God i tok promis long profet Abraham olsem wanpela tumbuna pikinini bilong em bai bringim blesing long “olgeta lain bilong graun.” (Stat 22:18) Dispela tumbuna pikinini em husat?

Klostu 2,000 yia i go pinis, God i givim strong long Jisas, em wanpela bilong ol tumbuna pikinini bilong Abraham, long wokim ol strongpela mirakel. Ol dispela mirakel i kamapim klia olsem tok promis God i mekim long Abraham long olgeta lain bai kisim blesing bai kamap long rot bilong Jisas.—Galesia 3:14.

Ol mirakel Jisas i mekim i kamapim klia olsem em i dispela man God i bin makim bilong blesim olgeta man, na tu, i kamapim klia hau God bai yusim em long blesim ol man inap oltaim oltaim. Luksave long hau ol mirakel bilong Jisas i kamapim ol gutpela pasin bilong em.

Pasin isi—Jisas i oraitim ol sikman.

Wanpela taim, wanpela lepraman i askim Jisas long oraitim em. Jisas i tatsim em na tok: “Mi laik!” Wantu, sik lepra i lusim em.—Mak 1:40-42.

Pasin bilong givim—Jisas i givim kaikai long ol man i hangre.

Jisas i no laik larim ol man i go wantaim hangre. Tupela taim, long rot bilong mirakel em i mekim sampela bret na liklik pis i kamap planti na givim long planti tausen manmeri. (Matyu 14:17-21; 15:32-38) Bihain long ol i kaikai, olgeta i pulap na planti kaikai i stap yet.

Pasin sori—Jisas i kirapim bek ol man i dai pinis.

Jisas i “sori tru” na em i kirapim bek wanpela pikinini man tasol bilong wido meri husat i krai sori na i no gat narapela long lukautim em.—Luk 7:12-15.