Tipisalema 147:1-20
147 Dzunisani Yehovha!*
I swinene ku yimbelela hi dzunisa Xikwembu xa hina;Swa tsakisa naswona swi fanerile ku va hi xi dzunisa!+
2 Yehovha u aka muti wa Yerusalema;+U hlengeleta Vaisrayele lava hangalakeke.+
3 U horisa lava tshovekeke timbilu;U bandicha timbanga ta vona.
4 U hlayela tinyeleti;U ti tiva hi mavito hinkwato ka tona.+
5 Hosi ya hina i yikulu naswona yi ni matimba lamakulu;+Ku twisisa ka yona a ku hlamuseleki.+
6 Yehovha u pfuxa lavo rhula,+Kambe lavo homboloka u va lahlela ehansi.
7 Yimbelelelani Yehovha mi n’wi khensa;Yimbelelani mi dzunisa Xikwembu xa hina mi ri karhi mi chaya haripa,
8 Loyi a funengetaka matilo hi mapapa,Loyi a endlaka leswaku mpfula yi na emisaveni,+Loyi a endlaka leswaku byanyi byi hluka+ etintshaveni.
9 U nyika swiharhi swakudya,+Ni mavondlo ya mawukuwuku* lama swi rilelaka.+
10 A nga tsakisiwi hi matimba ya hanci;+Naswona a nga hlamarisiwi hi rivilo ra munhu.+
11 Yehovha u tsakisiwa hi lava va n’wi chavaka,+Lava rindzeleke rirhandzu rakwe.+
12 Vangamisa Yehovha, wena Yerusalema.
Dzunisa Xikwembu xa wena, wena Siyoni.
13 U tiyisa swo goga tigede ta wena;U katekisa vana va wena.
14 U tisa ku rhula etikweni ra wena;+U ku nyika koroni leyinene.+
15 U rhumela rito rakwe emisaveni;Rito rakwe ri tsutsuma hi rivilo.
16 U funengeta misava hi gamboko ku fana ni voya byo basa;+U hangalasa gwitsi ku fana ni nkuma.+
17 U wisa xihangu* xakwe ku fana ni mahlanhla ya xinkwa.+
I mani la nga tiyiselaka xirhami xakwe?+
18 U rhumela rito rakwe kutani swi n’oka.
U hungisa moya wakwe+ kutani mati ma khuluka.
19 U tivise Yakobo rito rakwe,Milawu yakwe ni swiboho swakwe u swi byele Israyele.+
20 A nga swi endlanga sweswo eka matiko man’wana;+A ma tivi nchumu hi milawu yakwe.
Dzunisani Yehovha!*+
Tinhlamuselo ta le hansi
^ Kumbe “Haleluya,” leswi vulaka “Dzunisani Yah.” Yah i nkomiso wa vito leri nge Yehovha.
^ Ku nga muxaka wo karhi wa swinyenyana.
^ Kumbe “ayisi.”
^ Kumbe “Haleluya,” leswi vulaka “Dzunisani Yah.” Yah i nkomiso wa vito leri nge Yehovha.
