GRAUN INAP ABRUSIM BAGARAP
Solwara
SOLWARA i pulap long planti samting yumi save kaikai, na tu, em i pulap long planti samting yumi nidim bilong wokim marasin. Solwara i kamapim bikpela hap bilong win oksijen na i kisim win nogut kabon daioksait em ol man i rausim. Na solwara i save stiaim tu weda bilong yumi.
As na Yumi Mas Lukautim Solwara
Senis bilong weda inap bagarapim ol rif, ol kina samting, na ol narapela samting long solwara. Ol saientis i tok klostu olgeta rif—we i sapotim 25 pesen bilong olgeta samting i gat laip long solwara—inap dai insait long narapela 30 yia.
Ol saveman i tok klostu inap 90 pesen bilong ol pisin i save kisim kaikai long solwara, ol i bin kaikai plastik, na ol i ting olsem plastik i kilim i dai planti milion animal bilong solwara long olgeta yia.
Long 2022 Sekreteri-Jeneral bilong Yunaitet Nesen, António Guterres i tok, “Yumi no bin lukautim gut solwara na nau yumi bungim hevi em mi bai kolim olsem ‘Imejensi Bilong Solwara.’”
Graun Bilong Yumi—God i Wokim Bilong i Stap Oltaim
Sapos ol man i no tromoi ol pipia long solwara, solwara bai stap gut bikos God i wokim solwara na ol samting i gat laip i stap long en long klinim ol yet na stap gut. Wanpela buk (Regeneration: Ending the Climate Crisis in One Generation) i kamapim olsem sapos ol man i no tromoi pipia long solwara, “solwara na ol samting i stap long en inap wok yet long klinim ol yet.” Skelim sampela bilong ol:
-
Ol liklik binatang ol i kolim phytoplankton i save kisim na holim win kabon daioksait —ol man i ting kabon daioksait i mekim na graun i kamap hat moa. Dispela binatang phytoplankton tasol i save kisim wankain namba bilong kabon daioksait olsem olgeta diwai na gras samting long graun i save kisim.
-
Ol liklik binatang tru insait long solwara i save kaikai bun na skin bilong ol pis i dai pinis, sapos ol i no mekim olsem, ol dispela pipia bilong pis bai bagarapim solwara. Na ol narapela animal insait long solwara i save kaikai ol dispela liklik binatang. Wanpela websait (Smithsonian Institution Ocean Portal) i stori olsem dispela pasin bilong ol long wok bung wantaim “i mekim na solwara i stap klin na i no gat pipia.”
-
Pasin bilong planti pis long kaikai, dispela i helpim long daunim ol marasin nogut i stap long solwara we inap bagarapim ol korol, ol kina samting, na ol narapela samting long solwara, na mekim solwara i stap klin.
Ol Samting Ol Man i Mekim
Sapos yumi yusim gen ol beg na ol wara botol em yumi yusim pinis, dispela bai helpim long daunim pasin bilong tromoi ol plastik long solwara bilong yumi
Sapos i no gat pipia i stap long solwara, bai i no gat wok long klinim. Olsem na ol saveman i kirapim ol manmeri long yusim gen ol beg na ol kontena em ol i bin yusim pinis na no ken yusim ol plastik na tromoi ol.
Tasol ol man i mas mekim sampela samting moa. I no longtaim i go pinis, insait long wanpela yia, wanpela oganaisesen bilong lukautim graun samting i bungim 9,200 ton pipia long nambis bilong 112 kantri. Tasol dispela em liklik hap tru bilong ol pipia em ol man i save tromoi long solwara long olgeta yia.
Nius National Geographic i tok “ol man i no inap rausim ol marasin nogut i stap pinis [long solwara].” Sori tru, ol animal bilong solwara i no inap klinim solwara, bikos ol man i yusim tumas ol samting olsem “oil, petrol, na ston kol samting. Ol dispela samting i no gat bikpela pe na ol bisnis long olgeta hap i yusim ol dispela samting.”
Ol Risen Bilong Wetim Ol Gutpela Samting—Tok Baibel i Mekim
“Ol samting yu bin wokim i pulap tru long graun. Na solwara i bikpela tru na i dip, na i pulap long ol kain kain bikpela na liklik samting i gat laip em ol man i no inap kaunim.”—Buk Song 104:24, 25.
Krieta bilong yumi i wokim solwara na em i putim ol lo long en bilong klinim em yet. Tingim: Sapos Krieta bilong yumi i save gut tru long solwara na olgeta samting i stap insait long en, ating em bai save tu long hau long rausim olgeta samting nogut i bagarapim solwara, a? Lukim atikol “God i Tok Promis Olsem Graun Bilong Yumi i No Inap Bagarap” long pes 15.
