“MI GAT wanpela driman.” Inap 50 yia i go pinis, long Ogas 28, 1963, sivil raits lida bilong Amerika em Martin Luther King Jr. i bin mekim dispela tok, na em wanpela tok we planti man i save long en. King i mekim dispela tok bilong makim driman o hop bilong em long wanpela taim bihain we olgeta manmeri bai stap fri na bai i no gat pasin bilong bel nogut long ol man bilong narapela lain. Maski em i mekim dispela tok long ol manmeri long Amerika, ol man long planti kantri i bin laikim dispela tok bilong em.

Inap 3-pela mun bihain long Martin Luther King Jr. i bin mekim dispela tok, long Novemba 20, 1963, winim 100 kantri i bihainim Tokaut Bilong Yunaitet Nesen long Pinisim Olgeta Kain Pasin Bilong Mekim Nogut Long Ol Man Bilong Narapela Lain. I gat ol narapela tokaut olsem em ol kantri i bin bihainim long ol yia bihain long dispela. Olgeta dispela wok i bin kamapim wanem gutpela samting?

Long Mas 21, 2012, Ban Ki-moon, em Seketeri Jeneral bilong Yunaitet Nesen i tok: “I gat planti gutpela kontrak, ol wok, na astingting em ol gavman i kamapim bilong pinisim pasin bilong bel nogut na mekim nogut long ol man bilong narapela skin kala o lain, pret long ol man bilong narapela kantri, na ol narapela pasin birua. Maski i olsem, pasin bilong bel nogut long ol narapela lain i bin putim hevi yet long planti milion manmeri long olgeta hap.”

Long ol kantri we ol i bin mekim sampela senis long pinisim pasin bilong bel nogut long narapela lain, i gat dispela askim i stap yet olsem: Tru tru ol dispela senis i pinisim pasin bilong bel nogut long ol man bilong narapela lain o i pasim tasol ol man long ol i no ken soim olsem ol i bel nogut long narapela lain? Sampela man i ting olsem ol dispela senis i kirapim ol man long no ken mekim nogut long narapela, tasol senis i no gat strong long pinisim pasin bilong bel nogut. Bilong wanem? Long wanem, pasin bilong mekim nogut long ol man bilong narapela lain em pasin ol man inap lukim na lo inap givim strafe long ol man i mekim olsem, tasol pasin bilong bel nogut em samting i stap insait long bel na tingting bilong man na em i no isi long pinisim.

Olsem na bilong pinisim pasin bilong bel nogut, ol i no ken stopim pasin bilong mekim nogut long ol narapela na em tasol, nogat, ol i mas senisim tingting man i gat long ol man bilong narapela lain. Tru tru ol inap mekim olsem? Sapos olsem, orait hau bai ol i mekim? Yumi ken ritim stori bilong sampela man em ol i lusim pasin bilong bel nogut na dispela i soim olsem ol man inap senisim pasin bilong ol, na tu, i gat wanpela samting inap helpim ol long mekim olsem.

Linda: Mi bon long Saut Afrika. Mi tingim olgeta blakskin manmeri bilong Saut Afrika olsem ol i samting nating, ol i no gat save, na i no gat man inap trastim ol, na ol i wokboi nating bilong ol waitman. Mi no luksave olsem mi gat dispela pasin bilong bel nogut long ol man bilong narapela skin kala. Tasol dispela pasin bilong mi i wok long senis taim mi kirap stadi long Baibel. Mi kisim save olsem “God i save mekim wankain pasin long olgeta man,” na bel na tingting bilong man em i bikpela samting moa winim skin kala bilong yumi o tokples yumi mekim. (Aposel 10:34, 35; Sindaun 17:3) Tok bilong Filipai 2:3 i helpim mi long luksave olsem sapos mi tingim olsem ol narapela i winim mi, orait mi inap daunim pasin bilong bel nogut long ol narapela man. Mi bihainim ol kain stiatok olsem bilong Baibel na dispela i helpim mi long laikim ol narapela maski ol i gat wanem skin kala. Nau mi no  gat moa dispela pasin bilong bel nogut long ol narapela.

Michael: Mi kamap bikpela long hap we planti waitman bilong Australia i stap long en na mi kisim pasin bilong heitim tru ol Esia, na moa yet ol Saina. Taim mi draivim kar na mi lukim wanpela man bilong Esia, mi save daunim windo na singaut strong na kolim ol tok i no stret olsem “Go bek long ples, Esia!” Bihain, taim mi kirap long stadi long Baibel, mi save long tingting God i gat long ol manmeri. Em i laikim olgeta manmeri, maski ol i bilong wanem lain o ol i luk olsem wanem. Mi pilim tru dispela pasin laikim bilong em na dispela i mekim na nau mi lusim pasin bilong heitim narapela na mi kisim pasin laikim. Mi amamas long lukim olsem mi mekim kain bikpela senis olsem. Nau mi amamas tru long bung wantaim ol manmeri bilong kain kain kantri na sindaun. Dispela i helpim mi long holim stretpela tingting long ol man bilong narapela kantri na i givim mi bikpela amamas.

Sandra: Mama bilong mi em i bilong Umunede long Provins Delta, Naijiria. Tasol Papa bilong mi em i bilong Provins Edo na em i save mekim tokples Esan. Papa na Mama i bilong narapela narapela provins, dispela i mekim na lain famili bilong Papa i save birua nogut tru long mama bilong mi i go inap long taim em i dai. Olsem na mi tok promis olsem mi bai givim baksait olgeta long ol manmeri i save mekim tokples Esan na mi no inap maritim wanpela man Edo. Tasol taim mi kirap stadi long Baibel, mi senisim tingting bilong mi. Baibel i tok olsem God i save mekim wankain pasin long olgeta man, na em i save orait long ol man i aninit long em, olsem na mi husat na bai mi heitim ol man bilong narapela lain o tokples? Mi stretim tingting bilong mi na kamap wanbel wantaim famili bilong papa bilong mi. Mi bihainim ol stiatok bilong Baibel na dispela i mekim mi amamas na givim mi bel isi. Na tu, dispela i helpim mi long pas gut wantaim ol narapela, maski ol i bilong wanem sindaun, skin kala, tokples, o lain. Na man mi maritim em wanpela man bilong Provins Edo na em i save mekim tokples Esan.

 Hau na Baibel i bin helpim ol dispela manmeri na planti narapela long daunim pasin bilong heitim na bel nogut long narapela lain? Em bikos Baibel em i Tok Bilong God. Baibel i gat strong long senisim tingting man i gat long ol narapela. Na tu, Baibel i kamapim klia samting bai pinisim tru olgeta kain pasin bilong bel nogut.

Save i kam long Baibel inap helpim yumi long kontrolim na pinisim pasin bilong bel nogut, tasol i gat tupela samting yumi mas tingim paslain long yumi pinisim tru pasin bilong bel nogut long ol narapela. Namba 1 samting, yumi ol man i gat sin na yumi no gutpela olgeta. Baibel i tok: “Olgeta manmeri i save mekim sin.” (1 King 8:46) Maski yumi traim hat tru long daunim pasin bilong bel nogut, yumi pilim wankain hatwok olsem aposel Pol, em i tok: “Taim mi gat laik long mekim pasin i stret, pasin nogut i stap wantaim mi.” (Rom 7:21) Olsem na sampela taim “ol tingting nogut i kamap insait long bel” inap kirapim yumi long bel nogut long ol arapela.—Mak 7:21.

Namba 2 samting, Satan i save giamanim ol manmeri. Baibel i kolim em olsem “man bilong kilim man i dai” na i tok em “i save giamanim olgeta manmeri bilong graun.” (Jon 8:44; Revelesen 12:9) Dispela i kamapim klia as na ol man i no inap pinisim pasin bilong bel nogut i stap long olgeta hap, na as na ol man i birua long ol narapela, daunim ol narapela, kilim i dai wanpela lain olgeta, na ol narapela pasin bilong bel nogut long man bilong narapela skin, lotu, na sindaun.

Olsem na paslain long God i pinisim tru pasin bilong bel nogut, em i mas rausim sin i stap long skin bilong ol man, na tu, rausim Satan em man i save giamanim ol manmeri. Baibel i kamapim klia olsem Kingdom Bilong God bai mekim olsem.

Jisas Krais i skulim ol disaipel bilong em long beten long God olsem: “Kingdom bilong yu i mas i kam. Laik bilong yu i mas kamap long graun olsem em i save kamap long heven.” (Matyu 6:10) Kingdom Bilong God tasol bai pinisim olgeta pasin nogut olsem pasin bilong daunim ol narapela na pasin bilong bel nogut long narapela lain.

Taim Kingdom Bilong God i bosim graun, Jisas bai “pasim” Satan long sen na kalabusim em na bai em i “no ken giamanim moa olgeta lain manmeri.” (Revelesen 20:2, 3) Bihain long dispela bai i gat “nupela graun” o ol manmeri, na “stretpela pasin tasol bai i stap long en.” a—2 Pita 3:13.

Ol stretpela manmeri i stap long dispela nupela taim ol bai kamap gutpela olgeta, na ol bai i no gat sin. (Rom 8:21) Ol bai i stap aninit long Kingdom Bilong God, na “bai i no gat wanpela i mekim nogut long narapela.” Bilong wanem? “Long wanem, olgeta samting long graun bai i save tru long Bikpela.” (Aisaia 11:9) Long dispela taim, olgeta man bai kisim save long ol gutpela pasin bilong God Jehova na ol bai bihainim ol dispela pasin. Dispela i makim olsem pasin bilong bel nogut bai pinis olgeta, long wanem, “God i save skelim ol man long wankain pasin.”—Rom 2:11.