Ol manmeri husat i save kisim hevi long smel bilong pefium, ol i hatwok long daunim dispela hevi, long wanem, long olgeta de ol i stap namel long ol manmeri husat i save putim pefium. Tasol sampela i laik save sapos i orait long ol bratasista i no ken putim pefium taim ol i go long ol miting Kristen na ol kibung.

Sapos yumi save long wanpela brata o sista husat i gat dispela hevi, yumi no inap pasim rot bilong em long i go long ol miting Kristen, long wanem, yumi olgeta i mas kisim ol gutpela tok i kamap long ol miting bilong strongim yumi. (Hib. 10:24, 25) Sapos wanpela Kristen i save kisim bikpela hevi tru long smel bilong pefium na dispela i pasim em long i go long ol miting, orait em i ken toktok wantaim ol elda long dispela samting. I no stret long putim lo long sait bilong putim pefium na go long miting bikos Baibel i no putim lo long dispela samting. Tasol ol elda i ken mekim sampela tok bilong helpim kongrigesen long luksave olsem sampela bratasista i gat hevi long strongpela smel bilong pefium. Ol elda yet i ken skelim na kisim ol tok i kamap long ol Wastaua na Kirap! na ol i ken stori long dispela samting. Long Miting Bilong Wok Autim Tok, ol i ken stori long dispela samting olsem tok bilong helpim kongrigesen, o ol i ken bihainim savetingting na mekim olsem wanpela toksave. Tasol ol elda i no inap mekim ol kain toksave olsem long olgeta taim. Long ol miting bilong yumi, olgeta taim i gat ol nupela man na ol bratasista i kam long ol narapela hap na ol i no save long dispela hevi, olsem na yumi laik mekim gut long ol na ol i ken pilim amamas. Yumi no ken toktok planti long ol bratasista husat i putim liklik pefium tasol, nogut ol i no amamas long i stap long miting.

Sapos i gat dispela kain hevi long kongrigesen, na sapos inap, orait ol elda i ken stretim rot na bai ol bratasista husat i gat dispela hevi, ol i ken sindaun long wanpela hap bilong Haus Kingdom we i stap longwe liklik long ol narapela. Ating ol i ken sindaun long rum we ol elda i save mekim miting long en na i gat rot long ol inap harim ol tok i kamap long miting. Sapos sampela i kisim hevi yet long pefium, orait kongrigesen i ken stretim rot bilong rekodim program bilong ol miting o ol i ken harim long rot bilong telefon, olsem sampela kongrigesen i save mekim bilong helpim sampela husat i sik o ol i lapun na ol i no inap lusim haus.

Insait long sampela yia i go pinis, Wok Kingdom Bilong Yumi i bin kirapim ol bratasista long tingim gut dispela samting taim ol i go long ol rijinel kibung. Long sampela hap, ol kibung i save kamap insait long ol bikpela haus i gat banis i raunim na win i no inap i go insait long en, olsem na ol i askim ol bratasista long yusim liklik pefium tasol. Ol bratasista i mas tingim gut dispela samting taim ol i go long ol rijinel kibung, long wanem, i hatwok long makim wanpela hap stret bilong ol lain i gat hevi long smel bilong pefium. Dispela tok i bin kamap olsem toksave tasol, olsem na i no stret long mekim dispela toksave i kamap olsem lo bilong kongrigesen.

Yumi olgeta i sinman, olsem na long dispela haptaim bilong nau, yumi olgeta i save karim pen na hevi. Yumi pilim tru pasin bilong ol bratasista taim ol i mekim sampela samting bilong helpim yumi long daunim hevi bilong yumi! Em tru olsem sampela bratasista i save amamas long putim pefium, olsem na ol bai hatwok long daunim laik bilong ol yet. Tasol pasin laikim inap kirapim yumi long mekim olsem.

Ol man bilong ritim Baibel i save long Pontius Pailat bikos em i kwestenim Jisas taim Jisas i sanap long kot, na em i tok orait long ol i kilim Jisas i dai. (Mat. 27:1, 2, 24-26) Tasol nem bilong em i stap tu long sampela narapela rait i stori long histori. Wanpela dikseneri (The Anchor Bible Dictionary) i tok, ol buk bilong histori i kolim nem bilong em na stori long em “planti taim moa, winim ol narapela man bilong Rom husat i bin i stap gavana bilong Judia.”

Nem bilong Pailat i kamap planti taim moa long ol rait bilong Josifas, em saveman bilong Juda. Josifas i raitim stori bilong 3-pela hevi i kamap taim Pailat i stap gavana bilong Judia. Filo, em narapela saveman bilong Juda, em i bin raitim stori bilong namba 4 hevi. Tasitus em wanpela saveman bilong Rom, na em i bin raitim stori bilong ol empera bilong Rom. Em tu i kamapim klia olsem Pontius Pailat i bin tok orait long ol i mas kilim Jisas i dai, na dispela samting i bin kamap long taim Taiberius i stap king.

Long 1961, sampela saveman i digim graun long hap bilong olpela haus bung bilong ol Rom long Sisaria, long Israel, na ol i painim hap ston i gat nem bilong Pailat long tok Latin. Sampela hap bilong dispela rait (olsem i stap long piksa) i bruk, tasol ol saveman i ting dispela rait i tok: “Pontius Pailat, Nambawan Gavana bilong Judia, em i dediketim haus Tiberium long ol god i gat biknem.” Ating dispela haus bung em wanpela tempel bilong litimapim nem bilong Empera Taiberius bilong Rom.

Wanpela atikol aninit long het tok, “Askim,” long Wastaua bilong Julai 15, 2002 i tok, sista i mas karamapim het sapos em i mekim Baibel stadi na wanpela brata i stap, maski em brata i baptais pinis o em i pablisa i no baptais yet. Tasol ol brata i skelim gen dispela samting na i gat sampela senis.

Sapos dispela brata i baptais pinis, orait sista i mas karamapim het. Taim sista i mekim olsem, em i soim olsem em i rispektim ol man em Jehova i makim ol long mekim wok bos insait long kongrigesen Kristen, long wanem, sista i mekim wok bilong ol brata. (1 Kor. 11:5, 6, 10) Sista i ken askim brata long mekim stadi sapos brata i winim mak na em inap long lukautim stadi.

Tasol sapos dispela brata i no baptais yet na em i no man bilong sista, na em i go wantaim sista long lukim Baibel sumatin husat i stadi inap longpela taim nau, orait i no gat nid long sista i karamapim het. Tasol maus bilong bel inap kirapim sampela sista long karamapim laplap long het long dispela taim tu.