Bai yu bekim olsem wanem sapos wanpela i askim yu, “Yu laik i stap laip oltaim?” Ating planti man bai i tok ol i laik stap oltaim, tasol ol i ting em i driman nating. Na sampela i tok, yumi bilong i stap sotpela haptaim na bihain yumi dai.

Tasol olsem wanem sapos wanpela i askim yu, “Yu laik dai?” Taim man i no gat hevi, em bai tok em i amamas long stap laip. Dispela i kamapim klia wanem samting? Olsem maski yumi bungim ol traim na hevi, yumi olgeta i gat laik long i stap laip. Baibel i kamapim olsem taim God i wokim yumi em i putim laik bilong i stap laip oltaim long yumi. Em i tok: “Em [God] i putim tingting bilong laip i stap oltaim long bel bilong ol man.”—Saveman 3:11, NW.

Tasol yumi save olsem yumi ol man i no save stap oltaim. Bilong wanem i olsem? Olsem wanem God i painim rot bilong stretim dispela hevi? Baibel i kamapim ol gutpela bekim, na dispela i helpim yumi long save long risen na Jisas i karim hevi na i dai.

Sapta 1 i go sapta 3 bilong buk Stat long Baibel i tok, God i wokim Adam na Iv, em fes man na meri na Em i tokim ol olsem ol bai stap laip oltaim sapos ol i bihainim laik bilong Em. Tasol Baibel i tok ol i sakim tok bilong God, olsem na ol i no kisim ol blesing em God i bin tok promis long en. Baibel i no stori long olgeta samting i kamap long dispela taim, olsem na sampela i ting em stori tumbuna nating. Tasol buk Stat i wankain long ol Gutnius, em i stori long ol samting tru i bin kamap long i stap bilong ol man long bipo. *

Wanem samting i kamap taim Adam i sakim tok bilong God? Baibel i tok: “Long rot bilong wanpela man [Adam] tasol sin i kamap long graun. Na sin i bringim dai i kam. Na long dispela rot dai i painim olgeta manmeri, long wanem, olgeta i bin mekim sin.” (Rom 5:12) Adam i sakim tok bilong God na long dispela rot sin i kamap. Olsem na em i stap sotpela haptaim tasol na bihain em i dai. Yumi ol tumbuna pikinini bilong Adam tu i gat sin, olsem na yumi save sik, go lapun, na yumi dai. Dispela tok i wanbel wantaim tingting bilong saiens olsem DNA i mekim na ol pikinini i save kisim lukluk na sampela pasin bilong papamama.  Tasol olsem wanem? God i painim narapela rot bilong stretim dispela hevi?

God i stretim rot bilong kisim bek ol tumbuna pikinini bilong Adam na bai ol i ken kisim samting em tumbuna papa bilong ol i bin lus long kisim, em laip oltaim long graun. God i mekim olsem long wanem rot?

Long Rom 6:23, Baibel i tok: “Pe bilong sin em dai.” Olsem na taim Adam i mekim sin, em i dai. Olsem tasol yumi tu i mekim sin na yumi save dai. Taim yumi bon, yumi gat sin pinis, maski yumi no kamapim dispela hevi. Olsem na God i gat pasin laikim na em i salim Pikinini bilong em Jisas i kam givim “pe bilong sin” bilong baim bek yumi. Bilong wanem dispela pe i stret?

Tingim, Adam em man i gutpela olgeta, tasol em i kisim sin na dai, long wanem, em i sakim tok bilong God. Olsem na i mas i gat wanpela man i gutpela olgeta husat i bihainim tok bilong God i go inap long taim em i dai bilong baim bek yumi long sin. Baibel i tok: “Wanpela man i bin sakim tok na long dispela pasin planti manmeri i kamap sinman. Olsem tasol, wanpela man i bin bihainim tok, na long dispela pasin planti manmeri i kamap stretpela manmeri.” (Rom 5:19) Jisas em dispela “wanpela man.” Em i lusim heven na i kam long graun olsem man i gutpela olgeta *, na em i dai bilong baim bek yumi. Na long dispela rot, God i kolim yumi stretpela manmeri na yumi inap long kisim laip oltaim long bihain.

Wai na Jisas i karim hevi na i dai bilong baim bek yumi long sin? Bilong wanem God i Gat Olgeta Strong i no larim ol tumbuna pikinini bilong Adam long i stap laip oltaim? Em inap mekim olsem, tasol dispela bai brukim lo em i bin putim olsem, pe bilong sin em dai. God i no inap long senisim dispela lo o rausim lo na bai em i stretim dispela hevi, nogat. Long wanem, God i save laikim stretpela pasin.—Song 37:28.

Sapos God i no bihainim stretpela pasin long stretim dispela hevi, ating ol man bai ting Em bai bihainim wankain pasin taim ol narapela hevi i kamap. Ol bai tok, God inap long bihainim pasin  fea bilong skelim husat long ol tumbuna pikinini bilong Adam inap long kisim laip oltaim? Ol man inap long trastim God olsem em bai truim ol tok promis bilong em o nogat? God i bihainim stretpela pasin long dispela samting bilong kisim bek yumi, na dispela i strongim bilip bilong yumi olsem oltaim em bai mekim stretpela pasin.

Long rot bilong dai bilong Jisas, God i opim rot long ol man inap long kisim laip oltaim long Paradais long graun. Tingim tok bilong Jisas long Jon 3:16 olsem: “God i laikim tumas olgeta manmeri bilong graun, olsem na em i givim dispela Pikinini tru bilong en long ol bai olgeta man husat i bilip long em ol inap abrusim bagarap na kisim laip oltaim.” Dai bilong Jisas i kamapim klia pasin laikim na stretpela pasin bilong God.

Tasol bilong wanem Jisas i karim hevi na dai olsem ol Gutnius i kamapim? Taim Jisas i stap strong long bilip na daunim em yet na karim ol hevi, em i kamapim klia olsem tok bilong Satan olsem ol man i no inap stap gut long God taim hevi i painim ol, dispela em tok giaman. (Jop 2:4, 5) Ating dispela tok i tru taim Satan i pulim Adam long mekim sin. Tasol Jisas i gutpela olgeta wankain olsem Adam, na em i bin stap gut long God maski em i karim ol bikpela hevi. (1 Korin 15:45) Na dispela i kamapim klia olsem Adam tu inap long bihainim tok bilong God. Taim Jisas i winim ol bikpela hevi, em i stap gutpela eksampel em yumi inap long bihainim. (1 Pita 2:21) God i givim gutpela pe long Pikinini bilong em Jisas, dispela pe em laip oltaim long heven.

Yumi inap bilip tru olsem Jisas i bin dai, na dispela i opim rot long yumi inap long i stap oltaim. Olsem wanem? Yu laik i stap oltaim? Jisas i tokim yumi long samting yumi mas mekim bilong kisim laip oltaim. Em i tok: “Bilong kisim laip oltaim, ol i mas kisim save long yu, yu wanpela tasol yu God tru, na ol i mas kisim save long man yu bin salim i kam, em Jisas Krais.”—Jon 17:3.

Ol lain i wokim dispela nius i laik helpim yu long kisim sampela save moa long Jehova, em trupela God na long Pikinini bilong em, Jisas Krais. Ol Witnes Bilong Jehova long hap yu stap long en bai amamas long helpim yu. Yu inap kisim sampela save moa long Web-sait bilong mipela, em www.mr1310.com/tpi.