Ezekiyele 18:1-32
18 Yehovha a tlhela a vulavula na mina a ku:
2 “Xi vula yini xivuriso lexi, lexi mi xi tirhisaka etikweni ra Israyele lexi nge, ‘Vatatana va dye madiriva yo dzunga, kambe ku zazamela matino ya vana’?+
3 “‘Leswi ndzi hanyaka,’ ku vula Yehovha Hosi Leyi Tlakukeke, ‘a mi nge he yi emahlweni mi tirhisa xivuriso lexi eIsrayele.
4 Vonani! Vutomi bya vanhu hinkwavo i bya mina. Vutomi bya tatana ni bya n’wana i bya mina. Munhu loyi a dyohaka hi yena a nga ta fa.
5 “‘A hi nge munhu u lulamile, u endla leswinene a tlhela a tshembeka.
6 A nga dyi magandzelo lama endleriweke swikwembu etintshaveni;+ a nga gandzeli swifaniso leswi nyenyetsaka* swa Vaisrayele; a nga etleli ni nsati wa wanuna un’wana+ kumbe ni wansati loyi a nga le nkarhini;*+
7 a nga khomi munhu hi ndlela yo biha+ kambe u tlherisa leswi a nyikiweke swona hi mulombi tanihi xitiyisekiso;+ a nga tekeli munhu swilo swa yena+ kambe u nyika loyi a twaka ndlala swakudya+ naswona loyi a nga ambalangiki nchumu u n’wi funengeta hi nguvu;+
8 a nga lavi ntswalo eka lava a va lombaka,+ a nga endli swilo leswi nga lulamangiki;+ u avanyisa vanhu hi ndlela yo lulama;+
9 a ya emahlweni a yingisa milawu ya mina ni swiboho swa mina swa vuavanyisi leswaku a tshama a tshembekile. Munhu wo tano u lulamile naswona u ta ya emahlweni a hanya,’+ ku vula Yehovha Hosi Leyi Tlakukeke.
10 “‘Kambe a hi nge munhu loyi i tata wa n’wana wa jaha loyi a nga xigevenga+ kumbe mudlayi+ kumbe loyi a endlaka xin’wana xa swilo leswi landzelaka,
11 (hambileswi tatana loyi a nga swi endlangiki swilo leswi) n’wana loyi u dya magandzelo lama endleriweke swikwembu etintshaveni, u etlela ni nsati wa wanuna un’wana,
12 u xanisa lava pfumalaka ni swisiwana,+ u tekela vanhu swilo swa vona, a nga xi tlherisi xilo lexi a nyikiweke xona xi va xitiyisekiso, u gandzela swifaniso leswi nyenyetsaka,+ u endla swilo leswi nyangatsaka,+
13 u lombisa hi ntswalo,+ n’wana loyi a nge yi emahlweni a hanya. U ta dlayiwa hikwalaho ka swilo leswi hinkwaswo swo nyenyetsa leswi a swi endlaka. U ta va ni nandzu wa ngati yakwe.
14 “‘Kambe a hi nge tatana u ni n’wana wa jaha loyi a voneke swidyoho hinkwaswo leswi tata wakwe a swi endleke kambe a nga swi endli hambileswi a swi voneke.
15 A nga dyi magandzelo lama endleriweke swikwembu etintshaveni; a nga gandzeli swifaniso leswi nyenyetsaka swa Vaisrayele; a nga etleli ni nsati wa wanuna un’wana;
16 a nga khomi munhu hi ndlela yo biha; u tlherisa xilo lexi a nyikiweke xona xi va xitiyisekiso; a nga va tekeli vanhu swilo swa vona; u nyika loyi a twaka ndlala swakudya naswona loyi a nga ambalangiki nchumu u n’wi funengeta hi nguvu;
17 a nga swi tshikileli swisiwana; a nga lavi ntswalo; u hanya hi swiboho swa mina swa vuavanyisi a tlhela a yingisa milawu ya mina. Munhu yoloye a nge fi hikwalaho ka xidyoho xa tata wakwe. U ta ya emahlweni a hanya.
18 Kambe leswi tata wakwe a nga tshembekangiki, a tekeleke makwavo swilo swakwe nileswi a endleke swilo swo biha exikarhi ka vanhu va ka vona, u ta fa hikwalaho ka xihoxo xa yena.
19 “‘Kambe n’wina mi ta ku: “Hikwalaho ka yini n’wana a nga voniwi nandzu hikwalaho ka xihoxo xa tata wakwe?” Leswi n’wana loyi wa jaha a endleke leswo lulama ni leswinene, a yingiseke milawu ya mina hinkwayo, u ta ya emahlweni a hanya.+
20 Munhu loyi a dyohaka hi yena a nga ta fa.+ N’wana a nge voniwi nandzu hikwalaho ka xihoxo xa tata wakwe na tatana a nge voniwi nandzu hikwalaho ka xihoxo xa n’wana wakwe. Lowo lulama u ta avanyisiwa hi ku ya hi ku lulama ka yena ni lowo homboloka u ta avanyisiwa hi ku ya hi ku homboloka ka yena.+
21 “‘Loko munhu wo homboloka a hundzuka eswidyohweni swakwe hinkwaswo leswi a swi endleke, kutani a yingisa milawu ya mina hinkwayo a endla leswo lulama ni leswinene, u ta ya emahlweni a hanya. A nge fi.+
22 Swidyoho hinkwaswo leswi a swi endleke a swi nge tsundzukiwi.+ U ta ya emahlweni a hanya hikwalaho ka leswi a endleke leswo lulama.’+
23 “‘Xana ndza tsaka loko munhu wo homboloka a fa?’+ ku vula Yehovha Hosi Leyi Tlakukeke. ‘Xana a ndzi tsakeli leswaku a hundzuka etindleleni takwe kutani a ya emahlweni a hanya?’+
24 “‘Kambe loko lowo lulama a tshika ku endla leswi lulameke a endla swo biha, a endla swilo hinkwaswo swo nyenyetsa leswi endliwaka hi lavo homboloka, xana u ta hanya? Swilo hinkwaswo leswinene leswi a swi endleke a swi nge tsundzukiwi.+ U ta fa hikwalaho ka leswi a nga tshembekangiki ni hikwalaho ka xidyoho lexi a xi endleke.+
25 “‘Kambe n’wina mi ta ku: “Ndlela ya Yehovha a yi lulamanga.”+ Ndzi kombela mi yingisa, n’wina Vaisrayele. Xana i ndlela ya mina leyi nga lulamangiki?+ Xana a hi tindlela ta n’wina leti nga lulamangiki?+
26 “‘Loko lowo lulama a tshika ku endla leswi lulameke a endla swo biha kutani a fa hikwalaho ka swona, u ta fa hikwalaho ka xidyoho xakwe.
27 “‘Kutani loko munhu wo homboloka a tshika swilo swo biha leswi a nga swi endla, a sungula ku endla leswo lulama ni leswinene, u ta ponisa vutomi byakwe.+
28 Loko a swi xiya kutani a hundzuka eka swidyoho swakwe hinkwaswo leswi a swi endleke, u ta ya emahlweni a hanya. A nge fi.
29 “‘Kambe Vaisrayele va ta ku: “Ndlela ya Yehovha a yi lulamanga.” Xana n’wina Vaisrayele i tindlela ta mina leti nga lulamangiki?+ Xana a hi tindlela ta n’wina leti nga lulamangiki?’
30 “‘Hikwalaho, ndzi ta avanyisa un’wana ni un’wana wa n’wina, n’wina Vaisrayele hi ku ya hi tindlela takwe,’+ ku vula Yehovha Hosi Leyi Tlakukeke. ‘Hundzukani, hundzukani hi ku helela eswidyohweni swa n’wina hinkwaswo leswaku swi nga vi xikhunguvanyiso lexi mi vangelaka ku dyoha.
31 Tshikani swidyoho swa n’wina hinkwaswo leswi mi swi endleke,+ mi hundzula timbilu ta n’wina ni ndlela leyi mi anakanyaka ha yona,+ hikuva hikwalaho ka yini, n’wina Vaisrayele mi fanele mi fa?’+
32 “‘A ndzi tsaki loko munhu a fa,’+ ku vula Yehovha Hosi Leyi Tlakukeke. ‘Hikwalaho hundzukani leswaku mi hanya.’”+
Tinhlamuselo ta le hansi
^ Xiga xa Xiheveru lexi tirhisiweke laha xi nga ha fambisana ni rito leri vulaka “vulongo” naswona xi tirhisiwa ku kombisa leswaku nchumu wo karhi a wu xiximiwi.
^ Kumbe “loyi a nga emasikwini.”
