Ezekiyele 13:1-23
13 Yehovha a tlhela a vulavula na mina a ku:
2 “N’wana wa munhu, profeta mayelana ni vaprofeta va le Israyele,+ u byela lava tisungulelaka vuprofeta+ bya vona u ku, ‘Yingisani rito ra Yehovha.
3 Yehovha Hosi Leyi Tlakukeke u ri: “Khombo eka vaprofeta va swiphukuphuku, lava landzelaka mbilu ya vona hambiloko va nga vonanga nchumu!+
4 Wena Israyele, vaprofeta va wena va fana ni timhungubye leti tshamaka emarhumbini.
5 A mi nge yi etindhawini leti boxekeke emakhumbini lama akiweke hi maribye mi ya pfuxa makhumbi ya yindlu ya Israyele,+ leswaku Israyele a ta tshama a yimile enyimpini hi siku ra Yehovha.”+
6 “Va vone swivono swa mavunwa va tlhela va profeta mavunwa, vanhu lava nge, ‘Yehovha u ri,’ kasi Yehovha a nga va rhumanga naswona va rindzele leswaku leswi va swi vuleke swi endleka.+
7 Xana a mi vonanga xivono lexi nga mavunwa loko mi profeta mi ku, ‘Yehovha u ri,’ kasi mina a ndzi vulanga nchumu?”’
8 “‘Hikwalaho Yehovha Hosi Leyi Tlakukeke u ri: “‘Leswi mi vulavuleke mavunwa ni leswi swivono swa n’wina swi nga mavunwa, ndzi lwisana na n’wina,’ ku vula Yehovha Hosi Leyi Tlakukeke.”+
9 Voko ra mina ri lwa ni vaprofeta lava swivono swa vona swi nga mavunwa ni lava profetaka mavunwa.+ A va nge vi exikarhi ka vanhu lava ndzi tirhisanaka na vona; naswona a va nge tsariwi enxaxamelweni wa yindlu ya Israyele; a va nge tlheleli etikweni ra Israyele; kutani mi ta swi tiva leswaku hi mina Yehovha Hosi Leyi Tlakukeke.+
10 Sweswo swi ta endleka hikwalaho ka leswi va hambukiseke vanhu va mina va ku, “Ku ni ku rhula,” kasi a ku na ku rhula.+ Loko ku akiwa khumbi leri nga tiyangiki, va ri phama hi pende yo basa yo vevuka.’+
11 “Byela lava ri phamaka hi pende yo basa yo vevuka leswaku ri ta wa. Ku ta na mpfula ya matimba ni xihangu kutani swidzedze leswikulu swi ri wisa.+
12 Kutani loko khumbi ri wa va ta mi vutisa va ku, ‘Swi kwihi leswi a mi phame hi swona?’+
13 “Hikwalaho Yehovha Hosi Leyi Tlakukeke u ri: ‘Ndzi ta tisa swidzedze leswikulu ndzi nisa ni mpfula ya matimba hikwalaho ka ku hlundzuka ka mina. Ndzi ta nisa xihangu lexi nga ta wisa khumbi rero hikwalaho ka leswi ndzi hlundzukeke swinene.
14 Ndzi ta hirimuxa khumbi leri mi ri phameke hi pende yo basa yo vevuka, masungulo ya rona ma ta sala erivaleni. Loko muti wu lovisiwa na n’wina mi ta lovisiwa na wona; kutani mi ta swi tiva leswaku hi mina Yehovha.’
15 “‘Loko ndzi humesela vukarhi bya mina eka khumbi rero ni le ka lava ri phameke hi pende yo basa yo vevuka, ndzi ta mi byela ndzi ku: “Khumbi a ra ha ri kona, ni lava va ri phamaka a va ha ri kona.+
16 Vaprofeta va le Israyele a va ha ri kona, lava a va profeta hi Yerusalema ni lava a va vona swivono swakwe swa ku rhula, kasi a ku na ku rhula,”’+ ku vula Yehovha Hosi Leyi Tlakukeke.
17 “Wena n’wana wa munhu, profeta ku lwa ni vana va vanhwanyana va vanhu va wena lava tisungulelaka vuprofeta bya vona.
18 Va byele u ku, ‘Yehovha Hosi Leyi Tlakukeke u ri: “Khombo eka vavasati lava rhungaka mabandhi yo boha emavokweni* va tlhela va endla malapi yo vevuka yo funengeta tinhloko leswaku va rhiya vanhu! Xana mi rhiya vanhu va mina, mi ringeta ku ponisa vutomi bya n’wina?
19 Xana mi ta ndzi nyamisa exikarhi ka vanhu va mina leswaku mi kuma maxalana lama tataka swandla ni swiphemu swa xinkwa,+ mi dlaya vanhu lava nga fanelangiki va fa ni ku londzovota lava faneleke va fa, mi endla sweswo hi ku hembela vanhu va mina lava yingisaka mavunwa ya n’wina?”’+
20 “Hikwalaho Yehovha Hosi Leyi Tlakukeke u ri: ‘N’wina vavasati, ndza ma venga mabandhi lawa mi ma tirhisaka ku rhiya vanhu onge hiloko va ri swinyenyana, ndzi ta ma tsemelela emavokweni ya n’wina, ndzi tshunxa vanhu lava mi va rhiyaka ku fana ni swinyenyana.
21 Ndzi ta handzula malapi ya n’wina yo vevuka yo funengeta tinhloko ndzi tshunxa vanhu va mina evokweni ra n’wina, a mi nge he va rhiyi; kutani mi ta swi tiva leswaku hi mina Yehovha.+
22 Hambileswi a ndzi nga swi lavi leswaku lowo lulama a xaniseka kambe n’wina mi n’wi hete matimba hi mavunwa+ ya n’wina, mi tiyise mavoko ya lowo homboloka+ leswaku a nga tshiki ndlela yakwe yo homboloka leswaku a ta ya emahlweni a hanya.+
23 Hikwalaho n’wina vavasati a mi nge he voni swivono leswi nga mavunwa naswona a mi nge he hlahluvi;+ ndzi ta ponisa vanhu va mina eka n’wina, kutani mi ta swi tiva leswaku hi mina Yehovha.’”
Tinhlamuselo ta le hansi
^ Ku nga mabandhi ya masalamusi lawa a ma bohiwa eswikokolweni kumbe emahlakaleni ya mavoko.
