Samuwele Wo Sungula 17:1-58
17 Kutani Vafilista+ va hlengeleta masocha ya vona ma lunghekela nyimpi. Va hlengeletane eSokho,+ ku nga tiko ra Yuda, va dzima mixaxa exikarhi ka Sokho na Azeka,+ eEfesa-damima.+
2 Sawulo ni vavanuna va Israyele na vona va hlengeletana va dzima mixaxa eNkoveni wa Elaha,+ va hloma va lunghekela ku lwa ni Vafilista.
3 Vafilista a va ri ehenhla ka ntshava etlhelweni leri, kasi Vaisrayele a va ri ehenhla ka ntshava etlhelweni lerin’wana, va hambanisiwe hi nkova.
4 Kutani ku huma xihontlovila emixaxeni ya Vafilista; vito ra xona a ku ri Goliyadi,+ a a huma eGati+ naswona a a lehe kwalomu ka timitara tinharhu.*
5 A a ambale gondolo* ra koporo enhlokweni yakwe ni xiambalo xa nyimpi lexi a xi endliwe hi swinsimbana. Xiambalo lexi xa koporo+ a xi tika kwalomu ka 57 wa tikhilogiramu.*
6 A a bohelele swisirhelelo swa koporo emilengeni, a tlhome ni tlhari+ enhlaneni leri endliweke hi koporo.
7 Mbhinyi wa tlhari rakwe a wu lava ku ringana ni mhandzi ya muluki wa tinguvu,+ kasi nsimbhi ya tlhari rakwe a yi tika kwalomu ka nkombo wa tikhilogiramu;* emahlweni ka yena a ku ri ni socha leri a ri n’wi rhwalela xitlhangu.
8 Hiloko a fika a yima, a sungula ku huwelela masocha ya Vaisrayele+ a ku: “Hikwalaho ka yini mi hlomile mi lunghekele ku lwa? Xana a ndzi Mufilista naswona xana n’wina a mi malandza ya Sawulo? Tihlawuleleni wanuna, mi n’wi tshika a rhelela a ta eka mina.
9 Loko o swi kota ku lwa na mina a ndzi dlaya, hi ta va malandza ya n’wina. Kambe loko mina ndzo n’wi hlula ndzi n’wi dlaya, mi ta va malandza ya hina mi hi tirhela.”
10 Mufilista a ya emahlweni a ku: “Ndza ma tlhontlha masocha ya Vaisrayele+ namuntlha. Ndzi nyikeni wanuna, hi lwa!”
11 Loko Sawulo ni Vaisrayele hinkwavo va twa marito ya Mufilista yoloye, va sungula ku chuha ni ku chava swinene.
12 Davhida a a ri n’wana wa Muefurata+ wa le Betlehema+ wa Yuda, loyi a a vuriwa Yese,+ loyi a ri ni vana va majaha va nhungu+ naswona enkarhini wa Sawulo se a a dyuharile.
13 Majaha manharhu lamakulu ya Yese a ma fambe na Sawulo enyimpini.+ Mavito ya vana vakwe lavanharhu lava a va ye enyimpini a ku ri Eliyabu+ loyi a ri mativula, Abinadaba+ a a ri wa vumbirhi na Xamaha+ loyi a ri wa vunharhu.
14 Davhida a a ri lontsongo eka hinkwavo,+ lava vanharhu lavakulu va landzele Sawulo.
15 Davhida a a pfa a suka eka Sawulo a ya eBetlehema ku ya risa tinyimpfu+ ta tata wakwe.
16 Hi nkarhi wolowo Mufilista a a hamba a ta nimixo ni nimadyambu ku ringana masiku ya 40 a fika a tlhontlha Vaisrayele.
17 Hiloko Yese a byela Davhida n’wana wakwe a ku: “Ndzi kombela u teka efa* leyi ya mbhacha ni swinkwa leswi swa khume, kutani u hatlisa u swi yisela vamakwenu enxaxeni.
18 U tlhela u teka ni swiphemu leswi swa khume swa chizi* u swi yisa eka ndhuna leyi rhangelaka masocha ya 1 000. U fanele u kamba ni vamakwenu loko va ha pfukile u tlhela u vuya ni xikombiso xa leswaku va ha pfukile.”
19 A va ri na Sawulo ni vavanuna lavan’wana hinkwavo va Israyele eNkoveni wa Elaha,+ va lwa ni Vafilista.+
20 Hiloko Davhida a pfuka nimpundzu swinene a siya tinyimpfu ni murisi un’wana; a teka timbuva a famba hilaha Yese a n’wi leriseke hakona. Loko a fika laha masocha a ma dzime mixaxa kona, u kume ma ri karhi ma huma ma ya laha a ku ta lweriwa kona, ma ri karhi ma ba hungwe ra nyimpi.
21 Masocha ya Vaisrayele ni ya Vafilista ma hloma ma langutana.
22 Hi ku hatlisa Davhida a rhula ndzhwalo wa yena a wu siya ni muhlayisi wa mindzhwalo, a tsutsumela exivandleni xa nyimpi. Loko a fika, u sungule hi ku pfuxela vamakwavo.+
23 Loko a ha vulavula na vona, hiloko ku humelela xihontlovila lexi vuriwaka Goliyadi,+ Mufilista la humaka eGati. A huma eka ntlawa wa masocha ya Vafilista, a sungula ku vula marito lama fanaka ni yo sungula,+ kutani Davhida a n’wi twa.
24 Loko vavanuna hinkwavo va Israyele va n’wi vona, va n’wi baleka va chuhile.+
25 Vavanuna va Israyele a va ku: “Xana mi n’wi vonile wanuna loyi a taka? U tela ku ta tlhontlha Vaisrayele.+ Hosi yi ta n’wi nyika rifuwo ro tala wanuna loyi a nga ta n’wi dlaya, yi ta n’wi nyika n’wana wa yona wa nhwanyana+ naswona ndyangu wa ka vona a wu nge hakeli swibalo ni ku endla mitirho ya hosi eIsrayele.”
26 Davhida a sungula ku vutisa vavanuna lava a va yime ekusuhi na yena a ku: “Xana u ta endleriwa yini munhu loyi a nga ta dlaya Mufilista luya, a susa ndzhukano eIsrayele? Hikuva wo va mani Mufilista loyi, loyi a nga yimbangiki lerova a nga tlhontlha mavuthu ya Xikwembu lexi hanyaka?”+
27 Hiloko vanhu va n’wi byela nchumu lowu fanaka ni wo sungula, va ku: “U ta endleriwa sweswo munhu loyi a nga ta n’wi dlaya.”
28 Loko Eliyabu buti wa yena lonkulu+ a n’wi twa a ri karhi a vulavula ni vavanuna lava, a hlundzukela Davhida a ku: “U tele yini laha? Xana u ti siye na mani tinyimpfu letiya ti nga riki tingani emananga?+ Ndzi ku tiva kahle ku tikurisa ka wena ni swikongomelo swo biha swa mbilu ya wena; u tele ku ta vona nyimpi ntsena.”
29 Davhida a hlamula a ku: “Se ndzi dyohe yini? A ndzo lava ku tiva!”
30 Hiloko a suka eka yena a hundzulukela eka un’wana a vutisa xivutiso lexi fanaka,+ kutani vanhu va n’wi nyika nhlamulo leyi fanaka ni leyo sungula.+
31 Leswi vuriweke hi Davhida swi twiwe hi van’wana kutani va ya swi rungulela Sawulo. Hiloko Sawulo a n’wi vitana.
32 Davhida a byela Sawulo a ku: “Mi nga heli matimba hikwalaho ka yena. Nandza wa wena u ta ya a ya lwa ni Mufilista loyi.”+
33 Kambe Sawulo a ku eka Davhida: “A wu nge swi koti ku lwa ni Mufilista loyi, hikuva wena wa ha ri mufana+ kasi yena u ve socha* ku sukela evuntshweni bya yena.”
34 Davhida a hlamula Sawulo a ku: “Nandza wa wena a a risa tinyimpfu ta tata wakwe, hiloko ku ta nghala+ ni bere, ha xin’we xi fika xi teka nyimpfu entlhambini.
35 Hiloko ndzi yi hlongorisa ndzi yi ba yi wela ehansi, ndzi namurhuta nyimpfu leyi a yi ri enon’wini wa yona. Loko yi ndzi mpfhumpfhela, ndzi yi khome hi malepfu* ndzi yi ba ndzi yi dlaya.
36 Nandza wa wena u dlaye nghala ni bere, kutani Mufilista loyi la nga yimbangiki u ta fana ni xin’wana xa swona, hikuva u tlhontlhe mavuthu ya Xikwembu lexi hanyaka.”+
37 Davhida a engeta a ku: “Yehovha loyi a ndzi poniseke eka minwala ya nghala ni ya bere, hi yena la nga ta ndzi ponisa evokweni ra Mufilista loyi.”+ Hiloko Sawulo a byela Davhida a ku: “Famba, onge Yehovha a nga va na wena.”
38 Kutani Sawulo a ambexa Davhida swiambalo swakwe. A n’wi ambexa gondolo* ra koporo enhlokweni yakwe, a tlhela a n’wi ambexa ni xiambalo xa nyimpi lexi endliweke hi swinsimbana.
39 Davhida a khama banga rakwe ehenhla ka swiambalo swakwe, a ringeta ku famba kambe a tsandzeka, hikuva a a nga swi tolovelanga. Davhida a byela Sawulo a ku: “A ndzi swi koti ku famba ndzi ambale swilo leswi, hikuva a ndzi swi tolovelanga.” Hiloko Davhida a swi hluvula.
40 Kutani a teka nhonga yakwe a rholela maribye ya ntlhanu yo rhetela enkoveni, a ma hoxa exinkwamanini xakwe lexi a a famba na xona eku riseni naswona evokweni a a tamele xipelupelu xakwe.+ Kutani a tshinelela Mufilista.
41 Mufilista a ya a tshinelela Davhida naswona socha leri a ri n’wi rhwalela xitlhangu a ri ri emahlweni ka yena.
42 Loko Mufilista a languta a vona Davhida, a sungula ku n’wi nyefula* hikuva o va jaha ro xonga ntsena.+
43 Mufilista loyi a ku eka Davhida: “Xana ndzo va mbyana+ leswi u taka eka mina u khome tinhonga?” Hiloko Mufilista a sungula ku rhukana Davhida hi swikwembu swakwe.
44 Mufilista a ku eka Davhida: “Tana eka mina, ndzi ta nyiketa nyama ya wena eka swinyenyana swa matilo ni swiharhi swa nhova.”
45 Davhida a ku eka Mufilista: “U ta eka mina u khome banga ni xiqivi ni tlhari,+ kambe mina ndzi ta eka wena hi vito ra Yehovha wa mavuthu,+ Xikwembu xa mavuthu ya Vaisrayele lexi u xi tlhontlheke.+
46 Namuntlha Yehovha u ta ku nyiketa evokweni ra mina,+ ndzi ta ku dlaya ndzi ku tsema nhloko; naswona kona namuntlha mitsumbu ya nxaxa wa Vafilista ndzi ta yi nyika swinyenyana swa matilo ni swiharhi swa nhova; kutani vanhu emisaveni hinkwayo va ta swi tiva leswaku ku ni Xikwembu eIsrayele.+
47 Kutani hinkwavo lava nga kona laha, va ta swi tiva leswaku Yehovha a nga ponisi hi banga kumbe hi xiqivi,+ hikuva nyimpi i ya Yehovha,+ naswona u ta mi nyiketa hinkwenu evokweni ra hina.”+
48 Kutani Mufilista a tshinelela Davhida, a tshinela ekusuhi ku ta hlangana na Davhida, kambe Davhida a hatlisa a tsutsumela ekusuhi ni xivandla xa nyimpi leswaku a ta hlangana ni Mufilista.
49 Davhida a nghenisa voko exinkwamanini xakwe, a humesa ribye a ri hoxa hi xipelupelu. A ba Mufilista emombyeni, ribye ri nghena emombyeni wakwe kutani a wela ehansi hi mombo.+
50 Xisweswo Davhida a hlula Mufilista hi xipelupelu ni ribye; u be Mufilista a n’wi dlaya, hambileswi Davhida a a nga khomanga banga.+
51 Davhida a ya emahlweni a tsutsuma a fika a yima ehenhla ka yena. Kutani a khoma banga+ ra Mufilista, a ri hlomula enkotlotweni wa rona, a tiyisisa leswaku u file hi ku n’wi tsema nhloko ha rona. Loko Vafilista va vona leswaku nhenha ya vona yi file, va baleka.+
52 Loko va vona sweswo, vavanuna va Israyele ni va Yuda va suka va ri karhi va huwelela va hlongorisa Vafilista ku suka enkoveni+ ku ya fika etigedeni ta Ekroni,+ mitsumbu ya Vafilista a yi lo n’walala, ku suka eXarayimi+ ku ya fika eGati ni le Ekroni.
53 Loko Vaisrayele va vuya hi le ku hlongoriseni ka Vafilista, va phange leswi a swi ri emixaxeni ya vona.
54 Hiloko Davhida a teka nhloko ya Mufilista a ya na yona eYerusalema, kambe matlhari ya Mufilista a ma veka etendeni rakwe.+
55 Hi nkarhi lowu Sawulo a voneke Davhida a huma a ya hlangana ni Mufilista, a vutisa Abinere+ ndhuna ya vuthu a ku: “Abinere, mufana loyi i n’wana wa mani?”+ Hiloko Abinere a ku: “Ku vula ntiyiso wena hosi, a ndzi swi tivi!”
56 Hosi yi ku: “Lavisisa leswaku mufana loyi i n’wana wa mani.”
57 Hikwalaho, hi ku hatlisa loko Davhida a vuya eku dlayeni ka Mufilista, Abinere a n’wi teka a n’wi yisa eka Sawulo, a khome nhloko ya Mufilista.+
58 Hiloko Sawulo a ku eka yena: “U n’wana wa mani, he jaha?” Davhida a ku: “Ndzi n’wana wa nandza wa wena Yese+ lowa le Betlehema.”+
Tinhlamuselo ta le hansi
^ Hi Xiheveru, “swisungunu swa tsevu ni ku anama ka xandla.” Vona Xiengetelo B14.
^ Ku nga xigqoko xo sirhelela nhloko.
^ Hi Xiheveru, “5 000 wa tixikele.” Vona Xiengetelo B14.
^ Hi Xiheveru, “a ri tika 600 wa tixikele.” Vona Xiengetelo B14.
^ Efa a yi ringana ni kwalomu ka 22 wa tilitara. Vona Xiengetelo B14.
^ Hi Xiheveru, “ntswamba.”
^ Kumbe “wanuna wa nyimpi.”
^ Kumbe “rihlaya.”
^ Ku nga xigqoko xo sirhelela nhloko.
^ Kumbe “hlekula.”
