1. Yu pilim olsem wanem long tok i tru?

 LAIN bilong Jehova i laikim tok i tru i stap long Baibel. Tok i tru em i as bilong ol samting yumi bilip long en. (Rom 10:17) Yumi bilip olsem Jehova i kamapim kongrigesen Kristen olsem “strongpela pos na helpim bilong tok i tru.” (1 Tim. 3:15) Na yumi amamas long daun long “ol man i go pas” long yumi taim ol i eksplenim tok i tru bilong Baibel na ol i givim yumi daireksen i stret wantaim laik bilong God.—Hib. 13:17.

2. Olsem Jems 5:19 i kamapim, wanem samting inap painim yumi bihain long yumi lainim tok i tru?

² Em tru olsem yumi kisim save na bihainim tok i tru na yumi luksave long wok em oganaisesen bilong God i mekim bilong stiaim gut yumi, maski i olsem yumi inap lusim tok i tru. (Ritim Jems 5:19.) Satan i laik tru long mekim ol samting bilong daunim pasin bilong yumi long bilip long tok bilong Baibel o long daireksen yumi kisim long oganaisesen bilong God.—Efe. 4:14.

3. Wai na yumi mas holim strong tok i tru? (Efesus 6:​13, 14)

³ Ritim Efesus 6:​13, 14. Klostu nau Satan bai yusim ol bikpela tok giaman bilong paulim ol lain manmeri bilong olgeta kantri na bai ol i birua long Jehova. (Rev. 16:​13, 14) Na yumi save tu olsem Satan bai wok strong tru long giamanim ol manmeri bilong Jehova. (Rev. 12:9) Olsem na em i bikpela samting long yumi mas skulim yumi yet long luksave long hau tok i tru i no wankain long ol tok giaman, na tu, yumi mas bihainim tok i tru. (Rom 6:17; 1 Pita 1:22) Em i bikpela samting long yumi mas mekim olsem bilong yumi ken abrusim bagarap long taim bilong traipela hevi tru!

4. Yumi bai stori long wanem samting long dispela atikol?

⁴ Long dispela atikol, yumi bai stori long tupela pasin yumi mas kisim bilong helpim yumi long luksave long tok i tru bilong Baibel na long bihainim daireksen i kam long oganaisesen bilong God. Na bihain yumi bai stori long tripela samting yumi  ken mekim bilong helpim yumi long wok yet long holim strong tok i tru.

OL PASIN YUMI MAS I GAT BILONG LUKSAVE LONG TOK I TRU

5. Olsem wanem pasin bilong pret long Jehova i helpim yumi long luksave long tok i tru?

⁵ Pret long Jehova. Taim yumi kisim pasin bilong pret long Jehova, dispela i makim olsem yumi laikim em tru na yumi no laik mekim wanpela samting bilong mekim em i bel hevi. Yumi laik tru long kisim save long wanem samting i stret na wanem samting i no stret na wanem ol tok i tru na wanem ol tok i giaman, na bai Jehova i ken orait long yumi. (Prov. 2:​3-6; Hib. 5:14) Yumi no ken tru larim pasin bilong pret long ol man i daunim pasin bilong yumi long laikim Jehova, long wanem, planti taim ol samting ol man i amamas long en em ol samting Jehova i no save amamas long en.

6. Olsem wanem pasin bilong pret long ol man i mekim na tenpela hetman bilong lain Israel i paulim tok tru?

⁶ Sapos pasin bilong yumi long pret long ol man i winim pasin bilong yumi long pret long God, dispela inap pulim yumi i go longwe long tok i tru. Tingim eksampel bilong dispela 12-pela hetman em ol i go lukstil long graun em Jehova i tok promis long givim long lain Israel. Namel long ol dispela hetman, tenpela bilong ol i pret moa long lain Kenan winim pasin bilong ol long laikim Jehova. Ol i tokim lain Israel olsem: “Nogat tru, yumi no inap pait wantaim ol dispela manmeri, long wanem, ol i strong moa winim yumi.” (Nam. 13:​27-31) Long tingting bilong ol, lain Kenan i gat bikpela strong moa winim lain Israel, na dispela em i tru. Tasol taim dispela tenpela man bilong lukstil i tok olsem lain Israel i no inap daunim ol birua bilong ol, dispela i soim olsem ol i no bilip long Jehova. I gutpela moa ol i putim tingting i go long samting Jehova i laik bai lain Israel i mekim. Na tu, i gutpela long ol i tingim tingim long bel ol samting Jehova i mekim bilong helpim ol i no longtaim i go pinis. Sapos ol i bin mekim olsem, orait ol bai luksave  olsem Jehova em i God i Gat Olgeta Strong na strong bilong em i winim tru strong bilong lain Kenan. Josua na Kalep i no laik bihainim pasin bilong dispela tenpela man em ol i no gat bilip, tupela i laik bai Jehova i orait long ol. Tupela i tokim ol manmeri olsem: “Sapos Jehova i amamas long yumi, em bai kisim yumi i go long dispela graun na givim yumi.”—Nam. 14:​6-9.

7. Hau yumi ken strongim pasin bilong yumi long pret long Jehova? (Lukim tu piksa.)

⁷ Bilong strongim pasin bilong yumi long pret long Jehova, yumi mas wok strong long amamasim em long olgeta disisen yumi mekim. (Sng. 16:8) Taim yu ritim ol stori long Baibel, yu ken askim yu yet olsem, ‘Sapos dispela samting i bin kamap long mi, mi bai mekim wanem disisen?’ Olsem, piksaim long tingting olsem yu wok long putim yau i stap taim tenpela hetman bilong lain Israel i givim ripot nogut long ol manmeri. Olsem wanem? Yu bai bilipim dispela ripot na larim pasin bilong pret long ol man i daunim bilip bilong yu? O yu bai larim pasin bilong yu long laikim Jehova na tingting strong long amamasim em i strong moa winim pasin bilong yu long pret? Bikpela lain manmeri bilong Israel i no luksave long tok tru em Josua na Kalep i bin tokim ol long en. Em as na God i no larim ol dispela lain long i go insait long Graun Bilong Promis.—Nam. 14:​10, 22, 23.

8. Yumi mas wok strong long kisim wanem pasin, na bilong wanem?

⁸ Pasin daun. Jehova i save kamapim klia tok i tru long ol man i gat pasin daun. (Mat. 11:25) Yumi bin daunim yumi yet na larim ol narapela i helpim yumi long kisim save long tok i tru. (Apo. 8:​30, 31) Tasol yumi mas was gut olsem yumi no ken kisim pasin antap. Sapos yumi gat pasin antap, dispela inap mekim yumi ting olsem ol tingting bilong yumi yet i stret na i wankain long ol stiatok bilong Baibel na daireksen i kam long oganaisesen bilong Jehova.

9. Olsem wanem yumi ken mekim yet pasin daun?

⁹ Bilong yumi ken mekim yet pasin daun, yumi mas tingim olsem yumi liklik samting tru taim yumi skelim yumi yet wantaim Jehova. (Sng. 8:​3, 4) Na tu, yumi ken beten askim God long helpim yumi long kisim pasin daun na pasin bilong redi long kisim skul long ol narapela. Jehova i save kamapim tingting bilong em long rot bilong Baibel na oganaisesen bilong em, na em bai helpim yumi long putim tingting bilong em i stap bikpela samting moa winim tingting bilong yumi yet. Taim yu ritim Baibel, luksave long ol poin i soim olsem Jehova i save laikim man i gat pasin daun na em i heitim man i gat pasin antap, pasin bilong tingim em yet, na bikhetpasin. Na wok strong long mekim yet pasin daun taim yu kisim wanpela asainmen o wok i gat namba.

HAU YUMI KEN HOLIM STRONG TOK I TRU

10. Jehova i yusim husat lain long givim instraksen na daireksen long lain bilong em?

¹⁰ Wok yet long trastim daireksen i kam long oganaisesen bilong Jehova. Long Israel bilong bipo, Jehova i bin yusim Moses na bihain Josua long givim ol instraksen long lain bilong Em. (Jos. 1:​16, 17) Lain Israel i stap gut taim ol i tingim olsem God Jehova i bin makim ol dispela man long stap olsem ol mausman bilong em. Planti handret yia bihain taim ol i kamapim kongrigesen Kristen, 12-pela aposel i givim daireksen long ol Kristen. (Apo. 8:​14, 15) Na bihain, ol narapela elda long Jerusalem i insait tu long dispela grup em ol i save givim daireksen long ol Kristen. Taim ol Kristen i bihainim ol stiatok ol i kisim long ol dispela bilipman, “ol kongrigesen i kamap strong moa long bilip, na long olgeta de ol i wok long i go bikpela.” (Apo. 16:​4, 5) Long nau, yumi tu i kisim ol blesing  taim yumi bihainim tiokratik daireksen i kam long oganaisesen bilong Jehova. Tasol Jehova bai pilim olsem wanem sapos yumi no laik daun long ol man em i makim long i go pas long yumi? Yumi ken kisim bekim bilong dispela askim taim yumi skelim samting i bin kamap long lain Israel taim ol i laik i go insait long Graun Bilong Promis.

11. Wanem samting i kamap long lain Israel bilong bipo em ol i salensim disisen God i mekim long makim Moses olsem man i go pas long ol? (Lukim tu piksa.)

¹¹ Taim lain Israel i wok long i go long Graun Bilong Promis, wanpela taim ol man i gat nem i salensim Moses na wok Jehova i bin givim long em. Ol i tok: “Yumi olgeta manmeri [na i no Moses tasol] i holi na Jehova i stap namel long yumi.” (Nam. 16:​1-3) Em tru olsem long ai bilong God “olgeta manmeri” i holi, tasol Jehova i bin makim Moses long lidim ol manmeri bilong Em. (Nam. 16:28) Taim ol dispela bikhetlain i sutim tok long Moses, tru tru ol i wok long sutim tok long Jehova. Ol i no tingim samting Jehova i laik mekim, ol i tingim samting ol yet i laikim—ol i laik kisim bikpela nem na namba. God i kilim i dai ol lida bilong ol dispela bikhetlain, na tu, planti tausen manmeri em ol i bin sanap long sait bilong ol. (Nam. 16:​30-35, 41, 49) Long nau yumi ken save tru olsem Jehova i no save amamas long ol man em ol i no rispektim ol arensmen em oganaisesen bilong em i kamapim.

12. Wai na yumi ken wok yet long bilip long oganaisesen bilong Jehova?

¹² Yumi ken wok yet long bilip long oganaisesen bilong Jehova. Taim ol brata i go pas long yumi i luksave olsem i stret long mekim ol senis long save yumi gat long wanpela tok i tru bilong Baibel o long hau yumi oganaisim wok bilong Kingdom, ol i no save surik long mekim ol dispela senis. (Prov. 4:18) Nambawan risen na ol i mekim olsem em bikos ol i laik amamasim Jehova. Na tu, ol i wok strong long mekim ol disisen i stret wantaim Tok Bilong God, em astingting bilong ol tok em olgeta manmeri bilong Jehova i mas bihainim.

13. “Astingting bilong ol gutpela tok” i makim wanem, na yumi mas mekim wanem long en?

 ¹³ “Bihainim yet astingting bilong ol gutpela tok.” (2 Tim. 1:13) “Astingting bilong ol gutpela tok” i makim ol bikpela tok bilong Baibel em olgeta Kristen i mas save na bilip long en. (Jon 17:17) Ol dispela bikpela tok ol i faundesen bilong olgeta samting yumi bilip long en. Oganaisesen bilong Jehova i skulim yumi long holimpas yet tok i tru i stret wantaim dispela astingting. Taim yumi mekim olsem, yumi bai kisim blesing.

14. Sampela Kristen i bin mekim wanem na ol i no wok yet long bihainim “astingting bilong ol gutpela tok”?

¹⁴ Wanem samting inap kamap sapos yumi no wok yet long bihainim “astingting bilong ol gutpela tok”? Tingim wanpela eksampel. Long taim bilong ol aposel, wanpela tokwin i raun namel long ol Kristen olsem de bilong Jehova i kamap pinis. Ating i gat wanpela pas em aposel Pol i bin raitim na dispela i mekim na ol Kristen i kisim kain tingting olsem. Sampela Kristen long Tesalonaika i no lusim haptaim long skelim gut dispela tok olsem em i tru o nogat, na ol i bilipim dispela tokwin na ol i karim tu dispela tok i go long ol narapela. Dispela tokwin i no inap paulim tingting bilong ol sapos ol i tingim yet ol tok em Pol i bin skulim ol long en taim em i stap wantaim ol. (2 Tes. 2:​1-5) Pol i givim tok kaunsel long ol Kristen olsem ol i no ken bilipim olgeta tok ol i harim. Na bilong helpim ol long bihain, Pol i pinisim namba 2 pas bilong em long ol Tesalonaika wantaim ol dispela tok olsem: “Mi Pol, mi raitim dispela gude long han bilong mi yet. Em i olsem mak long olgeta pas bilong mi, dispela em i pasin bilong mi long raitim pas.”—2 Tes. 3:17.

15. Olsem wanem yumi ken lukautim yumi yet long ol tok giaman i luk olsem ol i tok tru? Stori long wanpela eksampel. (Lukim tu ol piksa.)

¹⁵ Yumi inap kisim wanem skul long tok Pol i mekim long ol Tesalonaika? Taim yumi harim wanpela stori we i no stret wantaim ol tok em yumi bin lainim long Baibel o yumi harim wanpela stori i narakain tru, yumi mas bihainim pasin bilong skelim gut tingting. Long Soviet Yunion bilong pastaim, ol birua bilong yumi i bin givim wanpela pas long ol brata na i luk olsem  dispela pas i kam long wol hetkota bilong yumi. Dispela pas i kirapim sampela brata long kamapim wanpela narapela oganaisesen bilong ol yet. I luk olsem ol tok bilong dispela pas ol i tok tru. Tasol ol brata i gat strongpela bilip, ol i no larim ol tok bilong dispela pas i paulim tingting bilong ol. Ol i luksave olsem ol tok bilong dispela pas i no stret wantaim ol tok em ol i bin kisim save pinis long en. Long nau, sampela taim ol birua bilong tok i tru i save yusim ol samting olsem Intenet na sosel midia bilong paulim tok i tru na brukim lain namel long yumi. Tasol yumi “no ken larim gutpela tingting bilong [yumi] i paul hariap,” nogat, yumi ken lukautim yumi yet long rot bilong skelim gut ol tok yumi harim o ritim olsem ol i stret wantaim ol tok i tru yumi bin kisim save pinis long en, o nogat.—2 Tes. 2:2; 1 Jon 4:1.

16. Olsem Rom 16:​17, 18 i kamapim, yumi mas mekim wanem sapos sampela i lusim tok i tru?

¹⁶ Wok yet long stap wanbel wantaim ol lain i stap gut long Jehova. God i laik bai yumi stap wanbel wantaim long lotuim em. Yumi bai wok yet long stap wanbel wantaim sapos yumi holimpas yet tok i tru. Ol lain em ol i lusim tok i tru, ol i brukim lain insait long kongrigesen, olsem na God i tok lukaut long yumi mas i “stap longwe long ol dispela man.” Sapos yumi no was gut, isi isi yumi tu inap lusim tok i tru.—Ritim Rom 16:​17, 18.

17. Wanem gutpela samting i kamap taim yumi luksave long tok i tru na holim strong?

¹⁷ Taim yumi luksave long tok i tru na yumi holim strong, yumi bai pas gut yet wantaim Jehova na bilip bilong yumi bai stap strong yet. (Efe. 4:​15, 16) Yumi bai sakim ol bilip giaman na ol tok giaman em Satan i kamapim, na yumi bai stap gut aninit long lukaut bilong Jehova long taim bilong traipela hevi tru. Olsem na wok yet long holim strong tok i tru, “na God bilong bel isi bai stap wantaim yupela.”—Fili. 4:​8, 9.