Baibel i no yusim dispela tok “rausim bel” long stori long pasin bilong rausim pikinini i stap yet long bel bilong mama. Tasol planti ves bilong Baibel i stori long tingting bilong God long laip bilong man, na dispela i makim tu laip bilong pikinini i no bon yet.

 Laip em presen i kam long God. (Stat 9:6; Buk Song 36:9) Em i tingim olgeta laip olsem samting i dia tumas, na dispela i makim tu laip bilong pikinini i stap yet long bel bilong mama. Olsem na sapos wanpela i min na kilim i dai pikinini i stap long bel, dispela em wankain olsem man i kilim i dai wanpela man.

 Lo God i givim long lain Israel i tok: “Sapos sampela man i pait na wanpela bilong ol i paitim meri i gat bel na meri i karim pikinini paslain long taim stret bilong en, tasol mama na bebi wantaim i no dai, orait dispela man i paitim meri i mas givim mani bilong stretim rong olsem man bilong dispela meri i tokim em long mekim; em i mas baim inap long mak em ol jas i makim long em i mas baim. Tasol sapos meri o bebi i dai, orait yupela i mas givim laip bilong senisim laip i lus.”—Kisim Bek 21:22, 23. a

•  Yu ting laip bilong man i stat long wanem taim?

•  Yu ting God bai fogivim wanpela i bin rausim bel?

•  Yu ting i stret long rausim bel sapos laip bilong mama o bebi bai lus?

 Long ai bilong God, laip bilong man i stat taim meri i gat bel. Long Baibel, God i stori long pikinini i stap long bel bilong mama olsem wanpela man tru. Skelim sampela tok bilong Baibel i soim olsem God i tingim tru laip bilong pikinini, maski em bebi i stap yet long bel bilong mama o em bebi i bon pinis.

•   Holi Spirit i bin stiaim King Devit na em i tokim God olsem: “Ai bilong yu i lukim mi taim mi stap blut yet.” (Buk Song 139:16) Taim Devit i no bon yet, God i tingim Devit olsem wanpela man i stap tru.

•   Na tu, paslain long profet Jeremaia i bon, God i save olsem em bai givim wanpela spesel wok long Jeremaia. God i tokim em: “Taim mi no mekim yu i kamap yet long bel bilong mama, mi save long yu, na taim mama i no karim yu yet, mi makim yu bilong mekim wanpela spesel wok em wok profet namel long ol kantri.”—Jeremaia 1:5.

•   Luk em wanpela dokta na em tu i bin raitim Baibel, na em i yusim wankain tok Grik long makim bebi i no bon yet na bebi i bon nupela.—Luk 1:41; 2:12, 16.

 God inap fogivim ol meri i bin rausim bel. Sapos nau ol i kliagut olsem em i bikpela rong long rausim bel, ating bel bilong ol bai kotim ol, tasol God i no laik bai ol i pilim olsem em i no inap fogivim ol. “Jehova i gat pasin marimari na pasin sori . . . Hap bilong sankamap i stap longwe tru long hap bilong san i go daun, olsem tasol em i save rausim ol sin bilong yumi i go longwe tru long yumi.” b (Buk Song 103:8-12) Jehova bai fogivim olgeta manmeri i tanim bel tru long ol rong ol i mekim long bipo, na dispela i makim tu rong bilong meri i rausim bel.—Buk Song 86:5.

 Taim yumi tingim ol tok em Baibel i mekim long laip bilong bebi i no bon yet, dispela i soim olsem i no stret long rausim bel maski sapos hevi inap kamap long mama o bebi.

 Olsem wanem sapos long taim mama i laik karim bebi na hevi i kamap na ol i luksave olsem ol i mas wokim disisen long seivim laip bilong mama o seivim laip bilong bebi? Long kain taim olsem, man i mas wokim disisen olsem dokta bai seivim laip bilong mama o laip bilong bebi.