Planti tausen visita i bin kam long 2014 Rouen Intenesenel Sou long hap not bilong Frans, na ol inap lukim klia wanpela sain long haus win, na sain i tok “Baibel—Asde, Tude, na Tumora.”

Ausait long haus win i gat ol flet skrin we i pilaim vidio klip i stori long ol Baibel manuskrip bilong bipo, na dispela i pulim ai bilong planti moa manmeri. Taim ol visita i go insait long haus win, ol inap kisim save long ol gutpela edvais bilong Baibel, na olsem wanem ol tok bilong en i stret wantaim histori na saiens, na hamas tokples ol i bin trensletim ol tok bilong Baibel i go long en, na hamas namba bilong ol Baibel ol i bin prinim.

Displei i soim tu hau Baibel i abrusim bagarap maski ol birua i laik bagarapim na pinisim olgeta, na nau planti bilion manmeri i gat kopi bilong Baibel we ol i prinim o long rot bilong fon o teblet. Ol visita i kisim fri kopi bilong Nupela Taim Trenslesen, em Baibel we ol Witnes Bilong Jehova i wokim na trensletim long moa long 120 tokples.

Planti visita i tok amamas long pasin bilong ol Witnes long stretim rot na ol manmeri bilong pablik inap kisim wanpela kopi bilong Baibel. Wanpela yangpela meri i save mekim wok bilong helpim ol tineja, na taim em i lukluk long displei wantaim sampela tineja, em i tok: “Baibel em samting we yumi mas i gat. Ol tok bilong dispela buk i gat strong. Long olgeta taim mi ritim, mi save lukim ol tok we inap helpim mi long stretim ol hevi bilong mi.”

Wanpela bubu meri husat i gat 60 krismas, em i kirap nogut olsem em inap kisim fri kopi bilong Baibel. Olsem na em i tok: “Yumi olgeta i mas stat long ritim gen bikos yumi olgeta i nidim ol tok bilong en!”