Tipisalema 109:1-31
Eka mufambisi. Pisalema ya Davhida. Miloti.
109 Xikwembu xanga lexi ndzi xi dzunisaka,+ u nga miyeli.
2 Hikuva milomo ya lavo homboloka ni ya lava kanganyisaka yi lwa na mina.
Va ndzi hembela;+
3 Va ndzi hehla hi marito ya rivengo,Naswona va ndzi hlasela ndzi nga va dyohelanga nchumu.+
4 Va lwa na mina hambileswi ndzi va rhandzaka;+Kambe ndzi ya emahlweni ndzi khongela.
5 Loko ndzi va endlela leswinene va ndzi tlherisela hi leswo biha+Loko ndzi va rhandza va ndzi tlherisela hi rivengo.+
6 A a avanyisiwe hi munhu wo homboloka;Loyi a n’wi hehlaka a a yime evokweni rakwe ra xinene.
7 A a voniwe nandzu loko a avanyisiwa;Ni xikhongelo xakwe a xi tekiwe xi ri xidyoho.+
8 Masiku yakwe a ma hunguteke;+Ntirho wakwe wo rhangela a wu tekiwe hi un’wana.+
9 Vana vakwe a va pfumale tatana,Nsati wakwe a a ve noni.
10 Vana vakwe a va yingayinge va hanya hi ku kombela,A va fambe va lava swakudya emarhumbini ya ka vona.
11 Lava a va kolotaka a va teke hinkwaswo leswi a nga na swona,Ni vaphangi a va n’wi tekele nhundzu yakwe.
12 Ku nga vi na loyi a n’wi kombaka musa,*Naswona ku nga vi na loyi a kombaka vana vakwe lava nga riki na tatana tintswalo.
13 Vatukulu vakwe a va dlayiwe;+Vito ra vona a ri suriwe erixakeni ra ka vona.
14 Yehovha a a tsundzuke nandzu wa vakokwa wakwe,+Xidyoho xa mana wakwe xi nga suriwi.
15 Yehovha a tshame a ri karhi a tsundzuka leswi va swi endleke;A a endle leswaku va nga ha tsundzukiwi emisaveni.+
16 Hikuva a a nga ri na musa,*+Kambe a a tshamela ku hlongorisa la tshikileriwaka,+ xisiwana ni la tshovekeke mbilu,Leswaku a n’wi dlaya.+
17 U rhukaniwile hi leswi a a rhandza ku rhukana van’wana;A a nga swi rhandzi ku katekisa van’wana, hikwalaho a nga yi kumanga mikateko.
18 U ambale ndzhukano ku fana ni xiambalo.
Wu chuluriwe emirini wakwe ku fana ni mati,Wu nghene emarhambyini yakwe ku fana ni mafurha.
19 Ndzhukano wakwe a wu fane ni nguvu leyi a titsondzelaka ha yona+Ni ku fana ni bandhi leri a tshamaka a ri bohile.
20 Leyi i hakelo leyi Yehovha a yi nyikaka lava lwaka na mina+Ni lava va vulavulaka swo biha hi mina.
21 Kambe, Yehovha Hosi Leyi Tlakukeke,Ndzi pfune hikwalaho ka vito ra wena.+
Ndzi kutsule, hikuva rirhandzu ra wena i rinene.+
22 Hikuva a ndzi na mupfuni naswona ndzi xisiwana,+Ndzi tlhaviwe mbilu.+
23 Ndza hela ku fana ni ndzhuti lowu nyamalalaka;Ndzi dzudziwe ku fana ni njiya.
24 Matsolo ya mina ma ngundlangundla hikwalaho ka ku titsona swakudya;Ndzi ondzile, ndza hela.
25 Va tshamela ku ndzi tlhontlha.+
Va hlakahla tinhloko loko va ndzi vona.+
26 Ndzi pfune Yehovha Xikwembu xanga;Ndzi ponise hi rirhandzu ra wena.
27 Onge va nga swi tiva leswaku leswi swi endliwe hi voko ra wena;Leswaku wena Yehovha u swi endlile.
28 Ndzi katekise loko va ndzi rhukana.
A va khomisiwe tingana loko va ndzi pfukela,Kambe nandza wa wena a a tsake.
29 Lava va lwaka na mina a va ambexiwe tingana;A va tsondzeriwe hi tingana ku fana niloko va ambale xiambalo.+
30 Nomu wa mina wu ta dzunisa Yehovha swinene;Ndzi ta n’wi dzunisa exikarhi ka vanhu vo tala.+
31 Hikuva u ta yima evokweni ra xinene ra xisiwana,Leswaku a xi ponisa eka lava va xi gwevaka.
