Ezekiyele 44:1-31
44 A ndzi vuyisa hi ndlela ya gede ya le handle ya ndhawu yo kwetsima leyi languteke evuxeni+ naswona a yi pfariwile.+
2 Yehovha a ku eka mina: “Gede leyi yi ta tshama yi pfariwile. A yi fanelanga yi pfuriwa naswona a ku na munhu loyi a nga ta nghena ha yona; hikuva Yehovha Xikwembu xa Israyele u nghene ha yona,+ hikwalaho yi fanele yi tshama yi pfariwile.
3 Hambiswiritano, ndhuna yi ta tshama eka yona leswaku yi dya xinkwa emahlweni ka Yehovha+ hikuva i ndhuna. Yi ta nghena hi rikupakupa* ra gede yi tlhela yi huma hi rona.”+
4 Hiloko a ndzi yisa emahlweni ka tempele hi gede ya le n’walungwini. Loko ndzi languta ndzi vona ku vangama ka Yehovha ku tate tempele ya Yehovha.+ Kutani ndzi wa hi xikandza.+
5 Yehovha a ku eka mina: “N’wana wa munhu, rhiya ndleve,* u languta naswona u yingiserisisa hinkwaswo leswi ndzi nga ta ku byela swona hi milawu ya tempele ya Yehovha. Xiyisisa ndhawu yo nghena ha yona etempeleni ni tindhawu hinkwato to huma ha tona endhawini yo kwetsima.+
6 U fanele u byela Vaisrayele lava xandzukeke u ku, ‘Yehovha Hosi Leyi Tlakukeke u ri: “A ndzi nge he swi tiyiseleli swiendlo swa n’wina leswi nyenyetsaka, n’wina Vaisrayele.
7 Loko mi tisa valuveri lava nga yimbangiki embilwini ni le nyameni, endhawini ya mina yo kwetsima, va thyakisa tempele ya mina. Mi ndzi endlela magandzelo hi xinkwa, mafurha ni ngati kambe mi ri karhi mi tlula ntwanano wa mina hi swiendlo swa n’wina hinkwaswo leswi nyenyetsaka.
8 A mi swi khathalelanga swilo swa mina swo kwetsima.+ Ku ri na sweswo, mi avela van’wana ku endla mitirho ya le ndhawini ya mina yo kwetsima.”’
9 “‘Yehovha Hosi Leyi Tlakukeke u ri: “A ku na muluveri loyi a tshamaka eIsrayele, loyi a nga yimbangiki embilwini ni le nyameni loyi a nga nghenaka endhawini ya mina yo kwetsima.”’
10 “‘Kambe Valevhi lava ndzi fularheleke+ loko Vaisrayele va ndzi fularhela va ya gandzela swikwembu swa vona leswi nyenyetsaka,* va ta langutana ni vuyelo bya xidyoho xa vona.
11 Va ta tirha endhawini ya mina yo kwetsima va langutela tigede ta tempele+ va tlhela va tirha etempeleni. Va ta tlhava swifuwo swa gandzelo ro hisiwa ni swa gandzelo ra vanhu naswona va ta yima emahlweni ka vanhu va va tirhela.
12 Hikwalaho ka leswi va va tirheleke emahlweni ka swikwembu swa vona leswi nyenyetsaka kutani va dyohisa Vaisrayele,+ hi yona mhaka leyi ndzi hlambanyeke hi ku tlakusa voko ra mina ndzi lwa na vona,’ ku vula Yehovha Hosi Leyi Tlakukeke, ‘kutani va ta langutana ni vuyelo bya xihoxo xa vona.
13 A va nge tshineli eka mina leswaku va tirha tanihi vaprista va mina kumbe va tshinelela swin’wana swa swilo swa mina swo kwetsima kumbe swo kwetsima ngopfu, naswona va ta khomiwa hi tingana hikwalaho ka swilo swo nyenyetsa leswi va swi endleke.
14 Kambe ndzi ta va endla va langutela mitirho leyi endliwaka etempeleni, va khathalela mitirho ya kona ni swilo hinkwaswo leswi faneleke swi endliwa eka yona.’+
15 “‘Vaprista va Valevhi, vana va Sadoki,+ lava a va endla mitirho ya le ndhawini ya mina yo kwetsima loko Vaisrayele va ndzi fularherile,+ va ta tshinela eka mina va ndzi tirhela naswona va ta yima emahlweni ka mina leswaku va nyikela mafurha+ ni ngati+ eka mina,’ ku vula Yehovha Hosi Leyi Tlakukeke.
16 ‘Hi vona lava nga ta nghena endhawini ya mina yo kwetsima, va ta tshinela etafuleni ra mina va ndzi tirhela+ naswona va ta endla mitirho leyi ndzi va nyikeke yona.+
17 “‘Loko va nghena etigedeni ta xivava* xa vaprista va fanele va ambala swiambalo leswi endliweke hi lapi ra ntsembyana.+ A va fanelanga va ambala voya loko va tirha etigedeni ta xivava xa vaprista kumbe endzeni ka xona.
18 Va fanele va boha maduku lama endliweke hi lapi va ambala ni swiburukwana leswi endliweke hi lapi.+ A va fanelanga va ambala swilo leswi nga ta va endla va dzuka nyuku.
19 Loko va nga si huma va ya exivaveni xa mani na mani, ku nga xivava lexi vanhu va nga eka xona, va fanele va hluvula swiambalo leswi a va tirha ha swona+ kutani va swi veka emakamareni yo dyela eka wona yo kwetsima.*+ Kutani va ta ambala swiambalo swin’wana leswaku va nga hundziseli ku kwetsima eka vanhu hi swiambalo swa vona.
20 A va fanelanga va byevula nhloko+ kumbe va tshika misisi ya nhloko ya vona yi leha. Va fanele va hunguta misisi ya tinhloko ta vona.
21 Vaprista a va fanelanga va nwa vhinyo loko va nghena exivaveni xa vaprista.+
22 A va fanelanga va teka noni kumbe wansati loyi a tshikiweke;+ kambe va nga teka nhwana loyi a nga Muisrayele kumbe wansati loyi a feriweke hi nuna loyi a a ri muprista.’+
23 “‘Va fanele va dyondzisa vanhu va mina hi ku hambana loku nga kona exikarhi ka swilo swo kwetsima ni swilo leswi nga kwetsimiki; naswona va ta va dyondzisa ku hambana loku nga kona exikarhi ka swilo leswi tengeke ni leswi nga tengangiki.+
24 Va fanele va va vaavanyisi loko ku tengiwa mhaka;+ va fanele va avanyisa hi ku pfumelelana ni swiboho swa mina swa vuavanyisi.+ Va fanele va yingisa milawu ya mina mayelana ni mikhuvo+ ya mina hinkwayo naswona va fanele va kwetsimisa tisavata ta mina.
25 A va fanelanga va tshinela ekusuhi ni ntsumbu wa munhu hikuva va ta va lava nga tengangiki. Kambe va nga tiendla lava nga tengangiki hi tata wa vona, manana, n’wana wa jaha, wa nhwanyana, makwavo wa xinuna kumbe wa xisati loyi a nga tekiwangiki.+
26 Endzhaku ka loko muprista a tengisiwile, va fanele va n’wi hlayela masiku ya nkombo.
27 Siku leri a nga ta nghena ha rona endhawini yo kwetsima, exivaveni xa vaprista leswaku a ta tirha endhawini yo kwetsima, u fanele a nyikela gandzelo rakwe ra xidyoho,’+ ku vula Yehovha Hosi Leyi Tlakukeke.
28 “‘Leyi yi ta va ndzhaka ya vona: Hi mina ndzhaka ya vona.+ A mi fanelanga mi va nyika rifuwo eIsrayele hikuva hi mina rifuwo ra vona.
29 Hi vona va nga ta dya gandzelo ra mavele,+ gandzelo ra xidyoho ni gandzelo ra nandzu+ naswona nchumu wun’wana ni wun’wana lowu nyikeriweke eka Xikwembu eIsrayele wu ta va wa vona.+
30 Mihandzu hinkwayo leyinene ngopfu leyi nga ta wupfa ku sungula ni munyikelo wun’wana ni wun’wana lowu mi nga ta wu nyikela swi ta va swa vaprista.+ Mi fanele mi nyika muprista+ mapa ya swilo leswi tshoveriweke ku sungula. Sweswo swi ta endla leswaku mindyangu ya n’wina yi katekisiwa.+
31 Vaprista a va fanelanga va dya xinyenyana kumbe xiharhi lexi kumiweke xi file kumbe lexi handzuleriweke.’+
Tinhlamuselo ta le hansi
^ Kumbe “vhurandi.”
^ Hi Xiheveru, “veka mbilu.”
^ Xiga xa Xiheveru lexi tirhisiweke laha xi nga ha fambisana ni rito leri vulaka “vulongo” naswona xi tirhisiwa ku kombisa leswaku nchumu wo karhi a wu xiximiwi.
^ Vona Tinhlamuselo.
^ Kumbe “makamara yo kwetsima.”
