Wanem Taim Pait Bilong Armagedon Bai Kamap?

“Mi lukluk i stap na mi lukim bikpela lain manmeri, ol man i no inap kaunim namba bilong ol. Ol i bilong olgeta kantri na bilong olgeta lain na bilong olgeta lain pipol na bilong olgeta tokples . . . ol i bin winim dispela traipela hevi tru.”—REVELESEN 7:9, 14.

OL SAMTING i redi pinis long pait bilong Armagedon bai kamap. Bilong wanem yumi ken tok olsem?

Long olgeta hap bilong graun i gat wanpela lain manmeri em ol i lotuim Jehova na bihainim ol stretpela lo bilong Baibel. Planti milion manmeri bilong olgeta kantri, lain, na tokples, ol i wok long bung wantaim na stap wanbel olsem wanpela lain brata. Dispela pasin wanbel i stap namel long ol Witnes Bilong Jehova.—Jon 13:35.

Klostu nau Satan bai bungim lain ami bilong em na kirapim nambawan bikpela pait bilong em long wanpela lain i stap bel isi na i luk olsem ol i no gat helpim. (Esekiel 38:8-12; Revelesen 16:13, 14, 16) Olsem wanem yu inap save olsem dispela bai kamap tru? Baibel i kolim stret ol samting bilong helpim yumi long luksave long wanem taim pait bilong Armagedon bai kamap. Planti bilong ol dispela samting Baibel i kolim i kamap tru pinis.

Ol Samting Yu Lukim Truim Bilong En

Ol disaipel bilong Jisas i askim em long olsem wanem ol man i ken save olsem “pinis bilong dispela taim” i kam klostu. (Matyu 24:3) Jisas i bekim askim bilong ol na em i tokim ol long wanpela haptaim bai kamap na “wanpela kantri bai pait long narapela kantri na wanpela kingdom bai pait long narapela kingdom. Na bai i gat taim bilong ol bikpela hangre na ol guria bai kamap long narapela narapela hap.” Na em i tok: “Ol dispela samting i olsem stat tasol bilong ol hevi, kain olsem pen i save kamap paslain long meri i laik karim pikinini.” (Matyu 24:7, 8) Aposel Pol i kolim dispela wankain haptaim olsem “taim bilong las de,” na em i tok olsem dispela haptaim bai “givim hatwok long ol man.” (2 Timoti 3:1) Olsem wanem? Yu luksave olsem ol dispela tok profet i makim ol samting i wok long kamap long nau?

 Bilong wanem dispela haptaim bai givim bikpela hatwok tru long ol man? Aposel Jon i stori long as bilong dispela samting. Em i tok profet olsem inap “sotpela taim” Satan na ol ensel bilong en bai mekim wok bilong ol long graun tasol. Long dispela taim Satan bai “belhat nogut tru.” (Revelesen 12:7-12) Olsem wanem? Yu luksave olsem long nau ol manmeri long olgeta hap i gat pasin bilong kros na pait?

Jisas i tok tu olsem long dispela taim bilong bikpela hevi, ol man bai mekim wanpela bikpela wok. Em i tok: “Ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.” (Matyu 24:14) Long nau, long 235 kantri, ol Witnes Bilong Jehova i autim gutnius bilong Kingdom Bilong God long winim 500 tokples. Tupela nius ol i wokim em Baibel i as bilong en, nius Wastaua na Kirap!, ol i bin tilim long planti hap bilong graun, winim olgeta narapela nius. Na tu, ol Witnes i bin tanim tok bilong Baibel i go long 100 tokples. Ol i save volantia long mekim dispela wok na ol man i save givim mani long laik bilong ol yet bilong helpim dispela wok. Yu ting dispela bikpela wok bilong autim tok i truim tok profet bilong Jisas?

Baibel i kolim tu ol samting bai i kamap na bai kirapim pait namel long God Jehova na ol man husat i birua long em. Skelim 3-pela tok profet em yu bai lukim truim bilong en.

Ol Samting Klostu Nau Bai Kamap

Tok Profet 1. Baibel i tok ol manmeri bai mekim wanpela bikpela tokaut long “bel isi na gutpela sindaun.” Ating ol i ting olsem klostu nau bai ol i stretim olgeta bikpela hevi. Tasol ol samting nogut tasol bai kamap bihain long dispela tokaut, na bai i no gat bel isi.—1 Tesalonaika 5:1-3.

Tok Profet 2. Orait nau, ol gavman bai kirap na birua long ol lotu. Long Baibel, wel animal i makim ol dispela gavman; na pamukmeri i sindaun antap long wel animal i makim olgeta lotu giaman. (Revelesen 17:3, 15-18) Dispela wel animal bai karimaut laik bilong God na bagarapim olgeta lotu em ol i giaman na tok ol i mekim wok bilong God.

Aposel Jon i tok piksa long dispela samting olsem: “Dispela 10-pela kom yu bin lukim, na dispela wel animal yu lukim, ol bai heitim dispela pamukmeri. Na ol bai rausim olgeta samting bilong en na mekim em i stap skin nating. Na ol bai kaikai mit bilong en, na ol bai kukim em olgeta long paia. Long wanem, God i givim tingting long ol long mekim samting em yet i tingting pinis long en.”—Revelesen 17:16, 17.

Tok Profet 3. Bihain long ol lotu giaman i pinis, Satan bai kirapim pait long ol manmeri i lotuim God Jehova.—Revelesen 7:14; Matyu 24:21.

Em Bai Mekim Wanem Long Yu?

Sapos yu no kirap yet long kisim gut save long tok bilong Baibel, ating bai i hatwok long yu bilip olsem ol samting nau yumi stori long en bai kamap tru. Tasol i gat as na yumi ken bilip olsem klostu nau olgeta dispela samting bai kamap. Baibel i stori long planti tok profet i kamap tru pinis na dispela i ken strongim bilip bilong yumi long dispela samting. a

I gutpela yu lusim sampela haptaim long painimaut as na ol Witnes Bilong Jehova i bilip tru olsem klostu nau “pait long dispela bikpela de bilong God i Gat Olgeta Strong” bai kamap na bilong wanem yu no ken pret long en. Askim ol long stori wantaim yu long ol samting em Baibel i tok yu mas mekim bambai yu tu inap kamap wanpela bilong dispela lain em God Jehova i save lukautim. (Revelesen 16:14) Ol save yu kisim inap senisim tingting bilong yu long ol samting bai kamap bihain.

[Futnot]

[Rait long pes 8]

Yu ting wok bilong ol Witnes Bilong Jehova i truim tok profet bilong Baibel?