1. Yumi mas holim wanem tingting long bilip Kristen?

BILIP Kristen em gutpela samting tru. I no olgeta man i gat bilip. (2 Tes. 3:2) Tasol Jehova i helpim olgeta wan wan manmeri bilong em long kisim pasin bilong bilip. (Rom 12:3; Gal. 5:22) Olsem na ol manmeri bilong God i mas tok tenkyu tru long God i helpim ol long kisim pasin bilong bilip.

2, 3. (a) Man i gat bilip bai kisim wanem ol blesing? (b) Yumi bai skelim wanem ol askim?

² Jisas Krais i tok, Papa bilong em long heven i kirapim ol manmeri long i go long Em yet long rot bilong Pikinini Bilong Em. (Jon 6:44, 65) Sapos yumi bilip long Jisas, orait God inap lusim sin bilong yumi. Yumi bai stap pren bilong Jehova inap oltaim oltaim. (Rom 6:23) Yumi no bin mekim wanpela gutpela samting na i stret long yumi inap kisim kain blesing olsem. Yumi olgeta i gat sin, olsem na i stret yumi mas i dai. (Sng. 103:10) Tasol Jehova i lukim olsem yumi inap bihainim stretpela pasin. Em i soim bikpela pasin helpim na em i opim bel bilong yumi long harim gutnius. Olsem na  yumi bilip long Jisas na wet long kisim laip oltaim long bihain.—Ritim 1 Jon 4:9, 10.

³ Yu ting bilip i makim olsem yumi tingim tasol ol blesing em God i tok promis long givim long yumi? Yumi mas mekim wanem bilong soim olsem yumi gat bilip?

4. Man i mas mekim wanem ol samting moa bilong soim olsem em i gat bilip?

⁴ Bilip i makim olsem, long tingting man i kliagut long samting God i tingting pinis long kamapim, tasol man i mas mekim sampela samting moa. Bilip i makim strongpela laik we i save kirapim man long mekim ol samting i stret wantaim laik bilong God. Taim man i bilip long rot bilong God long kisim bek ol manmeri, dispela i save kirapim em long autim gutnius long ol narapela. Aposel Pol i tok: “Sapos long ai bilong ol man yu autim dispela ‘tok i stap insait long maus bilong yu,’ olsem Jisas em i Bikpela, na long bel yu bilip olsem God i kirapim em bek long dai, orait God bai kisim bek yu. Long bel man i save bilip na em i kamap stretpela man, tasol long maus em i save tokaut long dispela bilip bilong en long ai bilong ol manmeri, na God i kisim bek em.”—Rom 10:9, 10; 2 Kor. 4:13.

5. (a) Bilong wanem yumi mas i gat bilip? (b) Mekim tok piksa long olsem wanem yumi inap mekim bilip bilong yumi i stap strong yet.

⁵ Yumi bai kisim laip oltaim long nupela taim sapos yumi bilip na strongim yet dispela bilip. Bilip i olsem wanpela diwai. Diwai i nidim wara long kamap strong, na olsem tasol, yumi mas mekim sampela samting bilong strongim bilip bilong yumi. Ol giaman diwai i no save gro, tasol ol diwai tru i save gro na kamap bikpela. Sapos i no gat wara, diwai bai drai; na sapos oltaim i gat wara, diwai bai wok yet long gro na kamap strongpela diwai. Maski diwai i kamap strong, isi isi em bai dai sapos i no gat wara. Olsem tasol, yumi bai kamap slek long bilip sapos yumi no mekim ol samting bilong strongim bilip. (Luk 22:32; Hib. 3:12) Tasol sapos yumi lukautim bilip bilong yumi, em bai stap laip na “wok long gro moa yet,” na yumi bai “stap strong long bilip.”—2 Tes. 1:3; Tai. 2:2.

6. Hibru 11:1 i tok bilip i makim wanem 2-pela samting?

⁶ Baibel i kolim mining bilong pasin bilong bilip, olsem i stap long Hibru 11:1. (Ritim.) Bilip i makim 2-pela samting yumi no inap lukim long ai tru bilong yumi: (1) “Ol samting [yumi] bilip na wet long en”—dispela inap makim ol tok promis bilong God long ol samting bai kamap bihain, kain olsem, olgeta pasin nogut bai pinis na nupela taim bai kamap. (2) ‘Samting tru yumi no lukim long ai bilong yumi.’ Tok Grik ol i trensletim olsem ‘kliagut tru long samting yu bilip long en,’ i makim olsem yumi bilip tru long ol samting i stap tru, tasol yumi no inap lukim long ai tru bilong yumi. Kain olsem, yumi no inap lukim God Jehova, Jisas Krais, ol ensel, na ol wok i kamap long Kingdom bilong heven. (Hib. 11:3) Hau bai yumi soim klia olsem yumi bilip strong yet long ol samting yumi no inap lukim long ai, em ol samting Baibel i stori long en? Toktok na wok bilong yumi bai soim klia olsem yumi gat bilip.

7. Olsem wanem eksampel bilong Noa i helpim yumi long kliagut long samting yumi mas mekim bilong soim olsem yumi gat bilip? (Lukim piksa long kirap bilong stadi.)

⁷ Hibru 11:7 i stori long bilip bilong Noa na i tok: “Taim em i kisim pinis tok lukaut i kam long God long ol samting bai kamap bihain, em i kamapim olsem em i pret long God. Na em i wokim wanpela sip bilong kisim bek famili bilong em.” Noa i bilip, olsem na em i wokim traipela sip. Ating ol neiba bilong em i askim em long risen bilong em long wokim dispela sip. Yu ting Noa i pasim maus na em i no tokim ol long risen na em i wokim  dispela sip? Nogat tru! Bilip i strongim em long autim tok na tok lukaut long ol manmeri olsem God bai bagarapim ol. I luk olsem Noa i autim wankain tok Jehova i givim long em, olsem: “Olgeta manmeri i wok long pait na bikhet tasol, olsem na mi laik bagarapim ol. . . . Bai mi mekim bikpela tait i kamap long graun, bilong bagarapim olgeta samting i gat laip. Na olgeta samting i stap long graun bai i dai.” Na tu, Noa i tokim ol manmeri olsem i gat wanpela rot tasol bilong abrusim bagarap, na em i kolim wankain tok God i bin givim long em, olsem: “[Yupela i] mas i go insait long dispela sip.” Noa i “tokaut long stretpela pasin,” na long dispela rot em i soim olsem em i gat bilip.—Stt. 6:13, 17, 18; 2 Pita 2:5.

8. Jems i tok man i mas mekim wanem bilong soim olsem em i gat bilip?

⁸ I luk olsem Jems i raitim pas bilong em bihain liklik long aposel Pol i raitim pas i stori long pasin bilong bilip. Jems i mekim wankain tok olsem Pol, na em i tok bilip i no samting i stap tasol long tingting, nogat; man i mas mekim ol wok bilong soim olsem em i gat bilip. Jems i tok: “Yu soim mi dispela bilip bilong yu, em bilip i no kamapim ol gutpela wok bilong en, na long rot bilong ol gutpela wok bilong mi, bai mi soim yu bilip bilong mi.” (Jems 2:18) Jems i tok man i mas mekim ol wok bilong soim klia olsem em i gat bilip. Ol spirit nogut i bilip olsem God i stap, tasol ol i mekim ol wok bilong pasim God long  kamapim ol samting em i tingting pinis long mekim. (Jems 2:19, 20) Jems i stori long wanpela bilipman bilong bipo na em i tok: “Tingim. Papa bilong yumi, Abraham, i bin putim pikinini bilong en Aisak antap long alta olsem ofa. Na long rot bilong ol wok Abraham i mekim God i kolim em stretpela man. Yu luksave olsem bilip bilong em i poroman wantaim ol wok em i bin mekim, na long rot bilong ol wok bilong em, bilip bilong em i kamap gutpela olgeta.” Bihain Jems i kamapim klia olsem man i mas mekim ol wok bilong soim klia olsem em i gat bilip, na em i tok: “Bodi i no gat strong bilong laip i stap long en, em i dai pinis. Olsem tasol, bilip i no kamapim ol gutpela wok, dispela bilip i dai pinis.”—Jems 2:21-23, 26.

9, 10. Aposel Jon i tok wanem bilong makim olsem yumi mas mekim ol wok bilong soim klia olsem yumi gat bilip?

⁹ Winim 30 yia bihain, aposel Jon i raitim wanpela buk bilong Gutnius na 3-pela pas. Yu ting em i pilim tru ol tok em ol narapela man bilong raitim Baibel i mekim bilong stori long mining bilong bilip Kristen? Planti taim Jon i yusim tok Grik em sampela taim ol i trensletim olsem “bilip,” na em i kolim dispela tok planti taim moa winim ol narapela man bilong raitim Baibel.

¹⁰ Jon i tok: “Man i bilip long Pikinini, em i gat laip i stap oltaim. Man i no bihainim tok bilong Pikinini, em i no inap kisim laip, na belhat bilong God bai painim em.” (Jon 3:36) Sapos man i bihainim tok bilong Jisas, dispela bai makim olsem em i gat bilip. Planti taim Jon i kolim ol tok bilong Jisas we i soim olsem oltaim yumi mas mekim ol wok bilong soim olsem yumi gat bilip.—Jon 3:16; 6:29, 40; 11:25, 26; 14:1, 12.

11. Yumi ken mekim wanem bilong soim olsem yumi tenkyu tru long yumi inap kisim save long tok i tru?

¹¹ Yumi ken amamas tru bikos Jehova i yusim holi spirit long helpim yumi long luksave long tok i tru na bilip long gutnius! (Ritim Luk 10:21.) Oltaim yumi mas tok tenkyu long Jehova long em i bringim yumi i go klostu long em yet long rot bilong Pikinini bilong em, “dispela Nambawan Gopas bilong bilip bilong yumi na Man Bilong Inapim Tru bilip bilong yumi.” (Hib. 12:2) God i soim bikpela pasin helpim long yumi, olsem na yumi mas soim tenkyu bilong yumi na wok yet long strongim bilip bilong yumi long rot bilong beten na stadi long Baibel.—Efe. 6:18; 1 Pita 2:2.

12. Yumi mas mekim wanem ol samting bilong soim olsem yumi gat bilip?

¹² Oltaim yumi mas mekim ol wok bilong soim olsem yumi bilip long ol tok promis bilong Jehova. Yumi mas mekim ol wok em ol narapela inap luksave long en. Kain olsem: Yumi mas wok yet long autim tok long Kingdom Bilong God na kamapim ol disaipel. Na tu, “yumi mas mekim gutpela pasin long olgeta man, tasol moa yet long ol wanbilip.” (Gal. 6:10) Yumi mas wok strong long “rausim olpela bel wantaim ol pasin bilong en,” na sakim ol samting we inap bagarapim bilip bilong yumi.—Kol. 3:5, 8-10.

13. (a) Bilong wanem man i mas “bilip long God”? (b) Baibel i mekim wanem tok piksa long pasin bilong bilip? Bilong wanem?

¹³ Baibel i tok: “Man i no gat bilip em i no inap mekim God i amamas long em. Long wanem, man i laik i go klostu long God em i mas bilip olsem God i stap na God i save givim gutpela pe long ol man i wok strong long painim em.” (Hib. 11:6) Baibel i tok, “pos” i save helpim haus long sanap strong, na olsem tasol, “pasin bilong bilip long God” inap helpim man long kamap strongpela Kristen. (Hib. 6:1) Kristen i mas “bungim bilip” bilong em wantaim ol narapela gutpela pasin bambai em inap “stap insait yet long pasin laikim bilong God.”—Ritim 2 Pita 1:5-7; Jut 20, 21.

14, 15. Olsem wanem bilip i poroman wantaim pasin laikim?

 ¹⁴ Taim ol man i raitim ol buk i stap long Baibel, inap planti handret taim ol i kamapim klia olsem em i bikpela samting long man i mas i gat pasin bilong bilip. Ol i stori long bilip inap planti taim moa, winim ol narapela pasin Kristen. Yu ting dispela i makim olsem bilip em nambawan bikpela pasin tru ol Kristen i mas i gat?

¹⁵ Pol i stori long bilip na pasin laikim na em i tok: “Sapos mi gat strongpela bilip inap long mi ken tokim maunten long surik i go long narapela hap, tasol mi no gat pasin laikim, orait mi olsem samting nating.” (1 Kor. 13:2) Jisas i tok yumi mas laikim tru God—dispela em nambawan bikpela pasin yumi mas i gat. Em i tok olsem taim em i bekim dispela askim: “Wanem lo i nambawan na i winim ol arapela lo?” (Mat. 22:35-40) Pasin laikim bai kirapim man long bihainim planti gutpela pasin, na em bai kisim tu pasin bilong bilip. Baibel i tok, man i gat pasin laikim “i save bilip long olgeta samting.” Man i gat pasin laikim bai bilipim tok i tru bilong God long Baibel.—1 Kor. 13:4, 7.

16, 17. (a) Baibel i stori olsem wanem long bilip na pasin laikim? (b) Wanem pasin em nambawan na i winim ol narapela pasin? Bilong wanem?

¹⁶ Bilip na pasin laikim em ol bikpela pasin yumi mas i gat, olsem na taim ol man i raitim Baibel, planti taim ol i kolim dispela 2-pela pasin long seim sentens. Pol i kirapim ol Kristen long “pasim bilip na pasin laikim olsem siot kapa.” (1 Tes. 5:8) Pita i tok: “Maski yupela i no bin lukim [Jisas], yupela i laikim em. Maski yupela i no lukim em long nau, yupela i bilip long em.” (1 Pita 1:8) Jems i tokim ol Kristen God i makim: “Ol man i stap rabis long ai bilong ol man bilong graun, God i makim ol long kamap olsem ol man i pulap tru long bilip. Na em i makim ol tu long kisim kingdom, em promis em i bin mekim long ol man husat i laikim em. Dispela em tru, a?” (Jems 2:5) Jon i tok: “Lo bilong [God] i olsem yumi mas bilip long nem bilong Pikinini bilong en, Jisas Krais, na laikim narapela narapela.”—1 Jon 3:23.

¹⁷ Taim yumi lukim truim bilong ol tok promis bilong God na kisim ol blesing yumi bilip na wet long en, yumi no inap mekim ol wok yumi save mekim long nau bilong soim olsem yumi gat bilip. Tasol oltaim yumi bai strongim pasin bilong yumi long laikim tru God na ol narapela. Olsem na Pol i tok: “Nau pasin bilong bilip, pasin bilong wetim God i helpim yumi, na pasin laikim, dispela tripela pasin i stap yet. Tasol pasin i nambawan tru, em pasin laikim.”—1 Kor. 13:13.

18, 19. (a) Husat lain i gat bilip Kristen long nau? (b) Husat tasol i mas kisim biknem long dispela samting?

¹⁸ Long nau, lain bilong Jehova i bilip olsem Kingdom Bilong God i kamap pinis na i stap. Winim 8 milion manmeri long olgeta hap bilong graun i holim dispela bilip, na i olsem ol i kamapim paradais bilong bilip. Ol i kamapim ol pasin em holi spirit i save kamapim. (Gal. 5:22, 23) Dispela i soim klia tru olsem ol i gat bilip Kristen na pasin laikim!

¹⁹ I no gat wanpela man inap kisim biknem long dispela samting. God tasol i kamapim dispela samting. Olsem na “oltaim oltaim dispela bai i stap olsem mak bilong ol manmeri i ken lukim na tingim ol strongpela wok” Jehova i bin mekim. (Ais. 55:13) Tru tumas, “presen i kam long God” em olsem, God bai kisim bek yumi sapos yumi bilip. (Efe. 2:8) Paradais bilong bilip bai wok yet long kamap bikpela i go inap long olgeta manmeri i kamap gutpela olgeta, bihainim stretpela pasin, na stap amamas, na dispela bai litimapim nem bilong Jehova inap oltaim oltaim. Olsem na yumi mas wok yet long mekim ol samting i soim olsem yumi bilipim ol tok promis bilong Jehova!