Long Janueri 20, 1815, Thomas (1) a Williams em tumbuna papa bilong mi i bon long Horncastle, Inglan. Taim em i gat 2-pela krismas, mama bilong em i dai, olsem na papa bilong em John Williams i mekim bikpela long em na ol brata na susa bilong em. John i skulim Thomas long wok kapenta, tasol Thomas i laik mekim narapela wok.

Long dispela taim, evanselis John Wesley i lusim Sios Bilong Inglan na i kamapim grup em ol i kolim Society of Methodists. Dispela grup i kirapim ol man long stadi long Baibel na mekim wok evanselis. Planti man long Inglan, na ol tumbuna bilong mi tu i joinim dispela grup na ol i strong long bihainim ol bilip bilong ol. Thomas i kamap evanselis bilong lotu Weslian, na kwiktaim em i volantia long mekim wok misineri long ol ailan long Saut Pasifik. Long Julai 1840, em na meri bilong em, Mary (2) i go long Lakeba Island, b Fiji. Dispela ailan i gat ol volkeno, na ol asples lain i save kaikai ol man.

Taim Thomas na Mary i go long Fiji, ol i bungim sampela hevi. Long olgeta de, ol i mas wok inap planti aua maski ples i hot tru, na tu, ol asples lain i no laik harim ol tok tupela i autim. Ol asples i save pait long narapela narapela, ol i kilim i dai ol wido na ol pikinini, na kaikai ol man. Na tu, Mary na fesbon pikinini bilong em John i sik na klostu ol i dai. Long 1843, Thomas i rait long notbuk bilong en olsem: “Mi bel hevi tru. . . . Mi no save bai mi mekim wanem.” Tasol Thomas na Mary i holimpas bilip bilong ol long God Jehova na dispela i strongim ol.

Thomas i save gut long wok kapenta, olsem na em i wokim wanpela haus long stail bilong ol Yurop. Dispela haus i gat ol longpela pos, na em i wokim ol nupela samting long haus em ol asples lain i no bin lukim long bipo. Paslain liklik long em i pinis long wokim dispela haus, Mary i karim namba 2 pikinini man bilong ol, em Thomas Whitton (3) Williams.

Long 1843, Thomas (em papa bilong ol) i helpim wok bilong tanim tok bilong Gutnius Bilong Jon long tok Fiji. Maski dispela wok i gat hatwok bilong en, Thomas i gat save long skelim gut sindaun na pasin bilong ol man, na dispela i helpim em long tanim tok. c Em i raitim buk Fiji and the Fijians (1858), na long dispela buk em i stori long i stap bilong ol man long Fiji long yia 1850 samting.

Thomas i wok misineri long Fiji inap 13 yia olgeta, tasol bihain helt bilong em i no gutpela moa, olsem na  em na famili i lusim Fiji na go sindaun long Australia. Thomas i wok pasto inap longpela taim, na long 1891 em i dai long Ballarat, Victoria.

Long 1883, Thomas Whitton Williams na meri bilong em Phoebe, (4) na ol pikinini i go sindaun long Perth, Western Australia. Long dispela taim, namba 2 pikinini bilong ol Arthur Bakewell (5) Williams i gat 9-pela krismas.

Taim Arthur i gat 22 krismas, em i go wok long Kalgoorlie, em taun i gat planti wok bisnis bilong painim gol. Dispela taun i stap longwe long hap is bilong Perth inap 600 kilomita samting. Long dispela hap, em i ritim ol buk na nius bilong ol Intenesenel Sumatin Bilong Baibel, em nem bilong ol Witnes Bilong Jehova long bipo. Na tu, em i putim sabskripsen long kisim nius Zion’s Watch Tower. Arthur i amamas long ritim ol dispela nius, na em i stori wantaim ol narapela long save em i kisim, na tu, em i mekim ol bung bilong stadi long Baibel. Kirap long dispela taim, rot i op long ol Witnes Bilong Jehova long Western Australia long mekim ol wok lotu bilong ol i kam inap long nau.

Na tu, Arthur i tokim famili bilong em long ol samting em i kisim save long en. Thomas Whitton em papa bilong Arthur, i amamas olsem pikinini bilong em i bung wantaim ol Sumatin Bilong Baibel, tasol bihain liklik Thomas i dai. Phoebe em mama bilong Arthur, na Violet na Mary em ol susa bilong Arthur, ol tu i kamap ol Sumatin Bilong Baibel. Violet i wok painia, dispela i makim olsem em i save autim tok fultaim. Arthur i tok, Violet “i wanpela bilong ol painia long Western Australia husat i givim bel tru long autim tok.” Violet i mekim wok bilong God, na em i stap gutpela piksa long ol tumbuna bilong en i ken bihainim.

Bihain, Arthur i marit na i go sindaun long Donnybrook, em taun i stap long hap saut-wes bilong Western Australia na ol i save planim ol diwai prut. Ol man i save kolim em “Old Mad 1914!”, long wanem, em i givim bel long autim ol tok profet bilong Baibel i stori long 1914. d Tasol taim Wol Woa 1 i kirap, ol i no tok pani moa long em. Arthur i gat wanpela stua, na em i save putim ol nius bilong Baibel long windo na bai ol man i ken lukim, na oltaim em i autim tok long ol kastoma. Em i no bilip long God Triwan, olsem na em i putim sain long windo i tokaut olsem sapos wanpela i soim olsem Baibel i as bilong bilip bilong God Triwan, orait em bai givim pe long em inap olsem 100 paun bilong Australia. Tasol i no gat man i bin kisim dispela mani.

Haus bilong famili bilong Williams i stap long Donnybrook. Ol i save mekim ol bung bilong stadi long Baibel na ol kongrigesen miting long dispela hap. Bihain, Arthur i sanapim wanpela Haus Kingdom bilong ol i ken mekim ol bung bilong ol. Dispela em wanpela bilong ol fes Haus Kingdom long Western Australia. Taim Arthur i gat 70 krismas samting, em i save werim ol gutpela klos na raun long hos em nem bilong en Doll bilong autim tok long ol ples long distrik bilong Donnybrook.

 Arthur i no man bilong toktok, tasol em i save givim bel tru long autim tok, na em i stap gutpela piksa long ol pikinini bilong em. Pikinini meri bilong em Florence (6) i wok misineri long India. Na ol pikinini man bilong em, Arthur Lindsay (7) na Thomas i mekim wok elda long kongrigesen inap longpela taim, wankain olsem papa bilong ol.

Arthur Lindsay Williams em tumbuna papa bilong mi. Ol man i laikim em, long wanem, em i man bilong mekim gutpela pasin. Oltaim em i save rispektim ol narapela na helpim ol. Na tu, em i hapman bilong yusim tamiok long katim ol diwai. Insait long 12-pela yia, em i winim 18 kompetisen we ol man i resis long katim ol diwai.

Wanpela taim, pikinini man bilong Arthur em Ronald (8) (bubu man bilong mi) husat i gat 2-pela krismas long dispela taim i kisim tamiok na katim liklik diwai apol klostu long haus bilong ol. Tasol mama bilong Ronald i pasim namel bilong dispela diwai, na bihain diwai i karim ol apol i swit tru. Ol i givim nem long ol dispela apol olsem Lady Williams. Bihain dispela apol i kamapim nupela kain pikinini em ol i kolim apol Cripps Pink. Planti man i save laikim dispela apol.

Inap planti yia, Ronald em bubu man bilong mi na bubu meri i mekim wok volantia long ol konstraksen projek bilong ol Witnes long Australia na Solomon Ailan. Nau em i gat klostu 80 krismas na i mekim wok elda long kongrigesen, na em i save helpim wok bilong sanapim na stretim ol Haus Kingdom long Western Australia.

Papamama bilong mi, Geoffrey (9) na Janice (10) Williams i bihainim pasin bilong famili long laikim tok i tru. Ol i wok hat long mekim bikpela long mi (12) na susa bilong mi Katharine, (11) na ol i skulim mipela long bihainim ol stiatok Kristen. Taim mi gat 13 krismas, mi mekim ol samting bilong pas gut wantaim Jehova. Long wanpela kibung Kristen, mi harim brata John E. Barr, em wanpela memba bilong Gavening Bodi Bilong Ol Witnes Bilong Jehova i mekim wanpela tok i go long ol yangpela. Em i tok: “Lukautim gut pasin bilong yu long kisim save long Jehova na laikim em. Dispela em gutpela samting tru i winim olgeta narapela samting.” Long dispela nait bihain long kibung i pinis, mi dediketim laip bilong mi long Jehova. Tupela yia bihain, mi kirap mekim wok painia.

Long nau, mi amamas long autim tok fultaim wantaim meri bilong mi Chloe, long Tom Price, em liklik taun long hap not-wes bilong Western Australia. Mipela i wok pat-taim long lukautim mipela yet. Papamama bilong mi, na susa bilong mi Katharine na man bilong em Andrew i painia long Port Hedland, em taun i stap 420 kilomita long hap not bilong Western Australia. Na tu, mi na papa i mekim wok elda long kongrigesen.

Kirap long tumbuna papa bilong mi Thomas Williams, 7-pela lain tumbuna bilong mi i tingting strong long mekim wok bilong God Jehova, olsem na mi kisim pasin bilong bilip na mekim wok bilong God. Mi amamas tru, long wanem, mi kamap insait long famili i givim bel tru long lotuim God Jehova.