1. Olsem wanem yumi inap bihainim pasin bilong Papa bilong yumi, Jehova?

JEHOVA i laikim tru yumi. (Jon 3:16) Yumi laik bihainim pasin bilong Papa bilong yumi. Olsem na yumi mas “pilim hevi bilong narapela, laikim tumas ol brata, sori tru long ol,” na yumi mas soim moa yet ol dispela pasin long “ol wanbilip.” (1 Pita 3:8; Gal. 6:10) Yumi mas helpim ol wanbilip taim hevi i painim ol.

2. Long dispela atikol, yumi bai stori long wanem samting?

² Hevi bai painim olgeta manmeri husat i laik stap insait long lain famili bilong Jehova. (Mak 10:29, 30) Yumi bai karim planti hevi moa bikos pinis bilong haptaim nogut bilong nau i kam klostu. Olsem wanem yumi inap helpim narapela narapela? Yumi ken stori long skul yumi inap kisim long stori bilong Lot, Jop, na Naomi. Yumi bai stori tu long sampela hevi ol bratasista i karim long nau, na olsem wanem yumi inap helpim ol long sanap strong na karim ol dispela hevi.

3. (a) Olsem 2 Pita 2:7, 8 i tok, Lot i mekim wanem rong disisen? (b) Wanem samting i painim Lot na famili taim ol i go stap long taun Sodom?

³ Lot i mekim rong disisen taim em i go stap namel long ol manmeri bilong Sodom em ol i mekim ol pasin pamuk i nogut tru. (Ritim 2 Pita 2:7, 8.) Ol manmeri long Sodom i gat gutpela sindaun, tasol Lot i bungim planti hevi taim em i go stap long dispela hap. (Stt. 13:8-13; 14:12) Ating meri bilong Lot i laikim tumas taun Sodom o sampela manmeri long dispela taun, olsem na em i sakim tok bilong Jehova. Long dispela  risen, em i dai taim God i yusim paia na salfa long bagarapim dispela taun. Tingim 2-pela pikinini meri bilong Lot. Tupela i tok promis pinis long maritim 2-pela man bilong lain Sodom, tasol dispela 2-pela man i dai. Lot i bel hevi taim em i lusim haus na mani kago, tasol em i bel hevi moa yet taim meri bilong em i dai. (Stt. 19:12-14, 17, 26) Long dispela taim bilong hevi, yu ting Jehova i givap long Lot? Nogat.

4. Olsem wanem Jehova i soim olsem em i no les kwik long Lot? (Lukim fran pes piksa.)

⁴ Lot i laik stap long Sodom, tasol Jehova i sori long em na salim ol ensel i go bilong helpim em na famili bilong em long lusim taun. Tasol Lot i no hariap long bihainim tok bilong ol ensel long lusim taun, nogat, em i “wok long isi isi.” Olsem na ol ensel i holim han bilong em na helpim em na famili bilong em long ranawe lusim taun. (Stt. 19:15, 16) Ol ensel i tokim em long ranawe i go long ol ples maunten. Tasol em i no bihainim tok, na em i askim Jehova sapos em inap i go long wanpela liklik taun i stap klostu. (Stt. 19:17-20) Jehova i harim tok bilong Lot na larim em i go long dispela taun. Bihain Lot i pret long stap long dispela taun, olsem na em i go stap long ol ples maunten, em hap we pastaim Jehova i tokim em long i go long en. (Stt. 19:30) Jehova i soim klia tru olsem em i no les kwik long Lot! Olsem wanem yumi inap bihainim pasin bilong em?

5-6. Olsem wanem yumi inap bihainim tok i stap long 1 Tesalonaika 5:14?

⁵ Wankain olsem Lot, wanpela wanbilip inap mekim rong disisen na bikpela hevi inap painim em. Sapos kain samting olsem i kamap, yumi bai mekim wanem? Ating yumi laik tokim em olsem em i karim hevi long disisen em yet i bin mekim, na dispela em tru. (Gal. 6:7) Tasol mobeta yumi no mekim kain tok olsem. Yumi ken helpim wanbilip wankain olsem Jehova i bin helpim Lot. Yumi ken mekim wanem?

⁶ Jehova i salim ol ensel bilong givim tok lukaut long Lot, na tu, bilong helpim em long abrusim bagarap bai painim Sodom. Olsem tasol, yumi ken givim tok lukaut long wanbilip sapos yumi luksave olsem disisen bilong em inap kamapim hevi. Na tu, yumi inap helpim em. Maski sapos em i no bihainim kwik ol tok kaunsel bilong Baibel em i kisim, yumi no ken les kwik. Bihainim pasin bilong 2-pela ensel. Yumi no ken givap na lusim wanbilip, nogat, yumi mas painim sampela rot long helpim em. (1 Jon 3:18) Ating yumi ken stiaim em long bihainim edvais em i kisim; i olsem yumi holim han bilong em na strongim em long wokabaut.—Ritim 1 Tesalonaika 5:14.

7. Olsem wanem yumi inap holim wankain tingting olsem Jehova i mekim long Lot?

⁷ Jehova inap tingim ol popaia bilong Lot, tasol em i no mekim olsem, nogat. Em i kirapim aposel Pita long kolim Lot olsem stretpela man. Yumi amamas tru olsem Jehova i no save tingim ol rong bilong yumi! (Sng. 130:3) Olsem wanem? Yumi inap holim wankain tingting olsem Jehova i mekim long Lot? Sapos yumi tingim tingim gutpela pasin bilong ol wanbilip, yumi no inap les kwik long ol. Dispela bai kirapim ol long bihainim edvais yumi givim long ol.

8. Pasin sori bai kirapim yumi long mekim wanem?

⁸ Lot i bin mekim rong disisen, olsem na em i karim hevi, tasol Jop i no bin mekim rong disisen. Maski i olsem, bikpela hevi tru i painim Jop na em i lusim mani kago, biknem em i holim long komiuniti, na  gutpela helt bilong em i bagarap. Tasol samting i nogut moa em olsem, olgeta pikinini bilong em i dai. Na tu, 3-pela giaman pren bilong Jop i sutim tok long em. Wai na 3-pela pren bilong Jop i no sori long em? Ol i no kliagut long hevi bilong em. Olsem na ol i holim tingting kranki na hariap long skelim Jop. Olsem wanem yumi inap abrusim dispela pasin kranki? Yumi mas luksave olsem Jehova tasol i save long ol risen tru na hevi i painim man. Putim yau long man i karim hevi. Harim gut ol tok em i mekim na pilim hevi bilong em. Long dispela rot tasol, yu inap pilim tru hevi bilong ol wanbilip.

9. Pasin sori bai pasim yumi long mekim wanem? Bilong wanem?

⁹ Pasin sori bai pasim yumi long tok baksait long hevi bilong ol narapela. Man bilong tok baksait i no save helpim kongrigesen long pas gut wantaim, nogat, em i save brukim kongrigesen. (Prov. 20:19; Rom 14:19) Em i no save tingting gut, na ol tok bilong em inap bagarapim tru bel bilong man i karim hevi. (Prov. 12:18; Efe. 4:31, 32) Mobeta yumi tingim ol gutpela pasin bilong man na painim rot bilong helpim em long karim hevi!

10. Tok bilong Jop 6:2, 3 i skulim yumi long wanem samting?

¹⁰ Ritim Jop 6:2, 3. Sampela taim Jop i “mekim planti toktok nabaut.” Tasol bihain em i tokaut olsem sampela tok bilong em i no stret. (Jop 42:6) Olsem Jop, sapos bikpela hevi i kamap na i putim presa long man, em inap mekim planti toktok nabaut we bihain em inap bel hevi long en. Yumi mas mekim wanem? Yumi no ken sutim tok long em, nogat, yumi mas sori long em. Tingim, long nau yumi karim planti hevi na presa bilong laip, tasol dispela i no stap long plen bilong Jehova  taim em i wokim yumi. Olsem na yumi no ken kirap nogut sapos wanpela wokman bilong Jehova i toktok nabaut taim bikpela hevi i painim em. Maski sapos em i mekim sampela tok i no stret long Jehova o long yumi, yumi no ken hariap long belhat o sutim tok long em.—Prov. 19:11.

11. Olsem wanem ol elda inap bihainim pasin bilong Elihu taim ol i givim tok kaunsel?

¹¹ Sampela taim man i karim hevi i nidim tok kaunsel o tok bilong stretim em. (Gal. 6:1) Olsem wanem ol elda inap helpim em? Ol i mas bihainim pasin bilong Elihu—em i bin putim yau long Jop na pilim tru hevi bilong em. (Jop 33:6, 7) Elihu i kliagut long tingting bilong Jop na bihain em i givim tok kaunsel. Ol elda husat i bihainim pasin bilong Elihu, ol bai putim gut yau na traim long kliagut long hevi bilong narapela. Olsem na taim ol i givim tok kaunsel, ol bai mekim tok we man inap pilim tru.

12. Taim man bilong Naomi na 2-pela pikinini man i dai, Naomi i mekim wanem?

¹² Naomi i laikim tru Jehova. Tasol bihain long man bilong em na 2-pela pikinini man bilong em i dai, em i laik senisim nem bilong em Naomi i go long “Mara,” mining bilong en “Bel Nogut.” (Rut 1:3, 5, 20, ftn., 21) Rut em tambu pikinini meri bilong Naomi, na em i sambai long Naomi long taim bilong hevi. Rut i lukautim Naomi na mekim ol tok bilong mekim gut bel bilong Naomi. Rut i mekim ol gutpela tok long Naomi, na long dispela rot em i soim pasin laikim na strongim Naomi.—Rut 1:16, 17.

13. Bilong wanem yumi mas sambai long ol lain em poroman marit bilong ol i dai?

¹³ Taim poroman marit bilong wanbilip i dai, yumi mas sambai long wanbilip bilong yumi. Ol marit i olsem 2-pela diwai i gro klostu long narapela narapela. Bihain long planti yia, ol rop bilong dispela 2-pela diwai bai raunim narapela narapela. Taim ol man i kamautim wanpela bilong dispela 2-pela diwai na em i dai, dispela inap bagarapim narapela diwai. Olsem tasol, taim wanpela maritman o maritmeri i dai, dispela bai mekim poroman marit i bel hevi tru inap longpela taim. Paula * em wanpela sista, na man bilong em i dai. Em i tok: “Kwiktaim laip bilong mi i senis, na mi pilim olsem mi no gat strong moa. Mi lusim bes pren bilong mi. Mi save toktok wantaim man bilong mi long olgeta samting. Em i save amamas taim mi amamas na strongim mi long taim bilong hevi. Oltaim em i save putim yau taim mi autim ol wari bilong mi. Mi pilim olsem hap bodi bilong mi i no stap moa.”

14-15. Olsem wanem yumi inap mekim gut bel bilong wanpela em poroman marit bilong em i dai?

¹⁴ Olsem wanem yumi inap mekim gut bel bilong wanpela em poroman marit bilong em i dai? Bikpela samting yu ken mekim em long toktok wantaim em, maski yu no save tumas long tok yu bai mekim. Paula i tok: “Mi save olsem taim wanpela i dai, ol man i save tingting planti. Ol i pilim olsem nogut ol i mekim tok i bagarapim bel bilong narapela. Tasol sapos ol i no mekim wanpela tok, dispela i save bagarapim tru bel bilong narapela.” Man i krai sori i no inap ekspektim yumi long mekim wanpela savetok. Paula i tok: “Mi pilim tru tok bilong ol pren taim ol i tok, ‘Mi sori tru.’”

¹⁵ William em wanpela brata, na meri bilong em i dai inap sampela yia i go pinis.  Em i tok: “Mi save amamas taim ol narapela i stori long ol gutpela memori ol i gat long meri bilong mi; mi luksave olsem ol i bin laikim na rispektim em. Dispela i helpim mi tru. Tok bilong ol i mekim gut bel bilong mi bikos meri bilong mi em dia tumas long mi, na em i bin stap gutpela helpim tru bilong mi.” Bianca em wanpela wido na em i tok: “Mi save belgut taim ol narapela i beten wantaim mi na serim 1-pela o 2-pela skripsa. Taim ol i stori long sampela samting man bilong mi i bin mekim na putim yau taim mi stori, dispela i save mekim gut bel bilong mi.”

16. (a) Wai na oltaim yumi mas tingim yet ol lain em wanpela ol i laikim tru i dai? (b) Olsem Jems 1:27 i tok, yumi gat wok long mekim wanem?

¹⁶ Wankain olsem Rut i bin pas gut tru wantaim Naomi, yumi mas wok yet long sambai long ol lain em wanpela ol i laikim tru i dai. Paula em yumi stori pinis long em, em i tok: “Bihain tasol long man bilong mi i dai, mi kisim planti helpim. Tasol bihain long sampela haptaim i lus, ol narapela i bisi long mekim wan wan wok bilong ol. Maski i olsem, laip bilong mi i senis olgeta. Em bai gutpela sapos ol narapela i luksave olsem man i krai sori bai nidim yet helpim maski planti mun o planti yia i lus bihain long [poroman marit] i dai.” Em tru olsem olgeta man i no wankain. Sampela inap lain kwik long senis i kamap long laip bilong ol. Tasol ol narapela inap bel hevi tru taim ol i mekim wanpela samting em pastaim ol i save mekim wantaim man i dai pinis. Ol man i save  mekim narapela narapela samting taim ol i krai sori. Yumi mas tingim olsem Jehova i trastim yumi na em i givim yumi wok bilong mekim gut long ol lain em poroman marit bilong ol i dai.—Ritim Jems 1:27.

17. Wai na yumi mas sambai long ol lain em poroman marit i lusim ol?

¹⁷ Ating sampela marit lain i save bel hevi tru taim poroman marit i lusim ol. Joyce em wanpela sista na man bilong em i lusim em na kisim narapela meri. Joyce i tok: “Taim man bilong mi i divosim mi, bel hevi mi pilim i bikpela moa winim bel hevi mi inap pilim sapos em i dai. Sapos eksiden i kamap o em i sik na dai, dispela i no disisen bilong em. Tasol divos em samting man bilong mi yet i mekim disisen long en. Mi pilim olsem em i rabisim mi tru.”

18. Olsem wanem yumi inap helpim ol lain em poroman marit i dai o lusim ol?

¹⁸ Taim yumi mekim ol liklik samting bilong helpim ol lain em poroman marit i dai o lusim ol, yumi helpim ol long pilim olsem yumi laikim ol. Ol i stap wanpis, olsem na ol i nidim ol gutpela pren. (Prov. 17:17) Olsem wanem yu inap stap olsem gutpela pren? Yu inap invaitim ol long kaikai wantaim yu. Yu inap lusim sampela haptaim long amamas wantaim ol o autim tok wantaim ol. Na tu, yu ken askim ol long joinim famili bilong yu long taim bilong famili lotu. Sapos yu mekim olsem, yu bai mekim Jehova i amamas bikos em i “stap klostu long ol manmeri em hevi i daunim tru ol” na em i save “lukautim ol wido.”—Sng. 34:18; 68:5.

19. Tok bilong 1 Pita 3:8 i strongim tingting bilong yu long mekim wanem?

¹⁹ Klostu nau bai Kingdom Bilong God i bosim graun na yumi bai “lusim tingting long [olgeta] pen na hevi.” Yumi laik tru long lukim taim bai kamap na yumi “no inap tingim gen ol samting bilong bipo, na long bel, [yumi] no inap tingim na pilim gen ol dispela samting.” (Ais. 65:16, 17) Long nau, yumi mas wok yet long sambai long narapela narapela na soim klia long toktok na pasin bilong yumi olsem yumi laikim tru olgeta wanbilip bilong yumi.—Ritim 1 Pita 3:8.