Taim wanpela wanblut o pren i dai, yumi save krai, long wanem, yumi bai misim em. Em tru olsem Jisas i laikim tru Lasarus, tasol taim Lasarus i dai na Jisas i krai, dispela i no makim olsem Jisas i krai long Lasarus, nogat. Olsem Gutnius Bilong Jon i kamapim, Jisas i sori long ol pren na famili bilong Lasarus em ol i krai sori i stap.—Jon 11:36.

Taim Jisas i harim olsem Lasarus i sik, em i no hariap long i go lukim em na oraitim em. Baibel i tok: “Taim [Jisas] i harim olsem Lasarus i sik, em i stap 2-pela de moa long hap em i stap long en.” (Jon 11:6) Bilong wanem Jisas i no go hariap? I gat as na em i mekim olsem. Em i tok: “Dispela sik i no bilong mekim man i dai, nogat, em bilong givim glori long God, bai Pikinini bilong God inap kisim glori long rot bilong en.” (Jon 11:4) Dispela sik i mekim na Lasarus i dai, tasol dispela i no bikpela samting. Bikpela samting em olsem, Jisas i laik yusim dai bilong Lasarus long “givim glori long God.” Olsem wanem dispela i “givim glori long God”? Jisas i redi long wokim bikpela mirakel na kirapim bek gutpela pren bilong em long matmat.

Taim Jisas i stori wantaim ol disaipel long dai bilong Lasarus, em i tok dai i olsem man i slip. Olsem na em i tok: “Lasarus, em i slip. Tasol [em] bai go long hap na kirapim [Lasarus].” (Jon 11:11) Jisas i tingim olsem taim em i kirapim Lasarus, dispela i wankain olsem papamama i kirapim pikinini long slip. Olsem na i no gat as long em i pilim bikpela bel sori taim Lasarus i dai.

Orait, wanem samting i mekim na Jisas i aiwara? Ol narapela tok long Gutnius Bilong Jon i bekim dispela askim. Taim Jisas i bungim Maria, em sista bilong Lasarus, na em i lukim Maria na ol narapela i krai i stap, “bel bilong en i sori tru na em i wari.” Jisas i lukim olsem ol i bel hevi tru, olsem na “bel bilong en i sori tru.” Dispela i mekim na “aiwara bilong Jisas i pundaun.” Jisas i sori tru taim em i lukim olsem ol pren bilong em i bel hevi tru.—Jon 11:33, 35.

Dispela stori i kamapim klia olsem long nupela taim, Jisas i gat strong long kirapim bek ol pren na famili bilong yumi, na helt bilong ol bai gutpela olgeta. Na tu, dispela i soim olsem Jisas i pilim tru hevi bilong ol lain em pren na famili bilong ol i dai long rot bilong sin i kam long Adam. Narapela skul yumi kisim em olsem, yumi mas sori long ol lain husat i krai sori long ol pren na famili bilong ol i dai.

Jisas i save olsem em bai kirapim bek Lasarus. Tasol aiwara bilong em i pundaun, long wanem, em i laikim tru na sori long ol pren bilong em. Olsem tasol, taim yumi pilim hevi bilong ol narapela, dispela inap kirapim yumi long “krai wantaim ol man i krai.” (Rom 12:15) Taim man i krai sori, dispela i no makim olsem em i no bilip long kirap bek. Maski Jisas i redi long kirapim bek Lasarus, em tu i lusim sampela aiwara, olsem na em i stap gutpela piksa tru long pasin bilong sori long ol lain husat i krai sori.