Long ol atikol i kamap paslain, yu kisim save olsem ol Witnes Bilong Jehova i save tingim tru Kingdom Bilong God. Na ating yu kirap nogut long ritim stori bilong ol samting em dispela Kingdom bai kamapim long graun long bihain. Tasol ating yu gat tupela tingting olsem ol dispela samting bai kamap tru, o nogat.

Em i savetingting long skelim gut ol samting yu harim na no ken hariap long bilipim olgeta tok. (Sindaun 14:15) Tingim samting em lain Beria bilong bipo i mekim taim ol i harim wanpela tok. a Taim lain Kristen long Beria i harim stori long ol samting Kingdom bai mekim, ol i amamas long ol tok ol i harim, tasol ol i no hariap long bilipim olgeta tok. Ol i skelim gut ol tok bilong Baibel “bai ol i ken save olsem tok ol i harim em i tru o nogat.” (Aposel 17:11) Taim lain Beria i harim dispela gutnius, ol i skelim wantaim tok Baibel i mekim. Long dispela rot ol i bilip olsem Baibel i as bilong dispela gutnius ol i harim.

Ol Witnes Bilong Jehova i amamas long singautim yu long kisim save long rot bilong fri Baibel stadi. Long rot bilong stadi long Baibel yu inap save long as na ol Witnes Bilong Jehova i bilip long Kingdom Bilong God na tok Baibel i mekim.

Na tu, taim yu kisim save long Kingdom Bilong God long rot bilong stadi long Baibel, dispela inap helpim yu long kisim ol bekim bilong ol bikpela askim.

•   Ol man i kamap olsem wanem?

• Yumi stap bilong mekim wanem?

• Wai na God i larim pen na hevi i stap?

• Wanem samting i painim ol man i dai pinis?

• Graun bai bagarap olgeta?

• Olsem wanem ol famili i ken stap amamas tru?

Pasin bilong stadi long Baibel bai helpim yu long “go klostu long God.” (Jems 4:8) Taim yu go klostu long God, bai yu luksave long ol gutpela samting Kingdom Bilong God bai mekim long nau na inap oltaim oltaim. Jisas i bin beten long Papa bilong em olsem: “Bilong kisim laip oltaim, ol i mas kisim save long yu, yu wanpela tasol yu God tru, na ol i mas kisim save long man yu bin salim i kam, em Jisas Krais.”—Jon 17:3.