Maria i winim pinis planti mun; Baibel i tok “klostu nau Maria bai karim pikinini.” (Luk 2:5) Taim tupela i abrusim ol gaden i go, ating ol fama i wok long brukim graun o tromoi sid i apim het na lukluk long tupela na tingting planti long as na dispela meri, klostu em bai karim pikinini i raun olsem. Wai na Maria i lusim ples bilong em long Nasaret na mekim dispela raun?

3. Maria i bin kisim wanem wok? Yumi bai kisim wanem skul long em?

³ Ol dispela samting i kirap sampela mun paslain, taim dispela yangpela meri Juda i kisim wanpela wok i narapela kain long ol wok ol man i bin kisim. Em bai karim wanpela pikinini husat bai kamap Mesaia, Pikinini Bilong God! (Luk 1:35) Taim mun bilong karim pikinini i klostu, em taim tu bilong mekim dispela raun. Long dispela raun, planti samting i traim bilip bilong Maria. Orait yumi ken stori long samting i helpim em long stap strong long bilip.

4, 5. (a) Wai na Josep na Maria i go long Betlehem? (b) Lo Sisar i putim i truim wanem tok profet?

⁴ I no Josep na Maria tasol i mekim dispela raun, nogat. Nau tasol Sisar Ogastus i putim wanpela lo bilong rejistaim ol manmeri, na ol manmeri i mas i go long asples bilong ol na rejistaim nem. Josep i mekim wanem? Baibel i tok: “Na Josep tu i lusim taun Nasaret bilong Galili na i go antap long Judia long taun bilong Devit, em ol i kolim Betlehem. Em i go long dispela hap, long wanem, em i wanfamili na wanlain bilong Devit.”​—Luk 2:1-4.

⁵ Dispela lo Sisar i putim i no samting i bin kamap nating long dispela taim, nogat. Inap olsem 700 yia paslain, wanpela tok profet i bin tokaut olsem mama bai karim Mesaia long Betlehem. I gat  wanpela taun nem bilong en Betlehem i stap klostu long Nasaret, inap 11 kilomita tasol. Tasol tok profet i kolim stret “Betlehem Efrata” olsem ples em Mesaia i mas kamap long en. (Ritim Maika 5:2.) Long Nasaret na i go long dispela liklik taun em olsem 130 kilomita, na man i mas wokabaut long ol liklik maunten i go olsem long Samaria. Em dispela Betlehem tasol Josep i mas i go long en, bikos em asples bilong famili bilong King Devit—em famili bilong Josep na Maria wantaim.

6, 7. (a) Bilong wanem raun bilong ol i go long Betlehem i givim hatwok long Maria? (b) Maria i meri bilong Josep, na olsem wanem dispela i stiaim ol disisen em i mekim? (Lukim tu futnot.)

⁶ Yu ting Maria bai sapotim disisen bilong Josep long bihainim dispela lo? Dispela raun bai givim hatwok long em. Ating em kirap bilong Oktoba, so liklik ren inap pundaun na taim bilong san i wok long pinis. Na tu, dispela tok “lusim . . . Galili na i go antap” i stret, bikos Betlehem i stap long maunten i antap winim 760 mita—man i mas wokabaut inap sampela de bilong i go antap na rot i hatwok tru. Na ating bikpela haptaim i mas lus, long wanem, Maria i gat bel na em i mas malolo planti taim. Klostu long taim yangpela meri i laik karim pikinini, ating em bai laik long stap klostu long ples bilong em we ol famili na pren bai amamas long helpim em long taim em i pilim pen bilong karim pikinini. Olsem na bilong mekim kain raun, Maria i mas i gat strongpela bel.

⁷ Maski i hatwok, Luk i tok Josep i “go bilong rejistaim nem bilong em wantaim Maria.” Em i tok tu olsem Maria “i stap pinis  olsem meri bilong [Josep].” (Luk 2:4, 5) Maria i meri bilong Josep na dispela i stiaim ol disisen em i mekim. Em i tingim man bilong em olsem het bilong em long ol samting bilong lotu, na em i tingim wok God i givim long em olsem helpim bilong sapotim man bilong em long ol disisen em i mekim. a Olsem na em i daunim samting inap traim bilip bilong em, na bihainim tok bilong Josep.

8. (a) Wanem samting moa i kirapim Maria long i go long Betlehem wantaim Josep? (b) Long wanem rot eksampel bilong Maria inap strongim ol bilip manmeri?

⁸ Wanem samting moa i kirapim Maria long bihainim tok? Yu ting Maria i save long dispela tok profet olsem Betlehem em ples we Mesaia bai bon? Baibel i no tokaut long dispela. Tasol yumi ken ting em i save long dispela tok profet, bikos em samting ol hetman bilong lotu na ol narapela manmeri long taim bilong em i save long en. (Mat. 2:1-7; Jon 7:40-42) Maria i save gut long planti tok bilong Baibel. (Luk 1:46-55) Maski i gat wanem as na em i go, em i laik bihainim tok bilong man bilong em o lo bilong gavman o tok profet bilong Jehova—o ol dispela 3-pela samting wantaim—em i stap gutpela piksa tru. Jehova i amamas tru long ol man na meri i  daunim ol yet na bihainim tok. Long nau, ol man i ting pasin bilong bihainim tok i no bikpela samting, tasol eksampel bilong Maria inap strongim ol bilip manmeri long olgeta hap.

9, 10. (a) Ating Maria na Josep i tingting long wanem samting taim ol i go klostu long Betlehem? (b) Josep na Maria i stap we? Bilong wanem?

⁹ Ating Maria i amamas tru taim em i lukluk i go na lukim Betlehem. Taim ol i wok long i go antap long ol liklik maunten, na abrusim ol gaden oliv—em ol laspela kaikai bilong bungim—ating Maria na Josep i tingting long histori bilong dispela liklik taun. Betlehem i liklik taun tru namel long ol taun bilong Juda, olsem profet Maika i tok; tasol em ples we Boas, Naomi, na Devit, i bon long en, winim 1,000 yia paslain long Maria i karim Jisas.

¹⁰ Taim Maria na Josep i kamap, ol i lukim taun i pulap tru long ol man. Ol narapela i kam paslain long ol bilong rejistaim nem, olsem na i no gat rum long haus pasindia long ol i ken stap. b Tupela i no gat narapela hap, so ol i mas stap long nait long haus bilong ol animal. Yumi ken piksaim Josep i tingting planti taim em i lukim meri bilong em i pilim bikpela pen we em i no bin pilim bipo, na pen i wok long i go bikpela moa. Long dispela haus bilong ol animal, pen bilong karim pikinini i stat long kamap.

11. (a) Olsem wanem olgeta meri inap pilim hevi bilong Maria? (b) Long wanem ol rot Jisas i stap olsem “fesbon”?

¹¹ Olgeta meri inap pilim hevi bilong Maria. Inap 4,000 yia paslain, Jehova i tok profet olsem ol meri bai kisim bikpela pen taim ol i laik karim pikinini, long wanem, ol i kisim sin long Adam. (Stt. 3:16) Olsem na Maria tu i bin kisim bikpela pen. Luk i no stori long pen Maria i bin pilim, em i tok tasol: “Em i karim pikinini man, em fesbon bilong em.” (Luk 2:7) Yes, em “fesbon” bilong em—fesbon long ol narapela pikinini bilong Maria, ating 7-pela samting. (Mak 6:3) Tasol dispela pikinini bai i narapela kain. Em i fesbon bilong Maria, tasol narapela samting tu, em i “fesbon bilong olgeta samting God i bin wokim,” em dispela wanpela Pikinini Bilong God!​—Kol. 1:15.

12. Maria i slipim pikinini long wanem hap? Olsem wanem ol pilai bilong makim bebi Jisas, ol piksa, na ol bilas pasin bilong bebi Jisas i slip long boks kaikai bilong ol animal i narapela kain long samting tru i bin kamap?

¹² Nau Baibel i mekim dispela hap tok: “Em i pasim em long hap laplap na slipim em insait long boks kaikai bilong ol animal.” (Luk 2:7) Ol pilai bilong makim bebi Jisas, ol piksa, na ol bilas pasin bilong bebi Jisas i slip long boks kaikai bilong ol animal i soim  olsem em gutpela hap long Maria i karim pikinini. Tasol tingim samting tru i bin kamap. Maria i slipim bebi long boks ol animal i save kaikai long en. Tingim, dispela famili i stap long haus bilong animal, kain ples i no gat gutpela win na i no klin—long dispela taim na nau tu. Ol papamama i no laik makim kain ples olsem bilong karim pikinini, sapos i gat narapela hap i stap. Planti papamama i laik lukautim gut pikinini bilong ol. Olsem na yumi save Maria na Josep i laik lukautim gut Pikinini Bilong God!

13. (a) Long wanem rot Maria na Josep i mekim wok long ol samting ol i gat? (b) Olsem wanem ol papamama i gat savetingting i putim wok bilong skulim ol pikinini long laikim Jehova i stap nambawan olsem Josep na Maria?

¹³ Tasol ol i no putim tingting long ol samting ol i no inap mekim, nogat; ol i mekim wok long ol samting ol i gat. Tingim, Maria yet i lukautim bebi, karamapim em long hap laplap, na slipim em gut insait long boks kaikai bilong ol animal, na bai bebi i seif na i no kol. Ating Maria i tingting planti, tasol em i no larim dispela i pasim em long lukautim gut pikinini bilong em. Maria na Josep i save tu olsem, wok bilong skulim dispela pikinini long laikim Jehova, dispela i bikpela samting ol i mas mekim. (Ritim Lo 6:6-8.) Nau long dispela taim we ol man i no tingim God, ol papamama i gat savetingting i putim wok bilong skulim ol pikinini long laikim Jehova i stap nambawan.

14, 15. (a) Wai na ol wasman i laik tru long lukim dispela bebi? (b) Ol wasman i mekim wanem taim ol i lukim dispela bebi long haus bilong ol animal?

¹⁴ Orait wantu bikpela nois i kamap. Sampela wasman bilong sipsip i hariap i kam insait long haus bilong ol animal, ol i laik tru long lukim dispela famili, na moa yet dispela pikinini. Ol dispela man i toktok wantaim amamas, pes bilong ol i lait. Ol i lusim ol liklik maunten we ol i bin stap wantaim ol sipsip bilong ol na ol i kam hariap. c Ol i tokim dispela papamama long gutpela samting i bin painim ol nau tasol. Long biknait, wantu wanpela ensel i bin kamap long ol long dispela hap. Lait bilong glori bilong Jehova i bin raunim ol, na ensel i tokim ol olsem nau tasol Krais, o Mesaia, i bon long Betlehem. Ol bai lukim dispela bebi i slip long boks kaikai bilong ol animal, na karamap long hap laplap. Orait nau, wanpela narakain samting tru i kamap—bikpela lain ensel i kam, na i wok long preisim God!​—Luk 2:8-14.

¹⁵ Olsem na yumi no kirap nogut olsem ol dispela wasman i  hariap i kam long Betlehem! Ating ol i amamas nogut tru long lukim dispela nupela bebi i stap olsem ensel i bin tok. Ol i no haitim dispela gutnius, nogat. “Ol i kamapim ol samting . . . Na olgeta husat i harim tok ol wasman i autim ol i kirap nogut.” (Luk 2:17, 18) Ol hetman bilong lotu long dispela taim i save luk daun long ol wasman bilong sipsip. Tasol i klia tru olsem Jehova i tingim tru ol dispela gutpela man i gat pasin daun. Taim ol i kam lukim Maria, dispela i mekim wanem long em?

16. Olsem wanem pasin bilong Maria long skelim gut ol samting i soim klia strongpela bilip bilong em?

¹⁶ Nau tasol Maria i karim pikinini na ating em i no gat strong, tasol em i putim gut yau long olgeta tok bilong ol. Na em i mekim sampela samting moa: “Maria i putim ol dispela tok long tingting bilong em na em i wok long skelim long bel olsem ol dispela tok i makim wanem samting.” (Luk 2:19) Dispela yangpela meri i save skelim gut ol samting. Em i save dispela tok ensel i mekim i bikpela samting. God bilong em, Jehova, i laik bai em i ken save na kliagut long pikinini bilong em i husat na bikpela wok em bai mekim. Maria i putim gut yau na mekim sampela samting moa. Em i putim olgeta dispela tok long bel na bai em i ken tingim tingim long ol mun na yia i kam. Dispela em bikpela risen na Maria i gat strongpela bilip long laip olgeta bilong em.​—Ritim  Hibru 11:1.

17. Hau yumi inap bihainim eksampel bilong Maria taim yumi tingim ol bikpela tok i tru bilong Baibel?

¹⁷ Bai yu bihainim eksampel bilong Maria? Jehova i bin putim ol bikpela tok i tru bilong em long Baibel. Tasol ol dispela tok i tru i no inap helpim yumi tumas sapos yumi no tingim gut. Yumi mekim olsem long rot bilong ritim Baibel long olgeta de—yumi no laik ritim olsem wanpela buk nating, nogat, yumi mas ritim olsem em i Tok Bilong God. (2 Tim. 3:16) Na olsem Maria, yumi mas putim ol tok bilong God long bel, na tingim tingim. Sapos yumi tingim tingim ol tok yumi ritim long Baibel, na tingim olsem wanem yumi ken bihainim gut moa ol tok bilong Jehova, dispela bai strongim bilip bilong yumi.

18. (a) Olsem wanem Maria na Josep i bihainim Lo Bilong Moses long taim Jisas i bebi? (b) Ofa Josep na Maria i givim long tempel i kamapim klia wanem samting long sindaun bilong ol?

¹⁸ Long namba 8 de bilong bebi, Maria na Josep i katim skin  bilong em olsem Lo Bilong Moses i tok, na ol i kolim nem bilong em Jisas, olsem ensel i bin tokim ol. (Luk 1:31) Na long namba 40 de, ol i kisim em long Betlehem na i go long tempel long Jerusalem, em i stap longwe olsem 10 kilomita, na mekim ofa bilong kamap klin olsem Lo i makim bilong ol rabisman—tupela wel pisin balus, o tupela pisin balus. Ol i no inap ofaim sipsip o wel pisin balus olsem ol narapela papamama, tasol ol i no sem long dispela. Maski i olsem, taim ol i stap long tempel ol i kisim planti tok bilong strongim ol.​—Luk 2:21-24.

19. (a) Olsem wanem Simeon i givim sampela tok moa long Maria i ken putim long bel? (b) Ana i mekim wanem taim em i lukim Jisas?

¹⁹ Wanpela lapun man, nem bilong em Simeon, i kam long ol na givim sampela tok moa long Maria i ken putim gut long bel. God i bin tokaut long em olsem em bai lukim Mesaia paslain long em i dai, na holi spirit bilong Jehova i bin kamapim long em olsem bebi Jisas em dispela Seivia. Na Simeon i toksave long Maria olsem bihain em bai karim bikpela pen. Em i tok dispela pen bai i olsem wanpela longpela bainat i sutim em. (Luk 2:25-35) Maski ol dispela tok i pretim em, dispela i helpim em long sanap strong taim hevi i kamap, 33 yia bihain. Simeon i tok pinis, orait nau profet meri Ana i kam lukim bebi Jisas na em i kirap autim tok bilong dispela pikinini long olgeta manmeri husat i wet long God i kisim bek Jerusalem.​—Ritim Luk 2:36-38.

20. Olsem wanem disisen bilong ol long bringim Jisas i go long tempel long Jerusalem i gutpela disisen?

 ²⁰ Josep na Maria i bin mekim gutpela disisen long kisim bebi bilong ol i kam long tempel bilong Jehova long Jerusalem! Samting ol i mekim em kirap bilong pasin bilong dispela pikinini long go oltaim long tempel bilong Jehova. Taim ol i stap long dispela hap, ol i wok strong inap long skel bilong ol long mekim wok bilong God na kisim ol tok bilong skulim na strongim ol. Long dispela de, taim Maria i lusim tempel bilip bilong em i strong moa, bel bilong em i pulap long ol bikpela tok i tru na em inap tingim tingim na tokim ol narapela.

21. Hau yumi ken save tru olsem bilip bilong yumi bai kamap strong moa, olsem Maria?

²¹ Em i gutpela samting tru long lukim ol papamama long nau i bihainim dispela pasin. Insait long lain Witnes Bilong Jehova, ol papamama i save bringim ol pikinini bilong ol long olgeta miting Kristen. Ol i save mekim olgeta samting ol inap mekim, na kamapim ol tok bilong strongim ol wanbilip bilong ol. Na taim ol miting i pinis, ol i strong moa, amamas, na ol i gat planti gutpela tok bilong tokim ol narapela. Em bai gutpela long yumi bung wantaim ol! Taim yumi mekim olsem, bilip bilong yumi bai kamap strong moa, olsem Maria.