Mi go bikpela long wanpela ples klostu long Rom we planti man i nogat wok mani i stap long en. Laip i hatwok long dispela taim. Mi no save long mama tru bilong mi, na mi no pas gut wantaim papa bilong mi. Mi go bikpela long ol strit na mi lain long lukautim mi yet.

Taim mi gat 10-pela krismas, mi kisim pasin bilong stil. Fes taim mi ranawe long haus em long taim mi gat 12 krismas. Planti taim papa i mas go long polis stesin na kisim mi i go bek long haus. Planti taim mi save kros long ol man na mi man bilong pait na belhat long olgeta man. Taim mi gat 14 krismas, mi ranawe lusim haus na mi kirap long kisim drak. Mi no gat ples slip, olsem na mi save slip long kar bilong ol man na long moningtaim tru mi kirap na ranawe. Bihain mi save painim ol tep wara samting na waswas.

Mi kamap hapman bilong stil, mi save stilim beg bilong ol man na stilim ol samting long haus bilong ol maniman. Olsem na wanpela lain raskol i tokim mi long joinim ol na dispela i opim rot long mi inap stil long ol benk. Mi man bilong belhat, olsem na i no longtaim ol narapela insait long lain raskol i rispektim mi. Mi karim gan long olgeta hap mi go long en, long nait mi save putim gan aninit long pilo taim mi slip. Mi insait tru long pasin bilong pait, kisim drak, tok swea, stil, na pasin pamuk. Olgeta taim ol polis i save painim mi. Planti taim ol i arestim mi na ol i save putim mi long kalabus.

Bihain long mi lusim kalabus, mi visitim wanpela anti bilong mi. Mi painimaut olsem anti na tupela kasen bilong mi i kamap ol Witnes Bilong Jehova. Ol i invaitim mi long go long wanpela miting bilong ol Witnes. Mi laik save moa long ol Witnes, olsem na mi go wantaim ol. Taim mipela i kamap long Haus Kingdom, mi tokim ol olsem mi laik sindaun klostu long dua na bai mi ken lukim ol man i kam insait na go ausait  long Haus Kingdom. Long dispela taim tu mi karim gan i go wantaim mi.

Dispela miting i senisim i stap bilong mi. Mi ting mi stap long wanpela nupela ples. Ol Witnes i smail na toktok gut long mi. Mi inap tingim yet ol tok na pasin ol i mekim long mi bilong soim olsem ol i tingim mi tru. Mi no bin ekspiriensim kain samting olsem bipo!

Mi kirap stadi long Baibel wantaim ol Witnes. Taim mi wok long kisim save, mi luksave olsem mi mas senisim ol pasin bilong mi. Mi bihainim tok i stap long Sindaun 13:20, em i tok: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” Mi save olsem mi no ken bung moa wantaim dispela lain raskol. I hatwok long mekim olsem, tasol Jehova i helpim mi.

Na tu, mi mekim ol samting bilong helpim mi long stap klin. Olsem, mi lusim pasin bilong smok na kisim drak. Mi katim gras bilong mi, mi no werim moa ol yauring, na tok swea. Em fes taim bilong mi long pilim olsem mi inap bosim ol pasin bilong mi.

Mi no man bilong ritim ol buk na stadi, olsem na i hatwok tru long stadi long Baibel. Tasol mi wok strong long stadi na isi isi mi kisim pasin bilong laikim Jehova. Na tu, bel bilong mi i kotim mi long ol pasin mi mekim, em samting mi no bin pilim long bipo. Planti taim mi gat 2-pela tingting olsem Jehova i fogivim mi long olgeta pasin nogut mi bin mekim o nogat. Taim mi kisim kain tingting olsem, mi save ritim stori bilong King Devit husat i bin mekim ol bikpela rong, tasol Jehova i fogivim em na dispela i mekim bel bilong mi i stap isi.—2 Samuel 11:1–12:13.

Narapela hatwok bilong mi em mi mas autim tok na kamapim bilip bilong mi long ol narapela. (Matyu 28:19, 20) Mi pret olsem bai mi bungim wanpela man o meri em bipo mi bin paitim o stilim ol samting bilong en! Tasol isi isi mi lusim dispela pasin bilong pret. Mi amamas tru long helpim ol narapela long kisim save long gutpela Papa bilong yumi long heven, em God bilong fogivim yumi.

Mi kisim save long Jehova na dispela i helpim i stap bilong mi! Planti pren bilong mi long lain raskol long bipo i stap long kalabus o ol i dai pinis. Tasol mi amamas olsem laip bilong mi i gat as bilong en na mi wet long lukim ol gutpela samting bai kamap bihain. Mi lain long daunim mi yet, bihainim tok, na kontrolim pasin bilong mi long belhat. Long dispela rot mi inap stap gut wantaim ol narapela. Nau mi marit na stap amamas wantaim meri bilong mi, em Carmen. Mitupela i amamas tru olsem mipela inap helpim ol narapela long kisim save long Baibel.

Nau mi bihainim onest pasin taim mi wok, sampela taim mi mas klinim benk, tasol mi no stil moa!