Hulda i Winim Mak Em i Putim
SAPOS yu bin visitim liklik ailan Sangir Besar long Indonesia sampela yia i go pinis, ating yu bin lukim tripela sista Kristen bilong yumi long nambis. Planti man long dispela ailan i save gut long ol bikos ol i save autim tok na helpim planti manmeri long kliagut long tok bilong Baibel. Tasol long dispela taim, ol i mekim narapela wok.
Ailan Sangir Besar long hap not bilong Indonesia
Pastaim, ol i wokabaut insait long solwara na painim ol bikpela ston na ol i karim ol i kam bek long nambis. Sampela bilong ol dispela ston i bikpela olsem ol soka bal. Bihain ol i sindaun long ol liklik sia ol i wokim long diwai, na ol i yusim ol hama long smesim ol dispela ston i go liklik tru winim sais bilong ol kiau bilong kakaruk. Na bihain ol i putim ol dispela liklik ston i go insait long ol plastik baket na karim i go antap long wanpela lata long hap ol i save stap long en. Na ol i pulapim ol dispela ston insait long ol bikpela beg na ol man i kam baim na lodim long ol trak na bai ol i ken yusim bilong wokim ol rot.
Hulda i bungim ol ston long nambis
Wanpela bilong ol dispela sista em Hulda. Sindaun bilong em i opim rot long em inap lusim bikpela haptaim moa long mekim dispela wok winim ol narapela i mekim dispela wok. Planti taim em i save yusim mani em i kisim bilong baim ol samting famili bilong em i nidim long wan wan de. Tasol nau em i putim mak long baim wanpela narapela samting. Em i laik baim wanpela elektronik teblet so em i ken yusim JW Library® ap. Hulda i save olsem ol vidio na ol narapela samting long JW Library® ap bai helpim em long mekim gut wok autim tok na helpim em long kliagut moa long ol tok bilong Baibel.
Hulda i wok tupela aua moa long olgeta moning insait long wan na hap mun na em i smesim planti ston inap bilong pulapim wanpela liklik trak. I no long taim, em i gat inap mani bilong baim dispela teblet.
Hulda i holim teblet bilong em
Hulda i tok: “Maski mi taiet tru na bodi bilong mi i pen bikos mi bin smesim ol ston, mi no tingim moa ol dispela pen mi pilim taim mi kirap long yusim nupela teblet bilong mi long autim gut tok na redim gut ol hap bilong ol miting Kristen.” Em i tok tu olsem dispela teblet i helpim em long taim pendemik i kirap bikos olgeta miting na wok autim tok i kamap long rot bilong vidio konferens. Yumi amamas olsem Hulda i winim mak em i putim.
