Ol Man i Askim . . .

Yu Ting i Stret Long Baptaisim Ol Bebi?

▪ “Mi pret tru olsem liklik brata bilong mi John bai stap oltaim long Limbo,” em tok bilong Victoria. Bilong wanem em i pret? Em i tok: “John i dai paslain long em i kisim baptais, olsem na wanpela Katolik pris i tok John bai stap long Limbo inap oltaim oltaim.” Dispela kain tingting i save pretim tru ol man, tasol yu ting Baibel i as bilong en? Yu ting Baibel i skulim ol man olsem ol pikinini i dai paslain long ol i kisim baptais ol bai i stap oltaim long Limbo?

Baibel i tok ol Kristen i mas kisim baptais. Jisas i tokim ol disaipel bilong em olsem: “Kamapim ol disaipel long olgeta lain man, na baptaisim ol long nem bilong Papa na bilong Pikinini na bilong holi spirit. Skulim ol long bihainim olgeta samting mi tokim yupela long mekim.” (Matyu 28:​19, 20) Tingim, ol dispela lain i kisim baptais ol i mas kamap disaipel bilong Jisas. Dispela i makim olsem olgeta wan wan i bin kisim save long Jisas na ol i makim olsem ol bai bihainim em​—⁠em disisen wanpela bebi i no inap mekim.

Tasol planti man i strong olsem tok bilong Jisas i makim tu ol liklik pikinini. Pasto bilong Luteran em Richard P. Bucher i tok: “Olgeta manmeri na ol pikinini tu i mas kisim baptais.” Em i tok moa olsem: “Sapos ol i no kisim baptais, God i no inap lusim rong bilong ol na bai ol i kisim pe nogut.” Tasol long 3-pela samting, dispela tingting i pait wantaim ol tok Jisas i bin skulim ol man long en.

Namba wan, Jisas i no bin skulim ol man olsem ol bebi i mas kisim baptais. Bilong wanem dispela tok i tru em i bikpela samting? Tingim: Jisas i bin skulim ol disaipel bilong em long ol samting God i laik yumi mas mekim. Planti taim em i kolim gen ol tok em i skulim ol man long en. Bilong wanem em i mekim olsem? Bambai ol disaipel bilong em i ken kliagut long mining bilong ol tok. (Matyu 24:42; 25:13; Mak 9:​34-37; 10:​35-45) Olsem na i no gat wanpela taim em i bin skulim ol man olsem ol bebi i mas kisim baptais. Yu ting Jisas i bin lusim tingting long tok olsem ol bebi tu i mas kisim baptais? Nogat tru! Sapos i gat wok long ol bebi i mas kisim baptais, orait Jisas bai tok olsem.

Namba tu, Jisas i no bin skulim ol man olsem ol bai kisim pen taim ol i dai. Jisas i bilip tru long ol tok Baibel i mekim, olsem: “Ol man i gat laip i winim ol man i dai pinis. Long wanem, ol i save wanpela samting bai i kamap long ol. Ol i save bai ol i dai. Tasol ol man i dai pinis, ol i no inap save long wanpela samting.” (Saveman 9:​4, 5) Jisas i save olsem man i dai pinis i no inap stap oltaim long ol kain hap olsem klinpaia, Limbo, na helpaia. Em i skulim ol man olsem man i dai pinis em i slip i dai na em i no save long wanpela samting.​—⁠Jon 11:​1-14.

Namba tri, Jisas i skulim ol man olsem “olgeta man i stap long matmat” bai kirap bek. (Jon 5:​28, 29) Dispela i makim tu planti milion manmeri husat i no bin kisim baptais. Taim ol i kirap bek, ol bai kisim save long ol samting God i laik ol i mas mekim na ol inap stap oltaim long Paradais long graun. a​—⁠Song 37:⁠29.

Baibel i no tok ol bebi i mas kisim baptais.

[Futnot]