BAIBEL i givim rot long ol marit em poroman bilong ol i bin mekim pasin pamuk, long skelim olsem ol i laik katim marit o nogat. b (Matyu 19:9) Steve, yumi kamapim tok bilong em long antap, em i mekim disisen olsem em i no laik katim marit. Em wantaim Jodi i pasim tok long ol bai wok strong long stretim bek marit bilong ol. Tupela i sindaun wantaim, tasol ol i luksave olsem ol i mas mekim sampela samting moa bilong stretim bek marit bilong ol. Bilong wanem? Olsem tupela i tok, rong bilong Jodi i mekim na pasin bilong trastim narapela i no stap moa. Pasin bilong trastim poroman i bikpela samting bilong helpim ol marit long stap amamas, olsem na tupela i gat bikpela wok long mekim.

Sapos yu wantaim poroman i laik stretim bek marit bilong yupela taim em i mekim pasin pamuk, bai yupela i gat hatwok. Bai i gat hatwok tru long ol mun bihain long dispela rong i bin kamap ples klia. Tasol yu inap winim dispela hevi! Olsem wanem yu inap trastim em gen? Ol savetingting i stap long Baibel inap helpim yu. Tingim dispela 4-pela samting.

Aposel Pol i tok: “Yupela i rausim pinis pasin giaman, olsem na yupela wan wan i mas mekim tok tru.” (Efesus 4:25) Tok giaman, o hap tok tru, o pasim maus na i no toktok, dispela inap daunim pasin bilong trastim narapela. Olsem na yutupela i mas toktok gut wantaim na no ken giaman liklik.

Ating pastaim yu wantaim poroman bai bel  hevi tumas long toktok long dispela rong. Tasol bihain yu mas toktok gut wantaim long samting i bin kamap. Tru, ating yu no laik tokaut long olgeta liklik liklik samting i kamap, tasol i no gutpela long abrusim olgeta na i no toktok long en. Jodi, em yumi stori pinis long em, i tok: “Pastaim mi hatwok tru long toktok long dispela samting, na mi nolaik tru long mekim. Mi bel hevi stret long mi bin mekim dispela rong, na mi laik lusim tingting olgeta long en.” Tasol pasin bilong pasim maus i kamapim sampela hevi. Bilong wanem? Steve i tok: “Jodi i no laik toktok long rong em i bin mekim, olsem na mi tingting nogut yet long em.” Na Jodi i tok: “Mi no laik toktok wantaim man bilong mi long en, olsem na mipela i hatwok long stretim kwik dispela hevi.”

Tru, bel bilong yupela bai bagarap stret long toktok long dispela samting. Debbie, em man bilong em Paul i bin mekim pasin pamuk wantaim sekreteri, i tok: “Mi gat planti askim. Olsem wanem? Bilong wanem? Tupela i bin toktok long wanem samting? Tingting na bel bilong mi i bagarap stret na mi wok long tingim dispela samting, na moa yet long ol wik bihain.” Paul i tok: “Taim mitupela Debbie i toktok wantaim, sampela taim mipela i kros. Tasol bihain mitupela i save tok sori. Pasin bilong toktok gut wantaim i helpim mipela long pas gut wantaim.”

Olsem wanem yu ken bosim bel taim yupela i toktok long dispela hevi? Tingim, nambawan bikpela samting em yu laik kisim skul long ol samting i bin kamap long dispela hevi na mekim samting bilong strongim marit bilong yu, na i no bilong mekim save long poroman. Olsem: Chul Soo na meri bilong em, Mi Young, i skelim pasin i stap namel long tupela bihain long Chul Soo i bin mekim pasin pamuk. Chul Soo i tok: “Mi bin bisi tumas long mekim ol samting bilong mi yet, na mi tingting oltaim long mekim ol samting ol narapela i laikim. Mi bin lusim bikpela haptaim long ol dispela lain. Olsem na mi lusim liklik haptaim tasol long i stap wantaim meri bilong mi.” Dispela save i helpim Chul Soo na Mi Young long senisim sampela pasin, na bihain dispela i helpim ol long strongim marit bilong ol.

Baibel i tok: “Sapos tupela man i stap wantaim, em i gutpela.” Bilong wanem? Long wanem, “sapos wanpela i pundaun, orait narapela i ken litimapim em gen.” (Saveman 4:9, 10) Yupela bai pilim tru dispela tok taim yupela i wok strong bilong kamapim gen pasin bilong trastim narapela narapela.

Sapos yu na poroman bilong yu i wok gut wantaim, yu inap daunim pasin bilong tingting nogut long em na kamapim bek pasin bilong trastim em. Tasol yutupela wantaim i mas givim bel long strongim gen marit. Sapos yu yet o poroman yet i laik mekim ol samting bilong stretim dispela hevi, ating dispela bai kamapim sampela hevi moa. Yu mas tingim narapela olsem poroman bilong yu.

Steve na Jodi i bin mekim olsem. Jodi i tok: “Dispela samting i no kamap hariap. Inap longpela taim mitupela Steve i wok gut wantaim long strongim marit na pas gut wantaim. Mi tingting strong olsem mi no ken tru mekim em i bel hevi gen. Tru, bel bilong Steve i bagarap, tasol em i tingting strong olsem em i no ken larim marit bilong mipela i bagarap. Long olgeta de, mi wok long painim rot bilong soim em olsem mi stap gut long em, na oltaim em i soim olsem em i laikim mi tru. Inap long olgeta taim bihain bai mi tenkyu tru long em long dispela samting.”

Taim Jisas i givim tok lukaut long pasin bilong bagarapim marit, em i tok: “Sapos ai long han sut bilong yu i wok long pundaunim yu, orait kamautim na tromoi i go.” (Matyu 5:27-29) Sapos yu no bin stap gut long poroman, yu inap  tingim sampela pasin o tingting yu mas kamautim na tromoi i go bilong helpim marit bilong yu?

Tru, yu save yu mas givim baksait olgeta long dispela man, o meri, yu bin mekim rong wantaim em. c (Sindaun 6:32; 1 Korin 15:33) Paul, em yumi bin stori long em pastaim, em i senisim ol aua bilong wok na namba bilong mobail fon na bai em i no ken toktok moa wantaim dispela narapela meri. Tasol maski em i mekim olsem, em i no inap abrusim meri olgeta. Paul i strong tru long meri bilong em i ken trastim em gen, olsem na em i lusim dispela wok mani bilong em. Na em i rausim mobail fon bilong em na em i yusim fon bilong meri bilong em. Yu ting gutpela samting i kamap long hatwok bilong Paul? Meri bilong em, Debbie, i tok: “Maski 6-pela yia i go pinis, sampela taim mi save tingting planti yet olsem nogut dispela meri i traim long bungim gen Paul. Tasol nau mi bilip olsem Paul i no inap pundaun gen long dispela traim.”

Sapos yu yet i bin mekim dispela rong, ating yu gat wok tu long senisim sampela pasin bilong yu. Olsem: Sapos yu man, nogut yu save tromoi ai long ol meri, o yu save tingting oltaim long ol narapela meri, na sapos yu meri, nogut yu save mekim olsem long ol man. Sapos olsem, orait yu mas “rausim olpela bel wantaim ol pasin bilong en.” Lusim ol dispela pasin na kisim ol nupela pasin we bai strongim poroman bilong yu long trastim yu. (Kolosi 3:9, 10) Sapos yu bin kamap bikpela insait long famili i no soim olsem narapela i laikim narapela, ating yu bai hatwok long mekim pasin long poroman olsem yu laikim em tru. Maski pastaim yu hatwok, yu mas tokaut long poroman olsem em i lewa tru bilong yu. Steve i tok: “Planti taim Jodi i save tatsim mi bilong soim olsem em i laikim mi, na oltaim em i save tok, ‘Mi laikim yu tru.’”

Insait long sampela mun, long olgeta de i gutpela yu toksave long poroman long olgeta samting yu bai mekim. Mi Young, em pastaim yumi stori long em, i tok: “Chul Soo i bin tokim mi long olgeta samting i kamap long ol wan wan de, maski ol i liklik samting tasol, na bai em i ken soim mi olsem em i no bin mekim wanpela samting em i mas haitim.”

Yu no ken hariap long ting em i taim bilong kirap na mekim ol samting long sindaun bilong yupela olsem long bipo taim dispela hevi i no bin kamap yet. Sindaun 21:5 i tok: “Sapos ol man i hariap tumas long mekim wok, bai wok bilong ol i no kamap gutpela.” Ating sampela mun—o sampela yia—bai lus pastaim bilong kisim pasin bilong trastim gen poroman.

Sapos poroman i bin rongim yu, yu mas larim haptaim i lus bambai yu ken lusim tru rong bilong em. Mi Young i tok: “Pastaim mi bin ting i no gutpela sapos wanpela meri i no inap lusim rong bilong man bilong em taim man i no bin stap gut long em. Mi no klia long as na meri i inap kros i go longpela taim tru. Tasol taim man bilong mi i rongim mi, mi save long as na i hatwok tru long lusim rong bilong em.” Pasin bilong lusim rong—na trastim gen poroman—em bai kamap isi isi tasol.

Tasol Saveman 3:1-3 i tok, i gat “taim bilong oraitim” man. Ating pastaim bai yu ting yu no ken kamapim ol tingting bilong bel long poroman bilong yu. Tasol sapos yu mekim olsem i go i go, dispela i no inap helpim yu long trastim gen poroman. Bilong stretim hevi i stap namel long yupela, lusim rong bilong poroman, na bilong kamapim klia dispela samting, tokim poroman long olgeta tingting i stap long bel. Na kirapim poroman tu long tokaut long ol amamas na ol wari bilong em.

Yu no ken tingim tingim ol samting i mekim yu i bel nogut i stap. Wok strong long daunim dispela bel nogut. (Efesus 4:32) Tingim long bel ol pasin God yet i mekim. Bel bilong em i bagarap stret taim ol lain bilong lotuim em long Israel bilong bipo i lusim em. God Jehova i tok, em yet i olsem  wanpela em poroman marit i no bin stap gut long em. (Jeremaia 3:8, 9; 9:2) Tasol em i tok: “Belhat bilong mi i no inap i stap oltaim.” (Jeremaia 3:12) Taim lain bilong em i tanim bel tru na ol i kam bek long em, em i lusim rong bilong ol.

Bihain, taim yutupela wantaim i pilim olsem yupela i mekim pinis ol senis bilong helpim yupela long pas gut wantaim gen, bel bilong yu bai stap isi. Orait nau yu ken tingting oltaim long mekim ol samting na bai marit i ken stap gut—olsem wok wantaim long tingim ol samting yupela i laik mekim wantaim, olsem mak yupela i laik winim. Tasol i gutpela sapos yu makim sampela haptaim bilong skelim i stap bilong yupela i kamap gutpela olsem wanem. No ken ting ol samting i orait tasol. Sapos wanpela liklik hevi i kamap, kirap kwik long stretim, na tokaut olsem yupela bai wok long strongim gut marit bilong yupela.—Galesia 6:9.

Sapos sampela taim yu tingting planti, tingim dispela samting: God em i Man Bilong Kamapim marit. (Matyu 19:4-6) Olsem na em bai helpim yupela na marit bilong yupela inap kamap gutpela. Olgeta marit yumi stori pinis long ol, ol i bihainim ol gutpela tok bilong Baibel na marit bilong ol i kamap gutpela gen.

Inap 20 yia samting i go pinis na dispela hevi i bin kamap namel long Steve na Jodi. Steve i stori long ol samting ol i bin mekim bilong stretim bek marit bilong ol, em i tok: “Taim mitupela i kirap stadi long Baibel wantaim ol Witnes Bilong Jehova, ol samting i wok long kamap gutpela namel long mipela. Mipela i kisim gutpela helpim tru. Olsem na mipela i winim dispela taim nogut.” Jodi i tok: “Mi amamas tru long mipela inap sanap strong na winim dispela taim nogut. Mitupela i stadi wantaim long Baibel, na mipela i taitim bun na wok strong na nau marit bilong mipela i kamap gutpela.”