Pikinini bilong yu i gat 6-pela krismas i no save bosim bel. Sapos em i laikim wanpela samting, em i laik yu mas givim long em wantu tasol! Na taim em i belhat, em bai tromoi ol samting nabaut. Ating bai yu tok, ‘Olgeta pikinini i gat wankain pasin? Bihain em bai senisim pasin bilong em o nau em gutpela taim bilong skulim em long bosim bel?’

Long nau ol man i no gat pasin bilong bosim bel. Saveman David Walsh i tok: “Planti taim ol man na pikinini i harim ol arapela i tok em orait long bihainim laik bilong ol yet. Na sampela saveman i stori long laip bilong ol na tokim ol arapela olsem, sapos ol i bihainim laik bilong ol yet bai ol i gat gutpela sindaun. Na tu, sampela i mekim kain tok olsem bilong pulim mani bilong ol man.” a

Skulim pikinini long bosim bel taim em i liklik yet. Long wanpela wok painimaut, ol saveman i givim wan wan loli long ol pikinini i gat 4-pela krismas. Na ol i tokim ol olsem sapos ol i no hariap long kaikai, orait ol bai givim ol narapela loli olsem prais bikos ol i gat pasin bilong wet. Bihain, taim ol dispela pikinini i grediuet long haiskul, wok painimaut i soim olsem ol pikinini husat i gat pasin bilong wet i mekim gut ol skul wok bilong ol, ol i stap bel isi, na tu, ol i gat pasin bilong pren gut wantaim ol arapela.

Hevi bai painim ol pikinini sapos papamama i no skulim ol long bosim bel. Ol saveman i ting olsem, ol samting i kamap long pikinini inap mekim sampela samting long pasin bilong em long wokim tingting long bihain. Saveman Dan Kindlon i tok: “Sapos oltaim yumi bihainim laik bilong pikinini, yumi no skulim ol long pasin bilong wet, na helpim ol long sakim ol traim, orait dispela inap mekim sampela samting long pasin ol i bihainim long taim ol i go bikpela.” b

Stap gutpela eksampel. Yu gat pasin bilong bosim bel? Pikinini bilong yu i luksave olsem yu belhat hariap long taim yu draiv na i gat planti kar long rot, yu kalapim lain bilong baim samting long stua, o yu katim tok bilong narapela? Saveman Kindlon i tok: “Bilong helpim pikinini long kisim pasin bilong bosim bel, yu yet i mas bihainim dispela pasin.”—Stiatok bilong Baibel: Rom 12:9.

Skulim pikinini long ol hevi bilong i no bosim bel. I gutpela yu helpim pikinini long luksave long olsem wanem pasin bilong bosim bel inap helpim em, na wanem ol hevi inap kamap sapos em i no mekim olsem. Tasol tingim olsem pasin bilong yu long skulim em i mas stret wantaim krismas bilong en. Olsem, sapos pikinini i belhat, long wanem, wanpela i mekim em i bel hevi orait yu ken askim em olsem: ‘Yu ting i gutpela yu bekim rong o nogat? Ating i gat gutpela rot bilong stretim dispela hevi, olsem kaunim namba kirap long 1 i go 10 bilong helpim yu long daunim belhat bilong yu? O yu ting em i savepasin long wokabaut lusim dispela hap?’—Stiatok bilong Baibel: Galesia 6:7.

Tok amamas long pikinini. Tok amamas long pikinini taim em i bosim bel. Helpim em long luksave olsem sampela taim i hatwok long bosim bel, tasol man i gat strongpela bel inap mekim olsem! Baibel i tok: “Sapos man i no inap pasim belhat bilong en, orait ol arapela man inap daunim em. Dispela kain man i olsem wanpela taun i no gat banis, na ol birua inap i go insait na bagarapim.” (Sindaun 25:28) Tasol “man i no save belhat kwik, em i mekim gutpela pasin. Dispela pasin i winim pasin bilong pait strong olsem gutpela soldia.”—Sindaun 16:32.

Prektis long samting pikinini inap mekim. Yupela ken mekim wanpela pilai bilong helpim pikinini long luksave long olsem wanem pasin bilong bosim bel inap helpim em. Stori long sampela hevi we inap kamap na pikinini inap mekim wanem long kain taim olsem. Bilong pikinini i ken amamas long dispela pilai, yu ken droim ol piksa, o lukim ol vidio samting bilong helpim pikinini long kisim sampela skul. Ol kain pilai olsem i bilong helpim pikinini long kisim pasin bilong bosim bel, na abrusim pasin bilong belhat kwik.—Stiatok bilong Baibel: Sindaun 29:11.

No ken les kwik. Baibel i tok: “Ol pikinini i save mekim olkain longlong pasin.” (Sindaun 22:15) Olsem na yu no ken ting olsem pikinini bai hariap long kisim pasin bilong bosim bel. Olsem, buk Teach Your Children Well i tok: “Pasin bilong skulim pikinini inap kisim longpela haptaim na bai yu pilim taiet tru, tasol bihain gutpela samting inap kamap.” Na bai yu amamas olsem hatwok bilong yu i no lus nating. Dispela buk i tok moa olsem: “Sapos pikinini i no save bosim bel, orait em inap long kisim drak long taim em i gat 12-pela krismas o mekim maritpasin long taim em i gat 14 krismas.”