Maniman na Lasarus em 2-pela man insait long wanpela stori em Jisas i bin mekim. (Luk 16:19-31) Long dispela stori, dispela 2-pela man i makim 2-pela grup: (1) ol bikman bilong lotu Juda long taim bilong Jisas em ol i gat pasin antap na (2) ol man nating em ol i gat gutpela bel na ol i amamas long ol tok Jisas i autim.

Long dispela atikol

•  Jisas i tok wanem long maniman na Lasarus?

•  Dispela em wanpela stori tru?

•  Dispela stori i sapotim bilip bilong helpaia?

•  Wanem mining bilong stori bilong maniman na Lasarus?

 Long Luk sapta 16, Jisas i stori long 2-pela man em bikpela senis i kamap long laip bilong tupela.

 Hia em stori Jisas i bin mekim: Wanpela maniman i gat gutpela sindaun. Wanpela rabisman, nem bilong em Lasarus, i save sindaun long geit bilong dispela maniman; em i laik tru long kisim ol hap hap kaikai i save pundaun long tebol bilong maniman. Bihain Lasarus i dai, na ol ensel i karim em i go stap long sait bilong Abraham. Na maniman tu i dai na ol i planim em. Long dispela stori, dispela 2-pela man i stap laip gen bihain long ol i dai. Dispela maniman husat i dai em i karim pen na hevi long bikpela paia na em i askim Abraham long salim Lasarus i go putim pinga bilong em long wara na kam mekim kol tang bilong em. Abraham i no mekim samting em maniman i askim long en, em i tok bikpela senis i kamap long laip bilong tupela na i gat wanpela bikpela baret i stap namel long tupela na ol i no inap brukim dispela baret na go long narapela sait.

 Nogat. Dispela em wanpela tok piksa Jisas i mekim bilong givim skul long ol man. Ol saveman i tok dispela stori em wanpela tok piksa. Olsem, wanpela liklik het tok long 1912 edisen bilong Baibel bilong Luther i tok dispela stori em wanpela tok piksa. Na long Jerusalem Bible bilong Katolik, wanpela futnot i tok “dispela stori em wanpela tok piksa na em i no stori long ol man i bin stap tru.”

 Yu ting Jisas i skulim ol manmeri olsem man i stap laip yet bihain long em i dai? Yu ting Jisas i laik tok olsem ol manmeri i save karim pen na hevi long helpaia taim ol i dai na Abraham na Lasarus i stap long heven? I gat sampela samting i soim olsem ol dispela tingting i no stret.

 Olsem:

•   Sapos tru tru dispela maniman i stap long wanpela ples i gat bikpela paia na em i karim pen na hevi, orait paia bai draim wara i stap long pinga bilong Lasarus.

•   Maski sapos dispela wara long pinga bilong Lasarus i no drai, dispela liklik hap wara i no inap tru long helpim dispela maniman long daunim pen na hevi em i karim long bikpela paia.

•   Abraham i no stap laip long heven bikos Jisas i bin tokaut klia olsem i kam inap long taim em i mekim dispela tok piksa, i no gat wanpela man i bin go long heven.​—Jon 3:13.

 Nogat. Maski dispela stori em i no wanpela stori tru, sampela man i tok em i makim olsem ol gutpela man i go long heven na ol man nogut i karim pen na hevi long helpaia. a

 Yu ting dispela tingting i stret? Nogat.

 Bilip bilong helpaia i no stret wantaim tok Baibel i mekim long samting i painim ol man i dai pinis. Olsem, Baibel i no tok olsem olgeta gutpela man husat i dai i go long heven na ol i stap amamas tru, na em i no tok tu olsem ol man nogut i karim pen na hevi long helpaia. Baibel i tokaut stret olsem: “Ol man i stap laip ol i save olsem ol bai dai, tasol ol man i dai pinis ol i no save long wanpela samting.”​—Eklisiastis 9:5.

 Dispela stori i soim olsem bikpela senis bai kamap long laip bilong 2-pela grup bilong ol manmeri.

 Maniman i makim ol bikman bilong lotu Juda, “em ol i save laikim tumas mani.” (Luk 16:14) Ol i harim ol tok Jisas i autim, tasol ol i sakim ol dispela tok. Ol dispela bikman bilong lotu i luk daun long ol man nating.​—Jon 7:49.

 Lasarus i makim ol man nating em ol i amamas long ol tok Jisas i autim na ol bikman bilong lotu Juda i save heitim ol.

 Bikpela senis i kamap long laip bilong ol manmeri long dispela 2-pela grup.

•   Ol bikman bilong lotu Juda i ting olsem God i amamas long ol. Tasol i olsem ol i dai pinis taim God i sakim ol na lotu bilong ol bikos ol i no laikim ol tok Jisas i autim. Na ol tok Jisas na ol disaipel bilong em i autim i olsem samting i givim bikpela pen na hevi long ol.​—Matyu 23:29, 30; Aposel 5:29-33.

•   Ol man nating—em ol bikman bilong lotu i no bin lukautim gut ol inap longpela taim—nau ol i kisim gutpela helpim. Planti bilong ol i amamas long ol tok bilong Ol Skripsa em Jisas i autim na ol dispela tok i helpim ol. Nau rot i op long God inap mekim gut long ol inap oltaim oltaim.​—Jon 17:3.