Long nau ponografi a i pulap tru long olgeta hap bilong graun. Yu inap lukim long ol edvetaismen, wok bilong maketim ol stail bilas, ol muvi, ol magasin, long TV, long vidio gem, long ol smat fon, olkain mobail fon samting, ol Web-sait, na long ol piksa ol manmeri i putim long Intenet. Long nau, planti man i orait tasol long ponografi. Planti man long planti hap i lukim ponografi, winim olgeta taim bipo.—Lukim blok  “Ol Samting Nogut Bilong Ponografi.”

Na tu, pasin bilong wokim ol ponografi piksa i wok long senis. Profesa Gail Dines i tok: “Ol piksa ponografi long nau i go nogut moa yet na ol ponografi em bipo ol man i ting ol i doti nogut tru, nau ol i orait tasol long lukim.”

Yu ting wanem long dispela kain tingting ol man i gat? Ponografi em samting bilong lusim taim nating na lukluk tasol, o em samting nogut tru bilong bagarapim man? Jisas i tok: “Olgeta gutpela diwai i save karim gutpela kaikai na olgeta diwai nogut i save karim kaikai nogut.” (Matyu 7:17) Ponografi i save kamapim wanem samting? Bilong kisim bekim, yumi ken skelim sampela bikpela askim long ponografi.

OL SAVEMAN I TOK: Ol man inap kalabus tru long ponografi, na sampela man bilong wok painimaut na sampela dokta i tok em i wankain olsem drak krek-koken.

Brian, b oltaim em i save lukim ponografi long Intenet, i tok: “I no gat wanpela samting inap stopim mi. Mi pilim olsem tingting bilong mi i save lok olgeta. Bodi bilong mi i save guria na pen i save kamap long het bilong mi. Mi traim strong long lusim dispela pasin, tasol planti yia bihain mi kalabus yet long en.”

Planti taim ol man bilong lukim ponografi ol i save haitim pasin bilong ol. Ol i no save toktok long dispela samting na ol i save giaman. Em as na planti i pilim olsem ol i stap wanpis, ol i sem, ol i wari, bel hevi, na belhat. Sampela taim, ol i save tingting long suasaid. Serge, husat i save daunlodim ol ponografi piksa i go long mobail fon bilong em long klostu olgeta de, i tok: “Mi save tingim mi yet tasol na mi laik inapim laik bilong mi. Mi pilim olsem mi no gutpela, bel i kotim mi, mi stap wanpis, na mi pilim olsem mi kalabus. Mi sem tru na mi pret long askim ol narapela long helpim mi.”

Maski em sotpela taim tasol o yu popaia na lukim ponografi, dispela inap kamapim samting nogut. Wanpela gopas bilong mekim ol wok painimaut long ponografi, em savemeri Judith Reisman i tokaut long ai bilong Senate komiti bilong Amerika, olsem: “Ol piksa bilong ponografi i save pas strong long kru na i senisim wok bilong kru, na wantu tasol kru i holim dispela piksa long memori na i stap strong tru na i hatwok long rausim long tingting.” Susan, em meri i gat 19 krismas na em i bin lukim ol Web-sait bilong ponografi, i tok: “Ol dispela piksa i pas strong tru long tingting bilong mi. Sampela taim ol i save kamap wantu tasol long tingting. Mi pilim olsem mi no inap tru long rausim dispela samting long tingting.”

SAMTING NOGUT BILONG EN: Ponografi i save kalabusim ol man na bagarapim tingting bilong ol.—2 Pita 2:19.

OL SAVEMAN I TOK: “Ol marit na ol famili i bruk bikos long ponografi.”—The Porn Trap, by Wendy and Larry Maltz.

Ponografi i bagarapim ol marit na famili long rot bilong

• Daunim pasin bilong trastim poroman marit, pasin bilong pas gut wantaim, na pasin laikim.—Sindaun 2:12-17.

• Strongim pasin bilong ol man long tingim ol yet tasol, stap longwe long ol narapela, na i no amamas long poroman marit.—Efesus 5:28, 29.

• Kirapim strong laik bilong mekim maritpasin na tingting long inapim laik bilong ol yet tasol.—2 Pita 2:14.

• Kirapim ol man long subim strong poroman marit long mekim olkain maritpasin o pasin sem i nogut tru.—Efesus 5:3, 4.

• Bagarapim pasin bilong stap gut long poroman marit long bel na tingting, na long bodi.—Matyu 5:28.

 Baibel i tokim ol maritman na maritmeri olsem ol i ‘no ken trikim na giamanim’ poroman. (Malakai 2:16) Pasin bilong i no stap gut long poroman marit inap bagarapim marit na inap mekim tupela marit i seperet na divos. Dispela i save nogutim ol pikinini.

Sapos pikinini i lukim ponografi, dispela inap nogutim em moa yet. Brian, em mipela i stori pinis long em, i tok: “Taim mi gat 10-pela krismas, mi pilai hait hait insait long haus na mi painim ol ponografi magasin bilong papa bilong mi. Long pasin hait mi wok long lukim ol dispela magasin—mi no save wai na ol dispela piksa i pulim tingting bilong mi. Kirap long dispela taim, mi wok yet long lukim ponografi i kam inap long taim mi kamap bikpela man.” Ol wok painimaut i soim olsem ponografi inap kirapim ol tineja long insait long maritpasin taim ol i yangpela yet, na tu, kirapim ol long slip nabaut wantaim planti narapela, bagarapim narapela, na bel na tingting bilong ol i no stap gut.

SAMTING NOGUT BILONG EN: Ponografi i save bagarapim pasin bilong pas gut wantaim insait long famili na i save kamapim bikpela bel hevi.—Sindaun 6:27.

BAIBEL I TOK: “Yupela i mas kilim i dai ol laik i stap long ol hap bilong bodi bilong yupela, olsem pasin pamuk, pasin i no klin, bel i kirap, ol laik nogut, na pasin gridi, em wankain olsem pasin bilong lotuim imis.”—Kolosi 3:5.

God Jehova c i save heitim tru ponografi. Tasol dispela i no makim olsem em i tambuim maritpasin. God i bin putim strong long skin bilong ol man na meri marit long inapim laik bilong narapela narapela, na pas gut wantaim long bel na tingting, na amamas long kamapim ol pikinini.—Jems 1:17.

Sapos olsem, orait wai na yumi ting olsem Jehova i heitim tru ponografi? Tingim sampela risen olsem.

• Em i save olsem ponografi inap bagarapim sindaun bilong ol man.—Efesus 4:17-19.

• Em i laikim yumi na em i no laik wanpela samting i nogutim yumi.—Aisaia 48:17, 18.

• Jehova i laik lukautim gut ol marit na ol famili.—Matyu 19:4-6.

• Em i laik yumi bihainim klinpela pasin na rispektim raits bilong ol narapela.—1 Tesalonaika 4:3-6.

• Em i laik yumi rispektim strong bilong kamapim pikinini na yusim long stretpela rot.—Hibru 13:4.

• Jehova i save olsem ponografi i kamapim tingting bilong Satan long maritpasin we i bagarapim tingting bilong ol man na kirapim ol long tingim ol yet tasol.—Stat 6:2; Jut 6, 7.

SAMTING NOGUT BILONG EN: Ponografi i save bagarapim pasin bilong ol man long pas gut wantaim God.—Rom 1:24.

Tasol Jehova i sori tru long ol man em ol i laik lusim kalabus bilong ponografi. Baibel i tok: “Bikpela i save sori moa yet long yumi na oltaim em i marimari long yumi. Em i no save belhat kwiktaim, na em i save laikim tru yumi. Em i save olsem em i bin kisim graun na wokim yumi na em i tingim yumi i olsem das tasol.” (Song 103:8, 14) Em i singautim ol man i gat pasin daun long i go long em na “bai em i ken marimari long yumi na mekim bikpela pasin helpim long yumi long taim stret.”—Hibru 4:16; lukim blok “ Lusim Kalabus Bilong Ponografi.”

Planti manmeri i bin kisim helpim i kam long God. Dispela helpim God i givim i kamapim wanem gutpela samting? Lukim tok Baibel i mekim long ol manmeri husat i lusim pasin nogut bilong ol: “God i mekim yupela i kamap klin pinis, na i mekim yupela i kamap holi, na i kolim yupela stretpela man, em i mekim olsem long rot bilong holi spirit bilong en na long nem bilong Bikpela Jisas Krais.” (1 Korin 6:11) Olsem aposel Pol, ol kain man olsem i ken tok: “God i givim pawa long mi, na long dispela rot mi gat strong long mekim olgeta samting.”—Filipai 4:13.

Susan, husat i lusim pasin bilong lukim ponografi, i tok: “Jehova wanpela tasol inap helpim yu long bihainim gen stretpela pasin. Sapos yu askim em long helpim na stiaim yu, orait yu inap kamap klinpela man long ai bilong em. Em i no inap lusim yu.”