ASKIM 3
Hau Mi Ken Toktok Gut Wantaim Papamama?
BAI YU MEKIM WANEM?
Tingim dispela: Em Trinde apinun. Geoff i gat 17 krismas i mekim ol haus wok pinis na em i redi long malolo! Em i onim TV na sindaun long feivret sia bilong em.
Long seim taim papa bilong em i kam sanap long dua, em i no luk amamas.
“Geoffrey! Wai na yu westim taim long watsim TV, yu gat wok long helpim brata bilong yu long mekim homwok bilong em. Yu no save harim tok!”
“Em i mekim gen,” Geoff i toktok isi, tasol Papa inap harim em.
Papa i daunim het na i tok: “Yu tok wanem?”
“Mi no mekim wanpela tok, Papa,” Geoff i pulim win strong na rolim ai bilong em.
Nau Papa i belhat nogut tru. Em i tok strong olsem, “No ken tromoi kain nek olsem long mi!”
Sapos yu Geoff, yu inap mekim wanem na bai Papa i no ken kros long yu?
STOP NA TINGTING!
Pasin bilong toktok wantaim papamama i kain olsem yu draivim kar. Sapos yu kamap long rotblok, yu ken bihainim narapela rot.
EKSAMPEL:
Wanpela gel nem bilong em Leah i tok: “Mi pilim olsem i hatwok long mi toktok wantaim papa bilong mi. Sampela taim mi save toktok long em inap longpela taim, tasol em bai tok, ‘Sori, yu toktok long mi, a?’”
LEAH I KEN MEKIM 3-PELA SAMTING.
-
Bikmaus long papa bilong em.
Leah i singaut, “Kamon. Em bikpela samting! Putim yau!”
-
Stop long toktok long papa bilong em.
Leah i givap long tokim papa bilong em long hevi em i karim.
-
Larim sampela haptaim i lus na tokim em gen.
Leah i ken wet na bihain em i toktok long Papa, o em i ken raitim pas long Papa na kamapim hevi bilong em.
Yu bai tokim Leah long makim 1, 2 o 3?
TINGIM: Papa bilong Leah i tingting long ol narapela samting, na em i no luksave Leah i belhat. Sapos Leah i makim Namba 1, Papa i no inap save wai na Leah i bikmaus. Ating Papa bai no gat laik long putim yau long Leah, na Leah i no soim rispek na ona long em. (Efesus 6:2) Dispela pasin bai i no inap helpim tupela wantaim.
Wankain olsem taim yu kamap long rotblok na yu painim narapela rot, yu inap painim rot bilong toktok gut wantaim papamama
Namba 2 em isi long mekim, tasol em no gutpela pasin. Wai? Bikos Leah i laik stretim hevi em i gat, na em nid long toktok long papa bilong em—na sapos Papa bai helpim em, orait em i mas save long wanem hevi i painim Leah. Pasim maus na i no laik toktok i no inap kamapim gutpela samting.
Namba 3, Leah i no larim wanpela samting i pasim rot bilong em long toktok long Papa. Em i wet na bihain em i toktok long Papa. Na sapos em i laik raitim pas na kamapim hevi bilong em long Papa, em bai amamas.
Sapos em i raitim pas, ating em bai tingim gut ol tok em i laik mekim. Na taim Papa i ritim pas, em bai save long samting Leah i laik tokim em long en na em bai kliagut long hevi bilong Leah. So Namba 3 rot i helpim Leah na papa bilong em. Maski em i toktok stret wantaim Papa, o em i raitim pas, dispela pasin i stret wantaim tok bilong Baibel olsem “wok strong long mekim ol samting i save kamapim bel isi.”—Rom 14:19.
Leah i ken mekim wanem ol narapela samting?
Sapos yu inap tingim wanpela samting, orait raitim long spes i stap daunbilo. Na raitim tu wanem samting bai kamap long dispela.
No Ken Mekim Wanpela Tok Na Narapela Pasin
Tingim, planti taim tok yu mekim na tingting papamama i gat long dispela tok, i no wankain.
EKSAMPEL:
Papamama bilong yu i askim yu long wai na yu no luk amamas. Na yu tok, “Mi no laik toktok long dispela samting.”
Tasol papamama i harim dispela tok olsem: “Mi no trastim yu inap long mi ken tokim yu long hevi bilong mi. Mi bai tokim ol pren bilong mi, tasol mi no inap tokim yu.”
Tingim olsem yu karim wanpela hevi na papamama i laik helpim yu. Tasol yu tok: “No ken wari. Mi yet bai karim dispela hevi.”
-
Ating papamama bai ting olsem:
-
Gutpela tok yu inap bekim em:
