Pikinini gel bilong yu i tok olsem presa i daunim em. Yu kirap nogut na tingting, ‘Em i gat 13 krismas tasol! Em yangpela tumas long i gat kain hevi olsem!’ Tasol paslain long yu tokim em olsem, tingim sampela risen na em i pilim olsem laip i gat planti hatwok tumas.

Ol senis i kamap long bodi. Ol senis i kamap long bodi inap mekim em i wari, na moa yet sapos ol dispela senis i kamap long em bihain liklik o paslain liklik long ol wanlain bilong em. Anna a i gat 20 krismas i tok: “Mi wanpela bilong ol fes meri long werim bra, mi sem na mi pilim olsem mi narapela kain long ol wanlain bilong mi. Taim mi skelim mi yet wantaim ol wanlain, mi pilim olsem mi no nomol!”

Ol senis i kamap long tingting. Karen i gat 17 krismas i tok: “Mi bel hevi olsem mi no save wai na mi save amamas long de taim na long nait mi save krai nogut tru. Mi no save wanem samting i wok long kamap long mi. Mi hatwok tru long bosim tingting na filings bilong mi.”

Kirap long kisim sik mun. Yangpela meri Kathleen i tok: “Maski mama bilong mi i bin toktok wantaim mi long wanem samting bai kamap, mi no bin redi taim mi kisim sik mun fes taim. Mi waswas planti taim long wanpela de bikos mi pilim olsem mi doti. Na tu, planti taim tripela bikbrata bilong mi i save tok pilai long mi long dispela samting. Ol i ting em i pani olsem mi kisim sik mun.”

Presa i kam long ol wanlain. Marie i gat 18 krismas i tok: “Taim mi gat 12 i go 14 krismas, mi pilim bikpela presa bilong stap wankain olsem ol wanlain. Ol pikinini long skul bilong mi ol i save nogutim ol pikinini i laik stap narapela kain.” Anita i gat 14 krismas i tok: “Taim yu tineja, yu bai pilim olsem em i bikpela samting long i gat ol pren, sapos  ol wanlain i no laikim yu, dispela inap bagarapim tru bel bilong yu.”

Kirapim pikinini meri long autim hevi bilong em. Ating pastaim em bai surik long toktok. Tasol no ken les kwik na bihainim tok bilong Baibel long ‘putim yau kwik long harim tok, na no ken hariap long mekim toktok.’—Jems 1:19.

Tingim tru hevi bilong em. Tingim, em i no gat wankain ekspiriens olsem yu, olsem na em i no save long rot bilong stretim dispela hevi na ating em i no lain yet long mekim olsem.—Stiatok bilong Baibel: Rom 15:1, King Jems Nupela Testamen.

No ken givim planti wok samting long em bihain long skul. Buk Teach Your Children Well i tok long ol yangpela husat i gat planti wok samting long mekim bihain long skul olsem “planti taim i gat ol sain i soim olsem presa i daunim ol, olsem het pen na bel pen samting.”—Stiatok bilong Baibel: Filipai 1:9, 10.

Larim pikinini bilong yu i malolo gut. Planti taim ol tineja i no save kisim gutpela slip. Sapos pikinini gel bilong yu i no kisim gutpela slip, em i no inap wokim gut tingting, na em bai no gat strong long daunim presa.—Stiatok bilong Baibel: Saveman 4:6.

Helpim em long painim ol gutpela rot bilong daunim presa. Sampela gels i pilim olsem eksasais i save daunim pasin bilong tingting planti. Baibel i tok: “Pasin bilong kisim trening long bodi inap helpim yu.” (1 Timoti 4:8) Ol narapela gels i pilim olsem ol i save raitim filings bilong ol long notbuk na dispela i helpim ol long no ken tingim tumas presa. Brittany i gat 22 krismas i tok: “Taim mi liklik, mi save raitim long notbuk ol hevi mi hatwok long stretim. Dispela i helpim mi long kliagut long tingting mi gat long dispela hevi, na long dispela rot mi ken stretim hevi o lusim tingting long en.”

Stap gutpela piksa. Yu save mekim wanem bilong daunim presa? Yu save mekim planti samting tumas na taim yu no inap pinisim olgeta dispela samting, yu kirap pilim olsem bel i no stap isi? Yu save wok hat tru na yu no lusim haptaim bilong mekim ol bikpela samting long laip? Filipai 4:5 i tok: “Olgeta man i mas save olsem yupela i save bihainim gutpela tingting.” Tingim, tineja bilong yu i lukim ol pasin bilong yu na em i wok long kisim skul long dispela, maski em i kisim gutpela skul, o nogat.