YUMI krai kirap long de yumi bon. Wanpela saveman i tok taim yumi bebi, yumi save krai bambai wanpela i ken mekim gut long yumi, givim kaikai long yumi o holim yumi. Tasol taim yumi kamap bikpela, i gat ol narapela rot bilong kamapim filings bilong yumi, so wai na yumi save krai?

I gat kain kain samting i mekim na yumi save krai. Ating yumi krai bikos yumi bel sori, belhat, yumi sik, o yumi wari na tingting planti. Tasol bikpela amamas, bel i stap isi, na ol wok yumi mekim i kamap gut, dispela tu i save kirapim yumi long aiwara​—⁠em aiwara bilong amamas. Taim yumi lukim ol narapela i krai, yumi tu i save krai. Maria i tok: “Sapos mi lukim wanpela i krai, maski mi no save long as na em i krai, mi tu i save krai.” Ating yu bin watsim wanpela muvi o ritim wanpela buk we i mekim yu pilim sori na yu krai.

Maski i gat wanem as na yumi krai, pasin bilong krai i gat bikpela mining, maski yumi no mekim wanpela tok. Buk Adult Crying i tok: “I gat sampela narapela rot tu we man i no kolim wanpela tok, tasol pasin em i mekim i gat bikpela mining.” Aiwara i save kirapim narapela long mekim samting. Olsem, taim yumi lukim wanpela i krai sori, yumi save hariap long mekim samting bikos yumi luksave olsem em i bel hevi. Na yumi traim long mekim gut bel bilong em na helpim em.

Sampela saveman i tok krai em wanpela rot bilong rausim ol samting yumi pilim long bel na pasin bilong holim bek aiwara inap bagarapim helt bilong yumi. Ol narapela i tok i no gat wanpela wok saiens i soim klia olsem pasin bilong krai i save helpim bodi na tingting bilong man. Tasol ol wok painimaut i soim olsem 85 pesen bilong ol meri na 73 pesen bilong ol man i tok ol i save pilim gut bihain long ol i krai. Noemí i tok: “Sampela taim mi save olsem mi mas krai. Bihain long mi krai, mi save pulim win gut na tingting bilong mi i klia, na mi kliagut long ol samting mi inap mekim.”

 Tasol i no aiwara tasol i mekim yumi stap bel isi, i gat sampela samting moa. Pasin ol narapela i mekim long yumi taim yumi krai, dispela i save mekim bikpela samting. Olsem, taim ol narapela i lukim yumi krai na ol i mekim gut bel bilong yumi o helpim yumi, yumi save amamas. Tasol sapos ol i no mekim gut long yumi, yumi save pilim sem o yumi pilim olsem i no gat man i tingim yumi.

Yumi no inap kliagut long as na yumi save krai. Tasol yumi save olsem God yet i givim yumi pasin bilong aiwara bilong kamapim samting yumi pilim long bel.