Long 2011 long Itali, ol i salim planti baisikol moa winim namba bilong ol kar ol i salim. As bilong dispela em, long wanem, i gat hevi bilong mani, pe bilong fiul i go antap, na pe bilong stretim na lukautim kar i bikpela. Ol baisikol i no gat bikpela pe long stretim na lukautim, isi long yusim, na i no hatwok long yusim long olgeta hap.

Yuropian Kot ov Human Raits i tok gavman bilong Amenia i kalapim raits bilong 17 yangpela man em ol i Witnes Bilong Jehova, taim gavman i arestim ol na putim ol long kalabus bikos ol i no laik mekim wok sivilien aninit long wok bos bilong ol bikman bilong ami. Kot i tok gavman i mas baim ol bagarap ol i bin kamapim, baim kot na baim tu ol loya bilong ol dispela 17 yangpela man.

Long ol pikinini em ol i bin kisim hevi long rot bilong yusim ol sosel netwok Web-sait, 63 pesen bilong ol i tok ol papamama bilong ol i no bin givim tok lukaut long ol samting nogut bilong ol sosel netwok. Ol i intaviuim 599 man i save yusim ol dispela Web-sait na 74 pesen bilong ol i tokaut olsem ol i yusim ol dispela Web-sait bilong mekim pasin pamuk wantaim ol pikinini.

Bilong ol kar i no ken pas pas tumas long rot, ol bikpela siti i putim sampela mak bilong daunim namba bilong ol nupela kar i laik kisim rejistresen. Olsem, biktaun Beijing bai givim aninit long 240,000 rejistresen long olgeta wan wan yia. Long Ogas 2012, 1,050,000 manmeri i putim aplikesen bilong kisim rejistresen bilong ronim kar, tasol i gat 19,926 rejistresen pepa tasol, olsem na dispela i makim olsem long olgeta 53 manmeri i putim aplikesen, wanpela tasol bai kisim rejistresen.