Ol Witnes Bilong Jehova i no save insait long woa na hia em ol risen:

1.   Bihainim tok bilong God. Baibel i tok, ol wokman bilong God bai “paitim bainat bilong ol i kamap ain bilong brukim graun” na “bai ol i no skul moa long pait.”—Aisaia 2:4.

2.   Bihainim tok bilong Jisas. Jisas i tokim aposel Pita olsem: “Putim bainat bilong yu i go bek long ples bilong en, long wanem, ol man i yusim bainat, ol bai dai long rot bilong bainat.” (Matyu 26:52) Jisas i soim olsem ol disaipel bilong em i no inap holim ol samting bilong pait.

    Ol disaipel bilong Jisas i bihainim tok bilong em long stap olsem ol i “no bilong dispela graun,” olsem na ol i no insait liklik long wok politik. (Jon 17:16) Ol i no protes long agensim ol samting ol ami i mekim, na tu, ol i no stopim ol lain husat i laik joinim ami.

3.   Laikim tru ol narapela. Jisas i tokim ol disaipel bilong em long “laikim narapela narapela.” (Jon 13:34, 35) Long dispela rot, ol bai kamapim wanpela lain brata i stap long olgeta hap bilong graun, olsem na ol i no inap pait long brata o sista bilong ol.—1 Jon 3:10-12.

4.   Eksampel bilong ol Kristen bilong bipo. Buk Encyclopedia of Religion and War i tok: “Ol disaipel bilong Jisas long bipo i no bin insait long woa na ami” bikos ol i luksave olsem ol dispela pasin “i no stret wantaim pasin laikim bilong Jisas na lo em i givim long man i mas laikim ol birua bilong em.” Na tu, wanpela tisa bilong lotu, em Peter Meinhold bilong Jemani, em i kamapim tingting bilong ol disaipel bilong Jisas long pastaim na em i tok: “Ol i pilim olsem em bikpela rong tru sapos man i laik stap olsem wanpela Kristen na long seim taim em i laik stap olsem wanpela soldia.”

 Ol Witnes Bilong Jehova i save helpim komiuniti, na ol i no inap mekim wanpela samting bilong bagarapim seifti bilong kantri ol i stap long en. Mipela i rispektim wok bos bilong gavman, olsem ol dispela ves bilong Baibel i tok long en:

•   “Olgeta man i mas aninit long ol gavman.”—Rom 13:1.

•   “Ol samting bilong Sisar, givim long Sisar, na ol samting bilong God, givim long God.”—Matyu 22:21.

 Olsem na mipela i save bihainim ol lo, baim takis, na rispektim ol samting gavman i mekim bilong helpim komiuniti.