I gat taua i stap long fran bilong dua bilong tempel paslain long man i go insait long Rum Holi. Ol edisen bilong Baibel New World Translation of the Holy Scriptures em ol i bin pablisim paslain long yia 2023 i gat dispela tok olsem “taua long fran i longpela inap 20 kiubit na i wankain mesamen olsem bikpela bilong haus. Na taua i go antap inap 120.” (2 Sto. 3:4) Ol narapela Baibel i tanim dispela hap olsem taua i go antap inap 120 kiubit, na dispela i makim olsem taua i go antap inap 53 mita!

Tasol New World Translation em ol i prinim long yia 2023, i tok long taua bilong tempel bilong Solomon olsem “em i go antap inap 20 kiubit” o 9 mita. a Skelim sampela risen na yumi mekim dispela senis long save yumi holim pinis.

Baibel long 1 King 6:3 i no stori long dispela taua i go antap inap long wanem mak. Long dispela ves, man bilong raitim dispela hap bilong Baibel em Jeremaia, em i kolim bikpela na longpela bilong dispela taua, em i no tok dispela taua i go antap inap long wanem mak. Na long sapta i kamap bihain, em i stori long planti samting bilong dispela tempel, olsem em i stori long kopa tenk, tenpela wilkar, na tupela pos ol i wokim long kopa i sanap long fran bilong taua. (1 Kin. 7:​15-37) Sapos tru tru dispela taua i go antap winim 50 mita, orait em bai antap moa long tempel na ol narapela hap bilong en, so wai na Jeremaia i no stori long taua i go antap inap long wanem mak? Inap planti handret yia bihain, ol man Juda em ol i save raitim ol stori, ol i tok dispela taua i no longpela moa winim ol narapela hap bilong tempel bilong Solomon.

Ol saveman i kwestenim olsem tru tru wol bilong tempel inap sapotim wanpela taua i go antap inap 120 kiubit o nogat. Ol taua ol i wokim long ston na ol bilding samting ol i wokim long brik long taim bipo—olsem ol geit bilong tempel bilong Isip—beis bilong ol i bikpela na taim ol i wok long i go antap, ol i go liklik. Tasol tempel bilong Solomon i narapela kain. Ol saveman i tok olsem bikpela bilong ol wol bilong en i no winim 6 kiubit o i aninit long 2.7 mita. Wanpela saveman bilong skelim ol samting long bipo em Theodore Busink, em i tok: “Taim yumi skelim bikpela bilong wol bilong [tempel klostu long dua], i stret long yumi inap tok olsem dispela taua i no [go antap] inap 120 kiubit.”

Ating ol i mekim popaia taim ol i kopim tok bilong 2 Stori 3:4. Maski sampela olpela manuskrip long bipo i raitim “120” long dispela ves, ol narapela rait yumi inap trastim, kain olsem Codex Alexandrinus bin stap winim 1,500 yia i go pinis na Codex Ambrosianus i bin stap winim 1,400 yia i go pinis, i gat dispela rait olsem “20 kiubit.” Wai na wanpela man bilong wokim ol kopi bilong Ol Rait Holi inap mekim popaia na raitim “120”? Long Tok Hibru, stail bilong raitim dispela tok “handret” na “kiubit” i luk wankain. So man bilong wokim kopi bilong Ol Rait Holi inap raitim dispela tok “handret” long ples bilong dispela tok “kiubit.”

Tru yumi laik kliagut long ol mesamen samting na stori gut long tempel bilong Solomon, tasol bikpela samting yumi laik putim tingting olgeta long samting dispela tempel i makim—em bikpela tempel spirit bilong Jehova. Yumi amamas tru olsem Jehova i singautim olgeta wokman bilong em long kam lotuim em long dispela tempel spirit!—Hib. 9:​11-14; Rev. 3:12; 7:​9-17.