Xikwembu xi vulavula na hina hinkwerhu hi ku tirhisa Bibele yo Kwetsima. Hi fanele hi yi dyondza leswaku hi ta tiva Mutsari wa yona. (Yohane 17:3; 2 Timotiya 3:16) EBibeleni Yehovha Xikwembu u hlamusela xikongomelo xakwe hi vanhu ni hi kaya ra vona ku nga misava.—Genesa 3:15; Nhlavutelo 21:3, 4.

A ku na buku yin’wana leyi khumbeke vutomi bya vanhu ku fana na yona. Bibele yi hi pfuna ku kombisa timfanelo ta Yehovha ku nga rirhandzu, tintswalo ni ntwelavusiwana. Yi nyika vanhu ntshembo, yi va pfuna ku tiyisela hambiloko va xaniseka swinene. Naswona yi ya emahlweni yi paluxa swilo swa misava leyi leswi nga fambisaniki ni ku rhandza ka Xikwembu loku hetisekeke.—Pisalema 119:105; Vaheveru 4:12; 1 Yohane 2:15-17.

Bibele eku sunguleni a yi tsariwe hi Xiheveru, Xiaramu ni Xigriki naswona yi hundzuluxeriwe yi helerile kumbe yi nga helelanga hi tindzimi to tlula 3 000. Hi yona ntsena buku leyi hundzuluxeriweke ngopfu yi tlhela yi hangalasiwa ematin’wini. Hi fanele hi tiyimisela ku kuma swo tala eka yona. Vuprofeta bya Bibele byi ri: “Mahungu lawa lamanene ya Mfumo [rungula ra nkoka leri kumekaka eBibeleni] ma ta chumayeriwa emisaveni hinkwayo leswaku byi va vumbhoni ematikweni hinkwawo, kutani hi kona makumu ma nga ta fika.”—Matewu 24:14.

Hi ku xiya nkoka wa rungula leri nga eBibeleni, xikongomelo xa hina a ku ri ku humesa vuhundzuluxeri lebyi vulaka leswi matsalwa yo sungula ma vulaka swona byi tlhela byi twisiseka naswona swi olova ku byi hlaya. Swihloko leswi vulavulaka hi Xiengetelo leswi nge “Milawu Ya Ku Hundzuluxela Bibele,” “Leswi Nga Eka Bibele Leyi” ni lexi nge “Ndlela Leyi Hi Kumeke Bibele Ha Yona” swi hlamusela misinya yin’wana ya milawu leyi landzeriweke swin’we ni tinhlamuselo tin’wana ta swiyenge swa Bibele leyi.

Lava rhandzaka Yehovha Xikwembu va tlhela va n’wi gandzela va navela ku va ni vuhundzuluxeri bya Rito ra Xikwembu lebyi nga ntiyiso ni lebyi twisisekaka. (1 Timotiya 2:4) Hikwalaho, hi hundzuluxele nkandziyiso lowu hi Xitsonga hi ku pfumelelana ni xikongomelo xa hina xo hundzuluxela Bibele ya Vuhundzuluxeri Bya Misava Leyintshwa hi tindzimi to tala swinene. Ha tshemba hi tlhela hi khongelela leswaku wena muhlayi loyi a rhandzekaka u ta vuyeriwa eka nkandziyiso lowu wa Matsalwa yo Kwetsima, loko u ri karhi u tikarhatela ku ‘lava Xikwembu kutani u xi kuma.’—Mitirho 17:27.