Mining bilong pilim tru hevi em “yu inap pilim tingting na ol samting i painim narapela man na yu piksaim olsem ol dispela samting i kamap long yu.” Saveman bilong helt, em Dokta Rick Hanson i tok: “Pasin bilong pilim tru hevi i stap long bun bilong yumi.”

TINGIM: Bilong wanem yumi inap kamapim olsem yumi pilim tru hevi bilong narapela, em pasin ol narapela samting i gat laip i no inap kamapim? Baibel i tok God i wokim ol man i kamap wankain olsem em yet. (Stat 1:26) God i wokim yumi wankain olsem em yet na yumi inap kamapim ol pasin bilong em. Olsem na pasin bilong pilim tru hevi i kirapim ol man i gat pasin bilong lukautim na helpim ol narapela long kamapim pasin bilong Krieta bilong ol husat i save pilim tru hevi, em God Jehova.—Sindaun 14:31.

God i save pilim tru hevi bilong yumi na em i no laik lukim yumi karim pen na hevi. Lain Israel bilong bipo i karim hevi long wok sleiv aninit long Isip inap 40 yia long ples drai nating. Baibel i tok: “Long taim ol i karim pen na hevi, Bikpela tu i bin karim pen na hevi wantaim ol.” (Aisaia 63:9) Tingim olsem God i pilim tru hevi bilong ol. Em i tok: “Mi save tru long pen na hevi ol i karim.” (Kisim Bek 3:7) God i tok: “Sapos wanpela man i laik bagarapim yupela, em bai i bagarapim em yet.” (Sekaraia 2:8) Taim ol narapela i mekim nogut long yumi, God i bel hevi wantaim yumi.

Maski yumi pilim olsem yumi no gutpela na God bai pilim tru hevi bilong yumi, Baibel i tok “God i winim tru bel bilong yumi na em i save long olgeta samting.” (1 Jon 3:19, 20) God i save gut long yumi winim yumi yet. Em i save long olgeta samting i kamap, tingting, na filings bilong yumi. Em i pilim tru ol samting i painim yumi.

 Baibel i tokim yumi

• “Taim yupela i beten na singaut long mi, bai mi Bikpela, mi harim prea bilong yupela. Na bai yupela i save, mi stap wantaim yupela.”—AISAIA 58:9.

• “Mi Bikpela, mi tingim pinis ol samting mi laik mekim bilong helpim yupela. Mi laik mekim gut long yupela. Mi no laik mekim nogut long yupela. Yupela i ken tingim ol dispela samting mi laik mekim, na yupela i ken wetim dispela taim i kamap. Long dispela taim bai yupela i kam klostu long mi na singaut long mi na beten long mi, na bai mi harim beten bilong yupela.”—JEREMAIA 29:11, 12.

• “Mi karim hevi na mi pilim nogut tru long en, na mi krai i stap. Orait yu tingting yet long dispela, na yu raitim pinis long buk bilong yu.”—SONG 56:8.

Taim yumi save olsem God i pilim tru hevi bilong yumi, olsem wanem dispela i helpim yumi long karim ol hevi? Skelim stori bilong Maria.

“Mi pilim olsem laip i hatwok na ol samting nogut tasol i kamap taim mi bel hevi tru long pikinini man bilong mi husat i gat 18 krismas i dai bihain long em i karim hevi bilong sik kensa inap 2-pela yia. Mi belhat olsem Jehova i no helpim na pinisim sik bilong em!

“Sikspela yia bihain, wanpela pren long kongrigesen husat i gat pasin laikim na pasin sori i putim yau taim mi kamapim tingting bilong mi olsem Jehova i no laikim mi. Bihain long sampela aua, em i kamapim tok bilong wanpela ves na dispela i strongim mi.Em long 1 Jon 3:19, 20, em i tok: ‘God i winim tru bel bilong yumi na em i save long olgeta samting.’ Em i tok Jehova i save gut long bel hevi bilong yumi.

“Maski i olsem, mi belhat yet! Bihain mi ritim Song 94:19, em i tok: ‘Taim mi bel hevi na mi tingting planti long ol samting, yu save mekim bel bilong mi i stap isi na yu mekim mi i amamas.’ Mi pilim olsem ol i raitim dispela ves long mi stret! Nau mi kisim bel isi long mi inap kamapim bel hevi bilong mi long Jehova, mi save olsem em i harim na em i save gut long ol samting.”

Em gutpela long save olsem God i save gut na em i pilim hevi bilong yumi! Sapos olsem, bilong wanem i gat planti pen na hevi? Ol dispela samting i kamap bikos God i panisim yumi long ol popaia bilong yumi? God bai mekim sampela samting bilong pinisim pen na hevi? Bai yumi stori long ol dispela samting long ol atikol i kamap bihain.