Jisas i Luk Olsem Wanem?
Bekim bilong Baibel
I no gat wanpela i save long Jisas i luk olsem wanem, long wanem Baibel i no stori long lukluk bilong em. Dispela i makim olsem lukluk bilong Jisas i no bikpela samting. Tasol Baibel i givim yumi sampela aidia long lukluk bilong em i olsem wanem.
Lukluk bilong Jisas: Mama bilong Jisas em wanpela meri Juda, olsem na i lukim olsem em i kisim skin kala bilong mama bilong em. (Hibru 7:14) Na em i luk wankain tasol long ol narapela Juda. Wanpela taim em i hait na lusim Galili na i go long Jerusalem na i no gat wanpela i luksave long em. (Jon 7:10, 11) Na em i no luk narapela kain long ol disaipel bilong em tu. Tingim, Judas Iskariot i givim wanpela sain long ol man i kam bilong arestim Jisas na bai ol i luksave long Jisas.—Matyu 26:47-49.
Gras bilong em: I luk olsem gras bilong Jisas i no longpela, long wanem, Baibel i tok “man i gat longpela gras, dispela i semim em.”—1 Korin 11:14.
Mausgras: Jisas i gat mausgras. Em i bihainim lo bilong ol Juda, we i tambuim ol man long ‘katkatim nabaut arere bilong mausgras bilong ol.’ (Wok Pris 19:27; Galesia 4:4) Na tu, Baibel i stori long mausgras bilong Jisas long wanpela tok profet taim em i stori long pen na hevi Jisas bai karim.—Aisaia 50:6.
Bodi bilong em: Stori bilong Baibel i soim olsem Jisas i gat strongpela bodi. Long taim em i raun mekim wok autim tok, em i wokabaut inap planti handret kilomita. (Matyu 9:35) Tupela taim em i klinim tempel bilong ol Juda, em i kapsaitim tebol bilong ol man i save senisim mani, na yusim wip long rausim ol bulmakau na ol sipsip long tempel. (Luk 19:45, 46; Jon 2:14, 15) Buk Cyclopedia bilong McClintock na Strong i tok: “Olgeta stori bilong Jisas yumi ritim long fopela Gutnius i soim olsem em i gat strongpela na helti bodi.”—Volume IV, pes 884.
Pes bilong em: Jisas i gat gutpela pasin na pasin sori, na pes bilong em i kamapim klia dispela. (Matyu 11:28, 29) Kain kain manmeri i save kam long em bilong em i ken mekim isi bel bilong ol na helpim ol. (Luk 5:12, 13; 7:37, 38) Ol liklik pikinini tu i no pret long stap klostu long em.—Matyu 19:13-15; Mak 9:35-37.
Ol tingting kranki ol man i gat long lukluk bilong Jisas
Tingting kranki: Sampela i tok Jisas em bilong Afrika, bikos long Buk Revelesen em i stori long gras bilong em i olsem wul na lek bilong em i olsem “lait olsem gutpela kopa.”—Revelesen 1:14, 15.
Tok tru: Ol tok bilong Buk Revelesen em ol piksa i makim ol samting. (Revelesen 1:1) Buk Revelesen i tok piksa long gras na lek bilong Jisas bilong makim ol pasin bilong Jisas bihain long em i kirap bek, na em i no stori long lukluk bilong Jisas taim em i stap long graun. Revelesen 1:14 i tok “gras long het bilong[Jisas] i waitpela olsem waitpela wul, na olsem waitpela sno,” tok bilong dispela ves i stori long kala bilong gras na em i no stori long gras i malumalum o strongpela gras. Dispela em tok piksa na i makim savetingting bilong Jisas, long wanem, em i stap long bipo yet na i kam.—Revelesen 3:14.
“Tupela lek bilong [Jisas] i lait olsem gutpela kopa i lait strong insait long hatpela aven.” (Revelesen 1:15) Na tu, pes bilong em “i lait olsem san i lait strong tru.” (Revelesen 1:16) I no gat wanpela lain long graun i gat kain skin kala olsem Baibel i kolim, dispela visen em tok piksa tasol, na i soim Jisas taim em i kirap bek olsem man “em i stap long lait we i no gat wanpela man inap i go klostu long en.”—1 Timoti 6:16.
Tingting kranki: Jisas i no gat strongpela skin.
Tok tru: Jisas i gat strongpela skin na em i no olsem ol meri. Olsem, em i no pret long tokaut long em i husat taim ol man i kam bilong arestim em. (Jon 18:4-8) Na tu, Jisas i gat strongpela bodi, long wanem, em i bin mekim wok kapenta na em i save holim ol tul long han bilong em na mekim wok.—Mak 6:3.
Orait, wai na Jisas i nidim wanpela long helpim em long karim diwai pos bilong em? Na wai na em i dai paslain long narapela tupela em ol i hangamap wantaim em? (Luk 23:26; Jon 19:31-33) Paslain long em i dai, bodi bilong em i no gat strong olgeta. Em i bin stap long nait olgeta i go inap long moning, na bel bilong em i bel hevi tru. (Luk 22:42-44) Long nait ol Juda I mekim nogut tru long em, na long neks moning ol Rom i paitim em na mekim nogut tru long em. (Matyu 26:67, 68; Jon 19:1-3) Ol dispela samting i mekim na em i dai hariap.
Tingting kranki: Oltaim Jisas i stap bel hevi na em i no amamas.
Tok tru: Jisas i kamapim gut pasin bilong Papa bilong em long heven, Jehova, em Baibel i stori long em i “God bilong amamas” (1 Timoti 1:11; Jon 14:9) Jisas i skulim ol narapela long stap amamas. (Matyu 5:3-9; Luk 11:28) Ol dispela samting i kamapim olsem oltaim pes bilong Jisas i soim olsem em i stap amamas.
Ating Yu Bai Laikim Tu
OL BIKPELA TOK BILONG BAIBEL
Olsem Wanem Yumi Ken Save Olsem Tok Bilong Baibel i Tru?
Sapos God i kamapim ol tok bilong Baibel, dispela buk bai winim olgeta narapela buk.
MIPELA OL WITNES
Askim Long Wanpela i Ken Kam Lukim Yu
Kisim bekim bilong wanpela askim bilong Baibel, o kisim sampela save moa long Ol Witnes Bilong Jehova.