Yu Mas Bihainim Wanem Pasin Long Stretim Pikinini?
“Bel bilong mi i no stap isi taim mi harim nois bilong ol kar i go i kam. Em namba 3 taim Jordan i abrusim taim mipela i makim long em i mas kam bek long haus. Mi tingting planti. ‘Em i stap we?’ ‘Wanpela hevi i painim em? Em i tingim olsem mipela i wari long em?’ Taim em i kam long haus, mi belhat stret.”—GEORGE.
“Pikinini meri bilong mi i bikmaus, dispela i mekim na mi kirap nogut. Mi tanim na lukim olsem em i holim het bilong em na krai. Brata bilong em i gat 4-pela krismas i paitim em.”—NICOLE.
Pikinini meri bilong mipela Natalie i gat 6-pela krismas i tok: “‘Mi no stilim dispela ring. Mi painim!’ Aiwara i pulap long ai bilong em, em i mekim olsem bilong strongim tok bilong em. Mipela i bel hevi long samting em i mekim na mipela i krai. Mipela i save olsem em i giaman.”—STEPHEN.
SAPOS yu wanpela papa o mama, yu inap pilim tru tok bilong ol papamama em yumi stori long en. Taim kain samting olsem i kamap long yu, yu save tingting planti long hau yu bai stretim pikinini? I gat rong long stretim pikinini bilong yu?
HAU BAI YU STRETIM PIKININI?
Olsem Baibel i kamapim, papamama inap mekim gutpela “tok” bilong stretim pikinini. Pasin bilong stretim pikinini inap makim pasin bilong givim tok, skulim em, na helpim em long luksave long rong bilong em. Na i no olsem yu mas krosim em o mekim hatpela pasin long em.—Sindaun 4:1, 2.
Pasin bilong stretim pikinini i wankain long pasin bilong wokim gaden. Man bilong wokim gaden i save brukim graun, givim wara long ol kaikai samting i gro long gaden, na tu, em i mas rausim ol binatang na ol gras nogut. Taim ol kaikai long gaden i gro, em i mas katim ol lip bilong en na bai em i ken gro gut. Man bilong wokim gaden i save traim kain kain rot na bai kaikai long gaden i ken gro gut. Dispela i wankain long pasin bilong ol papamama long mekim bikpela long pikinini. Sampela taim ol i mas givim tok bilong stretim pikinini, dispela bai helpim em long kisim stretpela save na makim gutpela rot long bihainim taim em i go bikpela. Pasin bilong stretim pikinini i wankain long pasin bilong katim sampela lip bilong kaikai na bai kaikai i gro gut. Sapos man i no katim gut ol lip, dispela inap mekim na kaikai i drai. Olsem tasol, papamama i mas stretim pikinini long pasin laikim.
God Jehova i as bilong ol tok bilong Baibel, em i stap olsem gutpela eksampel em yumi ken bihainim. Taim God i stretim ol man husat i bihainim tok bilong em, em i mekim long gutpela na stretpela pasin na dispela i helpim ol long “laikim tumas gutpela tingting.” (Sindaun 12:1) ‘Oltaim ol i holimpas dispela gutpela tok.’ (Sindaun 4:13) Yu inap helpim pikinini bilong yu taim yu bihainim 3-pela pasin bilong God long stretim ol man. God i save stretim man long (1) pasin laikim, (2) pasin isi, na (3) oltaim em i bihainim wankain pasin long stretim man.
STRETIM PIKININI LONG PASIN LAIKIM
God i save stretim ol man bikos em i laikim ol. Baibel i tok: “Bikpela i save stretim ol man em i laikim tumas, olsem ol papa i save stretim ol pikinini ol i laikim tumas.” (Sindaun 3:12) Na tu, Jehova i ‘as bilong marimari na sori. Na em i no save belhat kwik.’ (Kisim Bek 34:6) Dispela em as na Jehova i no save mekim hatpela pasin. Na tu, em i no save sutim tok, o mekim ol tok i bagarapim bel bilong ol man, olgeta dispela pasin i olsem ‘bainat i sutim man.’—Sindaun 12:18.
PUTIM GUT YAU
I hatwok long ol papamama long bihainim stret olgeta pasin bilong God long bosim bel. Sampela taim bai yu pilim olsem i hatwok long bosim bel, tasol tingim olsem sapos yu belhat na yu stretim pikinini, ating bai yu mekim long hatpela pasin na dispela i no inap kamapim gutpela samting. Taim yu mekim olsem yu kamapim tasol olsem yu belhat na yu no helpim pikinini.
Taim yu stretim pikinini long pasin laikim na yu bosim bel, orait gutpela samting inap kamap long dispela. Tingim pasin George na Nicole i bihainim long stretim pikinini bilong ol.
BETEN
“Taim Jordan i kam long haus, mi na meri bilong mi i belhat, tasol mipela i bosim bel na mipela i putim yau long tok bilong en. Em i tudak pinis so mipela i pasim tok long toktok wantaim em long moning. Paslain long mipela i go slip mipela i beten wantaim. Neks de mipela i redi long stori wantaim pikinini bilong mipela na save long tingting bilong em. Em i redi long bihainim ol lo mipela i putim na em i luksave olsem em i sakim tok bilong mipela taim em i kam leit long haus. Mipela i luksave olsem sapos mipela i hariap long stretim em taim mipela i belhat, dispela i no inap helpim em. Taim mipela i putim gut yau long tok bilong em, mipela inap helpim em.”—George.
TOKTOK GUT WANTAIM
“Mi belhat taim mi lukim samting pikinini man i mekim long susa bilong em. Mi no hariap long stretim em, long wanem, mi save olsem i no gutpela long mekim wanpela disisen taim mi belhat, olsem na mi salim em i go long rum. Bihain taim bel bilong mi i stap isi, mi tokim em olsem i no stret long pait na mi helpim em long save olsem pasin em i mekim long susa bilong en i no stret. Taim mi mekim olsem dispela i helpim em. Em i tok sori long susa bilong en na holimpasim em.”—Nicole.
Olsem na pasin laikim i as na papamama i stretim pikinini. Ol i mekim olsem long rot bilong toktok long pikinini o givim panismen long em.
STRETIM PIKININI LONG PASIN ISI
Oltaim Jehova i save bihainim “stretpela pasin” long stretim ol man. (Jeremaia 30:11; 46:28) Em i save skelim olgeta samting yumi mekim. Olsem wanem ol papamama i ken bihainim wankain pasin? Stephen em yumi bin stori pinis long en, em i tok: “Maski mipela i belhat na mipela i no save long as na Natalie i tok giaman, mipela i tingim krismas na save bilong en long mekim ol samting.”
Man bilong Nicole, Robert, i save skelim olgeta samting paslain long em i stretim pikinini. Taim pikinini i bikhet, em i save askim em yet olsem: ‘Em fes taim em i mekim dispela pasin o em i save mekim planti taim? Ating pikinini i pilim taiet o em i sik? O ating em i mekim olsem bikos em i gat wanpela hevi?’
Ol papamama i save skelim gut ol samting, ol i save olsem ol pikinini i no wankain long ol bikpela manmeri. Aposel Pol i luksave long dispela taim em i tokim ol Kristen olsem: “Taim mi stap pikinini, mi save toktok olsem pikinini, na tingting olsem pikinini.” (1 Korin 13:11) Robert i tok: “Samting i helpim mi long bosim gut bel na mi no ken kros hariap, em long tingim bek ol samting mi save mekim taim mi stap pikinini yet.”
Em i bikpela samting long kisim stretpela tingting long ol samting pikinini i mekim, tasol dispela i no makim olsem yu orait long pasin kranki bilong em. Taim yu save long ol samting pikinini inap mekim, dispela bai helpim yu long stretim pikinini long gutpela pasin na long pasin isi.
OLTAIM BIHAINIM WANKAIN PASIN LONG STRETIM PIKININI
Long Malakai 3:6, God i tok: “Mi tasol mi Bikpela na mi no save senisim tingting bilong mi.” Ol wokman bilong God i bilip long dispela tok na ol i save olsem God bai lukautim ol. Olsem tasol, ol pikinini i nidim papamama long stretim ol. Sapos yu senisim ol lo dispela bai mekim na pikinini i tingting planti na belhat.
Jisas i tok: “‘Yes’ bilong yupela i mas minim yes tasol, na ‘Nogat’ bilong yupela i mas minim nogat tasol.” Dispela tok i stret long ol papamama tu. (Matyu 5:37) No ken kolim ol samting em yu no inap long mekim. Sapos yu tokim pikinini olsem bai yu givim panismen long em taim em i brukim wanpela lo, orait yu mas truim tok bilong yu.
Oltaim papamama i mas toktok gut wantaim pikinini bilong stretim em. Robert i tok: “Sapos ol pikinini i laik bai mi orait long samting meri bilong mi i tok nogat long en, mi no save wokim disisen hariap, nogat. Mi save toktok wantaim meri bilong mi na nau mi wokim disisen.” Sapos ol papamama i no wanbel long wanpela samting, orait em bai gutpela sapos tupela yet i toktok gut wantaim paslain long ol i mekim ol disisen.
OL PAPAMAMA I MAS STRETIM PIKININI
Sapos yu bihainim pasin bilong Jehova na yu stretim pikinini long pasin laikim, pasin isi, na oltaim yu bihainim wankain pasin long stretim em, yu inap bilip tru olsem dispela bai helpim pikinini bilong yu. Taim yu soim pikinini long gutpela rot em i mas bihainim, bai yu helpim em long kamap man o meri husat inap mekim gut ol wok na mekim ol gutpela disisen. Baibel i tok: “Skulim pikinini bilong yu long bihainim gutpela pasin, na em bai i wokabaut long dispela rot inap long em i lapun tru.”—Sindaun 22:6.
