LESEN 19
Yu Ting Ol Witnes Bilong Jehova Ol i Kristen Tru?
Mipela Ol Witnes Bilong Jehova i bilip olsem mipela i Kristen tru. Bilong wanem? Skelim wanem samting i as bilong ol bilip bilong mipela, nem bilong mipela i mekim mipela i stap narapela kain, na pasin laikim mipela i gat long narapela narapela.
1. Wanem samting i as bilong ol bilip bilong ol Witnes Bilong Jehova?
Jisas i tok: “Tok bilong [God] em i tok i tru.” (Jon 17:17) Wankain olsem Jisas, oltaim ol Witnes Bilong Jehova i putim Baibel i stap olsem as bilong ol bilip bilong ol. Skelim hau mipela i mekim olsem long bipo na i kam inap long nau. Long yia 1870 samting, wanpela lain sumatin bilong Baibel i kirap skelim gut ol tok bilong Baibel. Baibel i stap olsem as bilong ol bilip bilong ol, maski ol bilip bilong ol i no wankain long ol bilip bilong ol lotu. Bihain ol i kirap tokim ol narapela long ol dispela tok i tru bilong Baibel. a
2. Wai na mipela i kolim mipela yet olsem Ol Witnes Bilong Jehova?
Jehova i kolim ol man i lotuim em olsem ol witnes bilong em bikos ol i helpim ol man long kisim stretpela save long em. (Hibru 11:4–12:1) Olsem, long bipo God i tokim lain bilong em: “Yupela i witnes bilong mi.” (Ritim Aisaia 43:10.) Baibel i kolim Jisas olsem “Witnes i Stap Gut Long Wok.” (Revelesen 1:5) Olsem na long 1931, mipela i kisim nem Ol Witnes Bilong Jehova. Mipela i amamas long holim dispela nem.
3. Olsem wanem ol Witnes Bilong Jehova i bihainim eksampel bilong Jisas long soim pasin laikim?
Jisas i laikim tru ol disaipel bilong em na ol i stap olsem famili bilong em. (Ritim Mak 3:35.) Olsem tasol, ol Witnes Bilong Jehova i stap wanbel wantaim olsem wanpela famili long olgeta hap bilong graun. Dispela i as na mipela i kolim narapela narapela olsem brata na sista. (Filemon 1, 2) Na tu, mipela i save bihainim dispela tok: “Laikim tru olgeta wanbilip bilong yupela.” (1 Pita 2:17) Mipela ol Witnes Bilong Jehova i save soim pasin laikim long kain kain rot, kain olsem taim ol wanbilip bilong mipela long ol narapela hap bilong graun i sot, mipela i redi long helpim ol.
KISIM SAMPELA SAVE MOA
Kisim save moa long histori bilong ol Witnes Bilong Jehova, na lukim ol samting i kamapim klia olsem ol i Kristen tru.
Baibel i as bilong ol bilip bilong ol Kristen tru, na ol i save tokim ol narapela long ol dispela bilip bilong ol
4. Baibel i as bilong ol bilip bilong mipela
Jehova i tok profet olsem ol tok i tru bilong Baibel bai kamap klia moa. Ritim Daniel 12:4 na futnot, na stori long dispela askim:
-
Wanem samting bai “kamap bikpela tru” namel long lain bilong God taim ol i wok long skelim Baibel?
Skelim hau wanpela lain sumatin bilong Baibel, na Charles Russell tu, i bin skelim skelim Tok bilong Baibel. Pilaim VIDIO, na stori long dispela askim.
-
Long vidio, Charles Russell na ol wanlain Sumatin Bilong Baibel i bihainim wanem kain pasin bilong skelim Baibel?
Yu save long dispela?
Sampela taim mipela i stretim sampela bilip bilong mipela. Bilong wanem? Wankain olsem san i wok long kam antap na isi isi ples i wok long kamap klia moa, God i mekim na isi isi mipela i wok long kliagut moa long Tok bilong em. (Ritim Provep 4:18.) Baibel i no save senis, tasol taim mipela i kliagut moa long tok bilong en, mipela i mekim senis long ol bilip bilong mipela.
5. Mipela i mekim ol samting i stret long nem bilong mipela
Wai na mipela i kisim nem Ol Witnes Bilong Jehova? Pilaim VIDIO, na stori long dispela askim.
-
Wai na i stret mipela i kisim nem Ol Witnes Bilong Jehova?
Wai na Jehova i makim wanpela lain bilong i stap witnes bilong em? Bikos ol bai kamapim olsem em i God tru, long wanem, planti man i mekim ol tok long God we i giaman. Skelim tupela bilong ol dispela tok giaman.
Sampela lotu i skulim lain bilong ol olsem God i laik bai ol i yusim ol imis long mekim lotu. Ritim Wok Pris 26:1, na stori long ol dispela askim:
-
Wanem tok em tru? Jehova i pilim olsem wanem long pasin bilong yusim ol imis?
Sampela bikman bilong lotu i skulim ol man olsem Jisas em God. Tasol ritim Jon 20:17, na stori long ol dispela askim:
-
Wanem tok em tru? Yu ting God na Jisas i wanpela man tasol?
-
Yu pilim olsem wanem long save olsem Jehova i salim ol Witnes i kam long autim tok long stretpela save long em na Pikinini bilong em?
6. Mipela i laikim narapela narapela
Baibel i tok piksa long ol Kristen i olsem bodi bilong man i gat narapela narapela hap bilong en. Ritim 1 Korin 12:25, 26, na stori long ol dispela askim:
-
Ol Kristen tru i mekim wanem taim ol narapela Kristen i karim pen na hevi?
-
Yu lukim wanem samting long pasin laikim namel long ol Witnes Bilong Jehova?
Taim ol Witnes Bilong Jehova long wanpela hap bilong graun i bungim hevi, ol wanbilip long ol long ol narapela hap i save helpim ol kwiktaim. Bilong lukim wanpela eksampel, pilaim VIDIO. Na stori long dispela askim.
-
Olsem wanem rilif wok bilong ol Witnes bilong Jehova i soim pasin laikim?
Ol Kristen tru i save soim pasin laikim long ol man i sot long ol samting
SAMPELA MAN I TOK: “Lotu bilong ol Witnes Bilong Jehova em nupela lotu.”
-
Kirap long wanem taim Jehova i kolim ol manmeri i lotuim em olsem ol witnes?
OL BIKPELA POIN
Mipela Ol Witnes Bilong Jehova i Kristen tru. Mipela i wanpela bikpela famili i stap long olgeta hap bilong graun, na Baibel i as bilong ol bilip bilong mipela, na mipela i tokaut long stretpela save long Jehova.
Riviu
-
Bilong wanem mipela i kisim nem Ol Witnes Bilong Jehova?
-
Mipela i save mekim wanem kain pasin long narapela narapela?
-
Yu ting ol Witnes Bilong Jehova i Kristen tru?
MEKIM WOK PAINIMAUT
Kisim save moa long histori bilong mipela.
Ol Witnes Bilong Jehova—Kamapim Bilip Bilong Ol, Hap 1: Kamaut Long Tudak (1:00:53)
Lukim wanpela eksampel bilong hau ol Witnes Bilong Jehova i kamapim klia ol bilip giaman.
Kisim bekim bilong ol askim em yu gat long ol Witnes Bilong Jehova.
“Ol Askim Planti Man i Save Mekim Long Ol Witnes Bilong Jehova” (wanpela seksen long jw.org/tpi)
Stephen i heitim tru ol man i bilong narapela skin kala na em i mekim save long ol. Kisim save long wanem samting em i lukim long ol Witnes Bilong Jehova we i kirapim em long senisim pasin bilong em.
“I Stap Bilong Mi i Wok Long Go Nogut Moa” (Wastaua, Julai 1, 2015)
a Nius bilong mipela, The Watchtower, i kamapim tok i tru bilong Baibel kirap long 1879 na i kam.
Ating Yu Bai Laikim Tu
OL ASKIM PLANTI MAN I SAVE MEKIM
Baibel Stadi Kos Em Ol Witnes Bilong Jehova i Save Mekim Em Wanem Samting?
Ol Witnes Bilong Jehova i mekim fri Baibel stadi program, yu ken yusim wanpela trenslesen bilong Baibel em yu yet laikim. Yu ken invaitim famili olgeta bilong yu o ol pren bilong yu long joinim yu long stadi.
