Stori long bekgraun bilong yu.

Papamama bilong mi i stap rabis na mama bilong mi i no save long rit na rait. Mipela i save lukautim ol pik na groim ol gaden kaikai long ples we tait wara i save kamap long en klostu long Taipei siti. Papamama i lainim mi olsem em bikpela samting long wok hat, na tu, ol i lainim mi long helpim ol narapela.

Famili bilong yu i save go lotu?

Famili bilong mi i bilong lotu Tao. Mipela i save mekim ol sakrifais long “God Bilong Heven,” tasol mipela i no save em i wanem kain God. Mi save ting: ‘Wai na ol man i save karim pen na hevi? Wai na ol man i gat gridi pasin?’ Mi ritim ol buk bilong Lotu Tao na Lotu Buda, na ol buk i stori long histori bilong ol kantri bilong Esia na bilong Yurop na Amerika samting. Na tu, mi bin go long sampela lotu. Tasol mi no kisim bekim bilong ol askim bilong mi.

Wai na yu stadi long saiens?

Mi laikim matematiks na mi kirap nogut long hau ol lo i bosim i stap bilong olgeta samting long graun na long yunives, na hau ol kemikal lo i bosim ol hap bilong ol dispela samting long wok gut wantaim. Olgeta samting long dispela traipela yunives i go inap long ol liklik sel em yumi no inap lukim long ai, i gat ol lo i bosim ol hap bilong en. Na mi laik kliagut moa long ol dispela lo.

Wai na yu bilip olsem tok bilong evolusen em i tru?

Mi no bin lain long narapela tok i agensim evolusen. Kirap long haiskul i go inap long yunivesiti, mi kisim save olsem evolusen em as bilong olgeta samting i gat laip. Na bikos mi wanpela saientis bilong baioloji, evolusen em samting mi mas bilip tasol long en.

Wanem samting i kirapim yu long ritim Baibel?

Long 1996, mi go stap long Jemani bilong kisim sampela skul  moa long yunivesiti. Long yia bihain, mi bungim wanpela meri nem bilong em Simone. Em i wanpela Witnes Bilong Jehova na em i laik soim mi ol bekim bilong ol askim bilong mi long Baibel. Taim em i tokim mi olsem Baibel i stori long as bilong laip, mi kirap nogut tru. Mi save kirap long bikmoning long 4 klok samting na ritim Baibel inap wanpela aua. Na bihain mi save go wokabaut na tingim tingim ol dispela tok mi ritim. Long yia bihain, mi ritim Baibel olgeta. Mi kirap nogut long lukim ol tok profet bilong Baibel i kamap tru. Isi isi mi bilip tru olsem Baibel i kam long God.

Wanem tingting bilong yu long laip i kirap olsem wanem?

Long pinis bilong yia 1990, taim mi skelim ol samting i gat laip i kamap olsem wanem, ol saientis bilong stadim molekiul tu i kirap luksave olsem ol sel bilong ol samting i gat laip i save wok narakain tru winim tingting ol i bin gat bipo. Ol saientis i bin save olsem ol protin insait long sel em ol molekiul we i hatwok tru long kliagut long ol. Tasol nau ol i kisim nupela save long hau ol grup protin i save bung wantaim bilong mekim wok olsem wanpela masin molekiul. Wanpela masin molekiul olsem i gat winim 50 protin long en. Wanpela liklik sel i mas i gat ol narapela narapela masin molekiul long en bilong kamapim pawa, kopim ol infomesen, na kontrolim ol samting i go insait o kam ausait long sel.

Dispela save i mekim wanem long yu?

Mi askim mi yet, ‘Ol dispela masin molekiul i gat planti protin long en i wok gut tru i kamap olsem wanem?’ Long dispela taim, ol saientis i no kliagut long wok i kamap insait long sel bilong ol samting i gat laip na ol tu i gat wankain askim. Wanpela profesa bilong saiens long Amerika i raitim wanpela buk na i tok ol masin molekiul i stap insait long ol sel long ol samting i gat laip i save wok narakain tru, olsem na ol i no kamap nating long laik bilong ol yet. Mi wanbel long dispela tok. Mi pilim olsem i gat wanpela Man i wokim olgeta samting i gat laip.

Bilong wanem yu kamap wanpela Witnes Bilong Jehova?

Mi kirap nogut olsem maski Simone i no gat gutpela helt, long olgeta wik em i save draiv inap 56 kilomita bilong kam skulim mi long Baibel. Mi kisim save olsem long taim bilong gavman Natsi bilong Jemani, ol i bin kalabusim sampela Witnes long ol kalabus nogut bikos ol i no laik insait long woa. Mi kirap nogut long pasin bilong ol long sanap strong. Pasin bilong ol Witnes long laikim God i mekim na mi laik kamap wankain olsem ol.

Olsem wanem bilip bilong yu long God i helpim yu?

Ol wanwok bilong mi i tok nau mi stap amamas moa. Bipo mi save pilim olsem mi samting nating bikos famili bilong mi i stap rabis, olsem na mi no save tokim ol narapela long wanem hap mi kamap bikpela long en na stori long papamama bilong mi. Tasol Baibel i skulim mi olsem God i no save skelim sindaun bilong yumi. Jisas i kamap bikpela insait long wanpela famili em ating ol i stap rabis wankain olsem famili bilong mi. Nau mi save lukautim papamama bilong mi na mi save bringim ol i go bungim ol pren bilong mi.