Long Baibel, dispela hap tok “kirap bek” ol i kisim long wanpela tok Grik a·naʹsta·sis, mining bilong en “kirap” o “sanap gen.” Man i kirap bek em i kirap long dai na kisim laip gen na stap olsem em i bin stap long bipo.​—1 Korin 15:12, 13.

 Tru, dispela hap tok “kirap bek” i no stap long Ol Skripsa Hibru, em planti taim ol i kolim Olpela Testamen, tasol bilip bilong kirap bek i stap long dispela hap bilong Baibel. Olsem, long rot bilong profet Hosea God i tok promis olsem: “Bai mi kisim bek ol long bikpela strong bilong Matmat; bai mi kisim bek ol long dai.”​—Hosea 13:14; Jop 14:13-15; Aisaia 26:19; Daniel 12:2, 13.

 Ol man bai kirap bek long wanem hap? Sampela manmeri bai kirap bek na kisim laip long heven bilong mekim wok king wantaim Krais. (2 Korin 5:1; Revelesen 5:9, 10) Baibel i kolim dispela kirap bek olsem “namba 1 kirap bek” na “kirap bek i kamap pastaim,” dispela tupela hap tok i makim olsem bai i gat narapela kirap bek tu. (Revelesen 20:6; Filipai 3:11) Dispela narapela kirap bek em bilong ol man bai kisim laip long graun, em bikpela lain manmeri ol bai kirap bek na stap amamas long graun.​—Buk Song 37:29.

 Ol manmeri bai kirap bek olsem wanem? God i givim strong long Jisas long kirapim bek ol man i dai pinis. (Jon 11:25) Jisas bai kirapim bek “olgeta man i stap long matmat” na ol bai stap laip gen. Olgeta wan wan bai kirap bek wantaim pasin na tingting bilong ol olsem bilong bipo. (Jon 5:28, 29) Ol man i kirap bek na kisim laip long heven ol bai kisim bodi bilong spirit, na ol man i kirap bek na kisim laip long graun, ol bai kisim bodi i helti na i gutpela olgeta.​—Aisaia 33:24; 35:5, 6; 1 Korin 15:42-44, 50.

 Husat bai kirap bek? Baibel i tok “bai i gat kirap bek bilong ol man i dai pinis, em ol stretpela man na ol man nogut wantaim.” (Aposel 24:15) Ol stretpela manmeri bai kirap bek em ol lain olsem Noa, Sara, na Abraham. (Stat 6:9; Hibru 11:11; Jems 2:21) Ol man nogut em ol man i no bihainim tok bilong God, long wanem, ol i no gat rot long kisim save long em.

 Tasol ol man i mekim pasin nogut tru na ol i no inap tanim bel ol bai i no inap kirap bek. Taim ol dispela man i dai, ol bai pinis olgeta na ol i no inap kirap bek.​—Matyu 23:33; Hibru 10:26, 27.

 Wanem taim bai kirap bek i kamap? Baibel i tok profet olsem kirap bek bilong ol man bai go long heven bai kamap long taim Krais i kam i stap, dispela i kirap long 1914. (1 Korin 15:21-23) Kirap bek bilong ol man long graun bai kamap long taim bilong Wan Tausen Yia Bilong Jisas Krais i Stap King, taim graun i kamap Paradais.​—Luk 23:43; Revelesen 20:6, 12, 13.

 Wai na i stret yumi ken bilip olsem bai i gat kirap bek? Baibel i stori long 9-pela kirap bek bilong ol manmeri, na i gat ol man i bin lukim ol i kirap bek. (1 King 17:17-24; 2 King 4:32-37; 13:20, 21; Luk 7:11-17; 8:40-56; Jon 11:38-44; Aposel 9:36-42; 20:7-12; 1 Korin 15:3-6) Taim Jisas i bin kirapim bek Lasarus dispela i bikpela samting, long wanem, Lasarus i bin dai inap 4-pela de pinis na Jisas i wokim dispela mirakel long ai bilong bikpela lain manmeri. (Jon 11:39, 42) Ol man i birua long Jisas ol tu i save olsem Jisas i bin kirapim bek Lasarus, olsem na ol i pasim tok long kilim i dai Jisas na Lasarus.​—Jon 11:47, 53; 12:9-11.

 Baibel i soim olsem God i gat strong na laik long kirapim bek ol man i dai pinis. Em i tingim olgeta samting bilong olgeta wan wan man em bai kirapim bek long rot bilong bikpela strong bilong em. (Jop 37:23; Matyu 10:30; Luk 20:37, 38) God inap long givim bek laip long ol man i dai pinis, na em i gat laik tru long mekim olsem! Baibel i stori long kirap bek em klostu nau bai kamap, na i tok long God olsem: “Bai yu gat bikpela laik tru long lukim samting em yu yet i bin wokim.”​—Jop 14:15.

Ol tingting kranki long kirap bek

 Stori nating: Kirap bek em olsem spirit na bodi i bung gen wantaim.

 Tok tru: Baibel i tok olsem taim man i dai, em i no stap laip moa, i no gat wanpela spirit i lusim bodi bilong em na i stap laip yet long wanpela hap, nogat. (Eklisiastis 9:5, 10) Olsem na, taim man i kirap bek, bodi bilong em na spirit i no bung gen, nogat; God i wokim em gen na em i stap laip.

 Stori nating: Sampela manmeri bai kirap bek na wantu ol bai kisim bagarap na pinis olgeta.

 Tok tru: Baibel i tok olsem “ol man i bin mekim ol stingpela pasin,” ol bai ‘kirap bek bilong kisim kot.’ (Jon 5:29) Tasol God bai kotim ol long ol samting ol i mekim bihain long ol i kirap bek, i no paslain long en. Jisas i tok: “Ol daiman bai harim nek bilong Pikinini Bilong God na ol man i bihainim tok ol bai stap laip.” (Jon 5:25) Ol man i “bihainim tok” em ol i lainim bihain long ol i kirap bek, nem bilong ol bai i stap long “book of life.”​—Revelesen 20:12, 13.

 Stori nating: Taim man i kirap bek, em bai i gat wankain bodi em i bin i gat paslain long em i dai.

 Tok tru: Bihain long man i dai, bodi bilong em bai i sting na pinis olgeta.​—Eklisiastis 3:19, 20.