Ezekiyele 5:1-17
5 “Wena n’wana wa munhu, teka banga u ri tirhisa ku fana ni xisingwana* xa munhu loyi a tsemetaka misisi. Byevula nhloko ni malepfu ya wena kutani u teka swikalo u kala misisi ya kona, u yi avanyisa yi va swiphemu swinharhu.
2 Xiphemu xin’we u ta xi hisa hi ndzilo endzeni ka muti loko masiku ya ku wu rhendzela ma herile.+ U ta teka xiphemu xin’wana u xi tsemelela hi banga emutini hinkwawo+ naswona xiphemu xo hetelela u ta xi tshika xi haha ni moya, kutani ndzi ta hlomula banga leswaku ndzi va hlongorisa.+
3 “U fanele u tlhela u teka misisi yitsongo u yi phutsela hi nguvu ya wena.
4 Teka yin’wana ya yona u yi hoxa endzilweni u yi hisa. Ndzilo lowu wu ta hisa yindlu hinkwayo ya Israyele.+
5 “Yehovha Hosi Leyi Tlakukeke u ri: ‘Loyi i Yerusalema. Ndzi n’wi veke exikarhi ka matiko lawa ma n’wi rhendzeleke.
6 Kambe u ale ku yingisa swiboho swa mina swa vuavanyisi ni milawu ya mina, u endle swilo swo biha ngopfu ku tlula ni matiko hinkwawo lawa a akelaneke na wona.+ U bakanye swiboho swa mina swa vuavanyisi naswona a nga yi yingisanga milawu ya mina.’
7 “Hikwalaho, Yehovha Hosi Leyi Tlakukeke u ri: ‘Leswi mi endleke swilo swo biha ku tlula matiko hinkwawo lawa mi akelaneke na wona naswona mi nga yingisangiki milawu ya mina kumbe swiboho swa mina swa vuavanyisi, kambe mi yingiseke swiboho swa vuavanyisi swa matiko hinkwawo lawa mi akelaneke na wona,+
8 Yehovha Hosi Leyi Tlakukeke u ri: “Wena muti+ wa Yerusalema ndzi nala wa wena. Ndzi ta ku avanyisa emahlweni ka matiko lawa u akelaneke na wona.+
9 Ndzi ta ku endla leswi ndzi nga si tshamaka ndzi swi endla naswona a ndzi nge he tlheli ndzi swi endla, hikwalaho ka swiendlo swa wena hinkwaswo leswi nyenyetsaka.+
10 “‘“Vatatana lava nga exikarhi ka n’wina va ta dya vana va vona+ ni vana va ta dya vatata wa vona, kutani ndzi ta mi avanyisa ndzi mi hangalasa etindhawini hinkwato.”’+
11 “‘Hikwalaho leswi ndzi hanyaka,’ ku vula Yehovha Hosi Leyi Tlakukeke, ‘leswi mi thyakiseke ndhawu ya mina yo kwetsima hi swifaniso swa n’wina hinkwaswo swo nyenyetsa leswi mi swi gandzelaka ni swiendlo swa n’wina hinkwaswo leswi nyenyetsaka,+ na mina ndzi ta mi tshika;* a ndzi nge mi tweli vusiwana naswona a ndzi nge mi tsetseleli.+
12 Ntlawa wun’wana wa vanhu emutini wu ta dlayiwa hi ntungu* kumbe wu fa hi ndlala. Ntlawa wun’wanyana wu ta dlayiwa hi banga.+ Lava saleke ndzi ta va hangalasa ematlhelweni hinkwawo naswona ndzi ta hlomula banga leswaku ndzi va hlongorisa.+
13 A ndzi nge he va hlundzukeli naswona a ndzi nge he va kariheli hikuva ndzi ta va ndzi enerisekile.+ Kutani loko ndzi tshike ku va karihela, va ta swi tiva leswaku mina Yehovha, ndzi vulavurile hikwalaho ka leswi ndzi lavaka leswaku ku gandzeriwa mina ntsena.+
14 “‘Ndzi ta ku endla u va ndhawu leyi onhakeke naswona matiko lawa u akelaneke na wona ni lava hundzaka hi ndlela va ta ku rhukana.+
15 U ta rhukaniwa ni ku hlekuriwa,+ u ta va xilemukiso naswona u ta chaviwa hi matiko lawa u akelaneke na wona loko ndzi ku avanyisa ndzi hlundzukile naswona ndzi karihile ndzi tlhela ndzi ku xupula hi ndlela yo vava. Mina Yehovha ndzi vurile.
16 “‘Ndzi ta mi vangela ndlala leyi nga ta mi dlaya ku fana ni miseve leyi dlayaka. Miseve leyi ndzi nga ta yi rhumela yi ta mi dlaya.+ Ndzi ta endla leswaku ndlala ya kona yi va yikulu hi ku endla leswaku mi nga kumi swakudya.+
17 Ndzi ta mi vangela ndlala ndzi mi rhumela ni swivandzana leswi nga ni khombo,+ swi ta mi dlayela vana. Ku ta va ni ntungu naswona ku ta halatiwa ngati yo tala, kutani ndzi ta mi hlasela hi banga.+ Mina Yehovha ndzi vurile.’”
