Ating bai yu askim yu yet, ‘Sapos God i save long olgeta samting, olsem tingting bilong mi na ol samting mi nidim, wai na mi mas beten?’ Dispela em i gutpela askim. Jisas yet i bin tok God “i save long ol samting yupela i nidim paslain long yupela i askim em.” (Matyu 6:8) King Devit bilong Israel long bipo i luksave long dispela, na em i tok: “Sapos mi laik mekim wanpela tok, yu save pinis long dispela tok.” (Song 139:4) So wai na yumi mas beten long God? Bilong bekim dispela askim, yumi ken skelim tok Baibel i mekim long beten. a

Baibel i tok God Jehova b i save long olgeta samting, na tu, dispela i makim olsem em i save gut long ol man i lotuim em. (Song 139:6; Rom 11:33) Save bilong em i no wankain olsem memori i stap long kompiuta we i save holim nating infomesen bilong ol man, nogat. God i save tingim tru tingting i stap long bel bilong yumi wan wan, long wanem, em i gat laik long yumi mas i go klostu long em. (Song 139:23, 24; Jems 4:8) Em as na Jisas i kirapim ol disaipel bilong em long beten maski Papa bilong em i save long ol samting yumi nidim. (Matyu 6:6-8) Taim yumi kamapim tingting bilong yumi long Krieta bilong yumi, dispela bai helpim yumi long go klostu moa long em.

Sampela taim ating em bai hatwok long save long wanem tok yumi laik mekim long beten bilong yumi. Long kain taim olsem, God inap luksave long bel na tingting bilong yumi na em inap yusim stretpela save bilong em long givim helpim yumi nidim long taim yumi gat hevi. (Rom 8:26, 27; Efesus 3:20) Taim yumi luksave olsem God i mekim samting bilong helpim yumi, maski em long rot yumi no ting long en, dispela i kirapim yumi long go klostu long em.

Baibel i tokim yumi olsem God i Gat Olgeta Strong i save harim beten bilong ol gutpela wokman bilong em, tasol Baibel i kamapim tu as na God i no save harim sampela beten. Olsem, long wanpela haptaim we pasin bilong pait na bagarapim man i pulap tru long Israel bilong bipo, God i tokim profet Aisaia long tokim ol manmeri olsem: “Maski yupela i prea planti taim, bai mi pasim yau bilong mi. Long wanem, blut bilong ol man yupela i bin kilim, em i pas yet long ol han bilong yupela.” (Aisaia 1:15) I klia tru olsem ol man i no bihainim lo bilong God na ol man i no holim stretpela tingting ol i beten, God bai no inap tru long harim beten bilong ol.—Sindaun 28:9; Jems 4:3.

Tasol Baibel i tok tu olsem: “Maski wanem wanem samting yumi askim em long en na i stret wantaim laik bilong em, em bai harim yumi.” (1 Jon 5:14) Yu ting dispela i makim olsem God bai mekim olgeta samting em ol lain bilong em i askim em long mekim? Nogat. Tingim samting i bin painim aposel Pol. Tripela taim em i beten askim God long rausim “wanpela nil i sutim skin” bilong em. (2 Korin 12:7, 8) I luk olsem Pol i gat sik long ai bilong em. Na ating dispela i givim bikpela hevi tru long em! God i givim strong long em bilong oraitim ol sikman na kirapim bek wanpela man i dai pinis, tasol em i mas karim hevi bilong sik bilong em yet. (Aposel 19:11, 12; 20:9, 10) Maski God i no helpim Pol long rot em i ting long en, em i amamas yet olsem God i helpim em.—2 Korin 12:9, 10.

Em tru olsem Baibel i stori long sampela man em ol i bin kisim bekim bilong ol askim bilong ol long rot bilong ol mirakel. (2 King 20:1-7) Tasol i no olsem God i bin wokim mirakel long helpim olgeta man long taim bilong ol man i bin raitim Baibel. Sampela bilipman i bin bel hevi taim ol i pilim olsem God i no harim beten bilong ol. King Devit i askim Jehova olsem: “Bikpela, wanem taim bai yu tingim mi gen? Ating yu lusim tingting long mi inap oltaim oltaim, a?” (Song 13:1) Tasol taim bilipman Devit i luksave olsem planti taim Jehova i bin helpim em, dispela i strongim pasin bilong em long trastim God. Long wankain beten, Devit i tok: “Tasol mi bilip bai yu marimari long mi oltaim.” (Song 13:5) Wankain olsem Devit, ol man i lotuim God long nau ol i mas beten i go inap long ol i pilim olsem God i harim beten bilong ol.—Rom 12:12.

God i save helpim yumi long ol samting yumi nidim.

I gat as na ol gutpela papamama i no save givim ol samting long ol pikinini bilong ol long taim ol i askim. Long wankain pasin, God i no inap bekim ol beten bilong yumi long rot yumi laikim o long taim yumi ting long en. Tasol yumi inap bilip tru olsem Krieta bilong yumi em i olsem wanpela papa i gat pasin laikim na em bai givim ol samting yumi nidim long taim na long pasin i stret.—Luk 11:11-13.

God inap helpim yumi long ol rot yumi no ting long en.

Tasol olsem wanem sapos yumi beten bilong kisim bel isi long wanpela hevi yumi karim inap longtaim pinis? Sapos Jehova i no wokim wanpela mirakel long helpim yumi, yu ting yumi mas kisim tingting olsem em i no harim beten bilong yumi? Yumi inap kisim stretpela tingting sapos yumi tingim ol rot em God inap yusim long helpim yumi. Olsem, wanpela gutpela pren i helpim yumi long taim yumi nidim helpim. (Sindaun 17:17) Jehova inap kirapim dispela gutpela pren long helpim yumi. Na tu, long rot bilong Baibel God inap helpim yumi. Yumi inap painim ol gutpela stiatok long Baibel bilong helpim yumi karim dispela hevi.—2 Timoti 3:16, 17.

God i no save rausim hevi bilong ol manmeri bilong em, nogat, em i save givim strong long ol bilong karim dispela hevi. (2 Korin 4:7) Olsem, Jisas i askim Papa bilong em long rausim hevi i laik painim em, tasol em i save olsem dispela inap bagarapim nem bilong God, em as na Jehova i salim wanpela ensel long strongim Pikinini bilong em. (Luk 22:42, 43) Olsem tasol, God inap yusim wanpela gutpela pren long mekim ol tok bilong strongim yumi long taim yumi nidim helpim. (Sindaun 12:25) Na ating em i no rot yumi ting God bai yusim long helpim yumi, olsem na em bikpela samting long luksave long dispela kwiktaim.

God i save long taim stret bilong helpim yumi.

Baibel i tok God i Gat Olgeta Strong i save helpim ol man i gat pasin daun “long taim em yet i makim.” (1 Pita 5:6) So sapos yumi pilim olsem Jehova i no hariap long helpim yumi, yumi no ken ting olsem em i lusim tingting long yumi. God i gat bikpela savetingting winim save bilong yumi, olsem na Krieta bilong yumi i save long taim stret bilong helpim yumi long samting yumi askim long en.

Yumi ken tok piksa olsem: Sapos yu gat liklik pikinini boi na em i laikim wanpela baisikol. Yu ting wantu tasol bai yu baim baisikol bilong em? Sapos yu pilim olsem em i liklik tumas long raidim baisikol, ating bai yu no hariap long baim. Tasol bihain ating taim em i kamap bikpela bai yu baim baisikol bilong em. Long wankain pasin, God bai givim yu ol samting “yu laikim tru” long taim stret sapos yu wok long beten oltaim.—Song 37:4.

Baibel i strongim ol Kristen tru long no ken lusim pasin bilong bilip long strong bilong beten. Ating sampela bai tok, ‘I hatwok long mekim olsem.’ Ating yumi karim wanpela hevi inap longtaim pinis o ol man i mekim nogut long yumi, dispela i mekim na i hatwok long bilip olsem God i harim beten bilong yumi. Tasol em bikpela samting long tingim olsem Jisas i skulim yumi long pasin bilong beten oltaim.

Jisas i tok piksa long wanpela wido i stap rabis na planti taim em i go lukim wanpela jas nogut na bai em i ken kisim helpim. (Luk 18:1-3) Pastaim  jas i no laik helpim em, tasol bihain em i tokim em yet olsem: “Bai mi stretim rong narapela i mekim long em na bai em i no ken kam olgeta taim na mekim mi les tru.” (Luk 18:4, 5) Long taim ol man i bin raitim Baibel, jas i helpim dispela wido na bai meri i no inap “bagarapim gutnem bilong em.” c Sapos wanpela jas nogut i pret long ol man i bagarapim gutnem bilong em na em i helpim wanpela wido i stap rabis, yumi ken bilip tru olsem God bilong yumi i save tingim tru ol man em ol i “wok long krai long em long san na nait”! Na olsem Jisas i tok, “kwiktaim [God] bai stretim rong ol arapela i mekim long ol.”—Luk 18:6-8.

Maski sampela taim yumi no laik long askim long kisim helpim, yumi no ken givap. Taim yumi wok strong long beten oltaim, yumi soim olsem yumi gat bikpela laik long God i ken helpim yumi. Na tu, yumi inap luksave long ol rot God i yusim long harim beten bilong yumi na dispela i helpim yumi long go klostu long em. Tru tumas, yumi inap bilip tru olsem Jehova bai harim ol stretpela beten bilong yumi sapos yumi bilip na beten yet.—Luk 11:9.