Rijinel kibung bilong 2020 em fes kibung we ol i rekodim na i stap long Intenet na i kamap long olgeta hap bilong graun! Tasol long Malawi na Mosambik, planti brata na sista bilong yumi i lukim kibung, tasol ol i no yusim Intenet. Olsem wanem dispela samting i kamap?

 Komiti Bilong Ol Kodineta na Komiti Bilong Wok Tisa bilong Gavening Bodi i givim tok orait long brodkastim kibung long rot bilong TV na redio long Malawi na Mosambik. Wai na ol i mas mekim olsem? Malawi em wanpela bilong ol kantri long graun we pe bilong baim data bilong yusim Intenet em ekspensiv tru, olsem na sampela Witnes tasol inap yusim Intenet. William Chumbi, em memba bilong Brens Komiti Bilong Malawi, em i tok: “Redio na TV em wanpela rot tasol bilong givim kaikai long sait bilong bilip long ol brata na sista.” Luka Sibeko, em tu em wanpela memba bilong Brens Komiti Bilong Malawi, em i tok: “Sapos mipela i no bin kisim kibung long rot bilong TV na redio, sampela bratasista tasol long brens teritori bilong mipela bai kisim helpim long dispela kibung.” Long Mosambik tu, sampela brata tasol inap baim ol tablet na fon na lukim kibung long Intenet.

 Bikos long COVID-19 pendemik, sampela TV na redio stesin i wok long brodkastim ol kongrigesen miting. a Ol brata i kontektim ol dispela TV na redio stesin na mekim rikwes long edim sampela moa aua na bai ol inap brodkastim kibung.

 Long Malawi, ol brata i bungim wanpela hevi. Ol brodkasting stesin i save givim wanpela aua tasol long ol kastama long brodkastim ol program bilong ol. Ol redio stesin i tingting planti bikos ol manmeri inap pilim les long harim longpela program. Tasol ol brata i eksplenim olsem wok yumi mekim em bilong helpim ol manmeri. Long taim bilong lokdaun tu, mipela i helpim ol manmeri long kisim ol gutpela nius i kam long Baibel, na dispela inap mekim isi bel bilong ol, na helpim ol long stap gutpela sitisen na stap amamas insait long famili bilong ol. Taim ol stesin i harim dispela tok, ol i ekseptim rikwes bilong ol brata long edim sampela moa aua.

 Long Malawi, ol i brodkastim kibung long wanpela TV stesin na wanpela redio stesin, na tupela wantaim inap brodkastim program i go long kantri olgeta na planti milion manmeri inap harim program. Long Mosambik, ol i brodkastim kibung long wanpela TV stesin na 85 redio stesin.

 Long tupela kantri wantaim, ol i spendim 28,227 dola b long brodkastim kibung long TV na klostu 20,000 dola long brodkastim long redio. Pe bilong mekim brodkast long redio em 15 dola long wanpela liklik redio stesin na 2,777 dola long bikpela redio stesin.

 Ol brata i wok strong long yusim gut ol donesen. Eksampel, long Malawi, ol brata i askim long ol diskaun, na ol stesin i wanbel long givim diskaun, na wanpela stesin i givim 30 pesen diskaun. Ol dispela diskaun i seivim sampela mani inap olsem 1,711 dola. Long Mosambik, sampela redio stesin i redi long daunim pe bilong ol bikos long onest pasin bilong yumi na pasin bilong baim stret long taim.

 Ol bratasista i amamas tru long lukim o harim kibung long ol TV stesin na ol redio stesin. Patrick, wanpela elda long Malawi, em i tok: “Mipela i tok tenkyu long ol brata long Gavening Bodi long tingim gut mipela long dispela taim bilong pendemik.” Isaac, em tu bilong Malawi, em i tok: “Mipela i no gat fon o teblet, so mipela i tenkyu tru long dispela spesel blesing i kam long oganaisesen bilong Jehova we mipela inap harim kibung long redio. Long rot bilong dispela blesing, famili olgeta bilong mi i kisim helpim long rot bilong dispela kibung. Dispela i helpim mipela long luksave tru olsem Jehova i laikim tru ol manmeri bilong em.”

 Kibung bilong 2020 em fes kibung bilong wanpela pablisa long Mosambik. Em i tok: “Taim mi watsim kibung long TV, dispela i kirapim mi long tingim olsem Jehova em God i gat olgeta strong. Dispela pendemik i no stopim em long givim kaikai bilong strongim bilip bilong mipela, na dispela kaikai inap kam insait stret long haus bilong mi. Mi lukim evidens bilong pasin laikim i stap namel long lain bilong Jehova. Mi bilip tru olsem dispela em lotu i tru.”

 Wanpela elda nem bilong em Wyson, em i tok: “Mi laik kamapim tenkyu bilong mi long ol samting em wokboi i gat savetingting i mekim bilong lukautim mipela long taim bilong pendemik. Taim ol i stretim rot long brodkastim kibung long redio na TV, planti bilong mipela inap harim na lukim program na dispela i bin helpim tru mipela, maski mipela i karim bikpela hevi bilong mani long dispela hap bilong graun we ol manmeri i stap rabis tru.”

 Komiti Bilong Ol Kodineta na Komiti Bilong Wok Tisa bilong Gavening Bodi i givim tok orait long brodkastim 2021 rijinel kibung long rot bilong TV na redio long sampela komiuniti we ol i makim. Olsem wanem mipela inapim pe bilong brodkastim ol kibung long ol dispela rot? Em long rot bilong ol donesen bilong sapotim wok long olgeta hap, na planti bilong ol dispela donesen i kam long kain kain wei olsem i stap long donate.mr1310.com. Tenkyu tru long ol kontribiusen bilong yupela.