1, 2. Jehova i holim wanem tingting long ol wokman bilong em long graun?

 TAIM ol papamama i lukim ol liklik pikinini i pilai, planti taim ol i kirap nogut long save bilong ol pikinini. Olsem wanem? Yu bin lukim dispela samting i kamap? Ating wanpela pikinini i save gut long pilai spots, na narapela pikinini i save amamas moa long pilai bod gem o droim piksa o wokim ol samting long han. Tasol maski ol pikinini i gat save long mekim wanem wanem samting, ol papamama i save amamas long painimaut long skel bilong save bilong pikinini.

² Jehova tu i laik tru long save gut long ol pikinini bilong em long graun. Em i tingim ol wokman bilong em long nau olsem “ol gutpela samting bilong olgeta lain.” (Hag. 2:7, NW) Ol i gutpela samting tru, long wanem, ol i bilip na givim bel tru long mekim wok bilong God. Ating yu luksave olsem namel long ol Witnes long nau, olgeta wan wan i gat narapela narapela save bilong mekim kain kain wok. Sampela brata i save gut long toktok long pablik, na sampela i save gut long oganaisim ol samting. Planti sista i save gut long lainim ol narapela tokples na yusim long autim tok, na ol narapela i stap gutpela piksa long strongim ol man i bel hevi o lukautim ol sikman. (Rom 16:1, 12) Olsem wanem? Yumi amamas long stap long kongrigesen wantaim ol kain bratasista olsem?

3. Yumi bai skelim wanem ol askim long dispela stadi?

 ³ Tasol ating sampela wanbilip, olsem ol yangpela brata na ol brata i baptais nupela, ol i no kirap yet long mekim wok insait long kongrigesen. Hau bai yumi helpim ol long mekim wok inap tru long skel bilong ol? Wai na yumi mas wok strong long tingim ol gutpela pasin bilong ol, wankain olsem Jehova i save tingim ol?

4, 5. Olsem wanem stori i stap long Hetman 6:11-16 i soim olsem Jehova i save lukim skel bilong ol wokman bilong em long mekim wok?

⁴ Planti stori bilong Baibel i soim klia olsem Jehova i save lukim ol gutpela pasin bilong ol wokman bilong em, na tu, em i save lukim skel bilong ol long mekim wok. Olsem: Taim God i makim Gideon long kisim bek lain Israel long han bilong ol Midian, ating Gideon i kirap nogut taim ensel i tokim em: “Strongpela man bilong pait, Bikpela i stap wantaim yu.” Long dispela taim, Gideon i pilim olsem em i no “strongpela” man. Em i gat 2-pela tingting na em i pilim olsem em i man nating. Tasol taim Jehova i toktok wantaim Gideon, Jehova i bilip moa long Gideon.​—Ritim Hetman 6:11-16.

⁵ Jehova i bilip olsem Gideon bai kisim bek lain Israel bikos Em i skelim save bilong Gideon long mekim wok. Ensel bilong Jehova i luksave olsem Gideon i yusim olgeta strong bilong em long paitim paitim ol wit. Ensel i luksave long narapela samting tu. Long taim bilong ol man i bin raitim Baibel, ol fama i save paitim wit long hap i gat planti spes long en na bai win inap karim ol pipia i go. Long pasin hait, Gideon i paitim wit long hap bilong wokim wain, na long dispela rot em inap haitim liklik kaikai na bai lain Midian i no ken kisim. Gideon i smat tru! Gideon em i wanpela fama, tasol Jehova i lukim olsem​—em i gat savetingting. Yes, Jehova i luksave long skel bilong Gideon long mekim wok na em i wok wantaim Gideon.

6, 7. (a) Olsem wanem tingting em Jehova i holim long profet Amos i narapela kain long tingting bilong sampela Israel? (b) Wanem samting i soim klia olsem Amos i gat gutpela save?

⁶ Jehova i luksave tu long skel bilong profet Amos long mekim wok, maski long ai bilong ol narapela man em i luk olsem em i man nating i no gat nem. Amos i kolim em yet olsem wasman bilong ol sipsip na man bilong lukautim ol diwai fik—ol man i tingim fik olsem kaikai bilong ol rabisman. Taim Jehova makim Amos long givim strongpela tok long 10-pela lain Israel bilong kotim ol long pasin bilong lotuim ol narapela god, ating sampela bilong lain Israel i pilim olsem Amos i no fit long mekim dispela wok.​—Ritim Amos 7:14, 15.

⁷ Amos i kamap bikpela long wanpela liklik ples, tasol em i save gut long ol kastam bilong ples na ol king long taim bilong em, na dispela i soim olsem em i luksave long ol samting i wok long kamap. Em i save long ol samting i kamap long Israel, na ating em i save gut long i stap bilong ol manmeri long ol kantri i stap klostu bikos em i save wok liklik wantaim ol man i raun long mekim wok bisnis. (Amo. 1:6, 9, 11, 13; 2:8; 6:4-6) Sampela saveman bilong Baibel long nau i tok Amos i gat save long raitim gut ol tok. Em i yusim ol liklik tok we i gat bikpela mining, tasol em i raitim ol tok we i klostu wankain. Pris Amasia em man nogut, na taim Amos i strongim bel na bekim tok bilong em, dispela i soim klia olsem Jehova i bin makim man husat i fit long mekim dispela wok. Amos i gat save long mekim wok, na Jehova inap yusim dispela save we ol man i no bin luksave long en long pastaim.​—Amo. 7:12, 13, 16, 17.

8. (a) Jehova i bin mekim wanem tok promis long Devit? (b) Olsem wanem tok bilong Song 32:8 inap strongim ol man husat i no bilip long strong na save bilong ol yet?

⁸ Jehova i luksave long skel bilong wok em olgeta wan wan wokman bilong em inap mekim. Em i tokim King Devit olsem oltaim em bai putim ai long em na stiaim em ‘long rot em i mas wokabaut long en.’ (Sng. 32:8) Yu luksave long olsem wanem dispela skripsa inap strongim yumi? Maski sapos yumi no bilip long strong bilong yumi yet, Jehova inap helpim yumi long mekim ol samting yumi ting yumi no inap mekim,  na yumi inap winim ol mak yumi ting yumi no inap winim. Wankain olsem papa i stiaim pikinini taim em i lain long ronim baisikol, Jehova i redi long stiaim yumi taim yumi wok long kamap strong long bilip. Na tu, Jehova inap yusim ol wanbilip long strongim yumi long mekim wok inap tru long skel bilong yumi. Hau bai em i yusim ol wanbilip?

9. Olsem wanem yumi inap bihainim tok bilong Pol long “tingim ol samting” bilong ol arapela?

⁹ Pol i kirapim olgeta Kristen long “tingim ol samting” bilong ol arapela wanbilip. (Ritim Filipai 2:3, 4.) Tok bilong Pol i makim olsem yumi mas luksave long strong na save bilong ol arapela na tok amamas long ol. Yumi save pilim olsem wanem taim ol arapela i tokim yumi olsem yumi wok long kamap strong long bilip? Dispela i save kirapim yumi long wok strong moa, na yumi mekim gut moa ol wok bilong yumi. Olsem tasol, taim yumi luksave na tokim ol wanbilip long ol gutpela wok ol i mekim, dispela bai kirapim ol long mekim planti wok moa na ol bai kamap strong moa long bilip.

10. I gutpela moa long yumi mas tingim gut wanem lain?

¹⁰ I gutpela moa long yumi mas tingim gut wanem lain? Em tru olsem yumi olgeta i laik bai ol arapela i tingim gut yumi. Tasol em i bikpela samting moa long ol yangpela brata na ol brata i baptais nupela, ol i mas pilim olsem ol tu i mekim ol wok bilong helpim kongrigesen. Dispela bai helpim ol long kliagut olsem ol i stap insait long lain bilong God. Tasol sapos yumi no luksave na tok amamas long ol kain brata olsem, dispela inap daunim laik bilong ol long winim ol mak bilong mekim sampela wok moa, em samting we Baibel i kirapim ol long mekim.​—1 Tim. 3:1.

11. (a) Olsem wanem wanpela elda i helpim wanpela yangpela man long daunim pasin bilong sem? (b) Yu kisim wanem skul long ekspiriens bilong Julien?

¹¹ Ludovic em wanpela brata i mekim wok elda long nau. Taim em i yangpela yet, ol arapela i bin luksave na tok amamas long ol gutpela wok em i mekim, na dispela i bin helpim em, olsem na em i tok: “Taim mi soim olsem mi tingim tru wanpela brata, dispela i save kirapim em long winim kwik ol mak na kamap strong moa long bilip.” Julien em yangpela man husat i save sem, na Ludovic i stori long em na tok: “Sampela taim Julien i save traim long mekim ol pasin we bai kirapim ol arapela long ting olsem em i no gat save, tasol ol pasin em i mekim i no luk olsem ol pasin tru bilong em. Tasol mi inap luksave olsem pasin bilong em i gutpela tru na em i laik tru long helpim ol arapela long kongrigesen. Olsem na mi no kisim 2-pela tingting long em, nogat, mi tingim ol gutpela pasin bilong em, na mi traim long strongim em.” Bihain, Julien i winim mak na em i kamap kongrigesen sevan, na nau em i mekim wok painia oltaim.

12. Yumi mas soim wanem gutpela pasin na bai yumi inap helpim ol arapela long mekim wok inap tru long skel bilong ol? Stori long wanpela eksampel.

¹² Sapos yumi laik helpim ol arapela long mekim wok inap tru long skel bilong ol, orait yumi mas redi long luksave long wok ol i mekim. Ekspiriens bilong Julien i soim olsem yumi no ken lukluk long ol popaia bilong man, nogat, yumi mas lukluk long save na ol gutpela pasin we man inap yusim long mekim planti moa gutpela wok. Dispela i wankain long tingting em Jisas i bin holim long aposel Pita. Sampela taim Pita i no stap strong long bilip, tasol Jisas i tok profet olsem bilip bilong Pita bai kamap strong olsem wanpela ston.​—Jon 1:42.

13, 14. (a) Hau na Barnabas i soim olsem em i holim stretpela tingting long Mak? (b) Olsem wanem wanpela yangpela brata i kisim wankain helpim olsem Mak i bin kisim? (Lukim piksa long kirap bilong stadi.)

¹³ Barnabas tu i soim olsem em i holim stretpela tingting long Jon, narapela nem bilong em Mak, em nem bilong ol Rom. (Apo. 12:25) Taim Pol i mekim namba 1 raun bilong em wantaim Barnabas long wok misineri, Mak i “stap wantaim  ol olsem helpim bilong ol,” ating em i mekim ol narapela wok bilong helpim ol. Tasol taim ol i kamap long Pamfilia, Mak i lusim ol poroman bilong em, olsem na ol yet i go long hap not, em hap i gat planti raskol long en. (Apo. 13:5, 13) I luk olsem Barnabas i lusim tingting long rong bilong Mak na em i kisim Mak i go wantaim em na bai Mak i ken inapim gut trening bilong em. (Apo. 15:37-39) Dispela i helpim Mak long kamap strongpela wokman bilong Jehova. Bihain, Mak i stap wantaim Pol long Rom taim Pol i stap long kalabus, na Mak tu i salim tok gude i go long ol Kristen long Kolosi, na aposel Pol i tokaut long ol narapela long gutpela wok bilong Mak. (Kol. 4:10) Ating Barnabas i amamas tru taim Pol i singautim Mak long i kam helpim ol.​—2 Tim. 4:11.

¹⁴ Alexandre, wanpela nupela elda, em i tingim bek hau wanpela brata i bin bihainim gutpela tingting na dispela i bin helpim em, na em i tok: “Taim mi yangpela yet, mi hatwok tru long mekim beten long ai bilong planti man. Wanpela elda i soim mi long olsem wanem mi ken redim mi yet na tingting na bel i ken stap isi. Dispela brata i no lusim pasin bilong askim mi long beten, nogat, planti taim em i larim mi long beten long bung bilong autim tok. Dispela i strongim mi tru na mi no pret moa.”

15. Olsem wanem Pol i tok amamas long ol bratasista?

¹⁵ Taim yumi luksave long gutpela pasin bilong ol arapela Kristen, yumi save tokim ol olsem yumi amamas tru long gutpela pasin bilong ol, o nogat? Long Rom sapta 16, Pol i tok amamas long ol wanbilip, winim 20 wanbilip, long ol gutpela pasin bilong ol we i mekim na em i laikim ol tumas. (Rom 16:3-7, 13) Olsem: Pol i tok Andronikus na Junias i bin mekim wok bilong Krais inap longpela taim moa winim Pol, na em i kamapim klia pasin bilong tupela long sanap strong na stap gut long God. Pol i mekim gutpela tok tu long mama bilong Rufus, ating em i tingim pasin bilong dispela mama long lukautim em.

16. Taim yumi tok amamas long ol yangpela, wanem gutpela samting inap kamap?

¹⁶ Ating gutpela samting inap kamap taim yumi pilim tru gutpela pasin bilong ol arapela na yumi tok amamas long ol. Tingim Rico, em yangpela boi i stap long Frans. Papa bilong em i no gat wankain bilip olsem em, olsem na em i pasim Rico long kisim baptais na dispela i mekim Rico i bel hevi tru. Rico i ting olsem em i mas wet inap long em i kamap bikpela na bai em inap givim bel olgeta long mekim wok bilong Jehova. Em i bel hevi tu olsem ol narapela long skul i tok bilas long em. Frédéric, em wanpela elda husat i stadi wantaim dispela boi, em i tok: “Mi tok amamas long Rico, long wanem, kain pasin birua olsem i kamapim klia olsem Rico i bin sanap strong na autim bilip bilong em.” Ol dispela tok i strongim tingting bilong Rico long sanap strong na bihainim stretpela pasin na pas gut moa wantaim papa bilong em. Rico i kisim baptais taim em i gat 12-pela krismas.

17. (a) Hau bai yumi inap kirapim ol brata long mekim wok bilong ol i kamap gutpela moa? (b) Wanpela misineri i mekim wanem bilong soim olsem em i tingim ol yangpela brata? Dispela i kamapim wanem gutpela samting?

¹⁷ Taim yumi tok amamas long ol wanbilip long ol i mekim gut asainmen bilong ol o ol i wok strong long mekim wanpela wok, dispela i save  kirapim ol long wok strong moa long mekim wok bilong Jehova. Sylvie a em wanpela sista i wok long Betel long Frans inap planti yia pinis, na em i tok olsem ol sista inap tok amamas long ol brata. Em i tok olsem ol meri inap pilim tru ol liklik samting o hatwok ol i luksave long en. Olsem na taim ol i “mekim tok bilong strongim ol narapela, dispela i wankain long tok bilong ol brata husat i mekim wok bilong God inap planti yia pinis.” Em i tok moa: “Mi pilim olsem pasin bilong mekim tok amamas em samting mi mas mekim.” (Snd. 3:27) Jérôme em wanpela brata i mekim wok misineri long Frens Giana, na em i helpim planti yangpela man long winim mak bilong mekim wok misineri. Em i tok: “Mi luksave olsem taim mi tok amamas long ol yangpela brata long sampela gutpela samting ol i mekim taim ol i autim tok o ol i bekim gut tok, dispela i save strongim ol. Dispela i save kirapim ol long mekim wok bilong ol i kamap gutpela moa.”

18. Wai na i gutpela long wok wantaim ol yangpela brata?

¹⁸ Taim yumi autim tok wantaim ol wanbilip, dispela tu inap kirapim ol long kamap strong moa long bilip. Elda inap askim yangpela brata husat i save long yusim kompiuta long prinim sampela tok long Web-Sait bilong yumi, na givim long ol lapun i no gat kompiuta na dispela inap strongim ol. O sapos yu mekim sampela wok long Haus Kingdom, i gutpela long singautim wanpela yangpela brata long wok wantaim yu. Taim yu mekim olsem, dispela bai opim rot long yu inap lukim wok bilong ol yangpela na tok amamas long ol, na lukim ol i kamap strong long bilip.​—Snd. 15:23.

19, 20. Wai na yumi mas helpim ol arapela long kamap strong moa?

¹⁹ Taim Jehova i makim Josua long kamap lida bilong lain Israel, Em i tokim Moses long “strongim tingting” bilong Josua. (Ritim Lo 3:28.) Long olgeta hap bilong graun, planti manmeri moa i wok long kam insait long kongrigesen. Ol elda inap helpim ol yangpela brata na ol brata i baptais nupela long mekim wok inap tru long skel bilong ol, na tu, olgeta Kristen husat i stap planti yia long tok i tru, ol tu inap givim helpim. Olsem na planti moa bai insait long fultaim sevis na “winim mak bilong skulim ol arapela.”​—2 Tim. 2:2.

²⁰ Maski sapos yumi stap long wanpela bikpela kongrigesen o wanpela liklik grup we i wok strong long kamap kongrigesen, yumi mas redi gut long samting bai kamap bihain. Nambawan rot em long bihainim pasin bilong Jehova, em Man husat i save tingim ol gutpela pasin bilong ol wokman bilong em.