EKU heleni ka va-1930, ku sunguriwe ntlawa wa vukhongeri lebyintshwa lebyi vitaniwaka Bibelkring (ku nga vito ra Xidachi leri vulaka “ntlawa wa swichudeni swa Bibele”) ekusuhi na Tiva ra Toba, eNorth Sumatra. Ntlawa lowu wu sungule endzhaku ka loko vadyondzisi va xikolo va amukele minkandziyiso leyi humaka eka phayona leri a ri endzele ndhawu yoleyo, leri swi nga ha endlekaka ku ri Eric Ewins, loyi a chumayeleke eTiveni ra Toba hi 1936. Leswi vadyondzisi va swi hlayeke swi va susumetele ku suka eKerekeni ya Batak, leyi a yi ri ya Maprotestente kutani va simeka mintlawa yo dyondza Bibele emakaya ya vona. Mintlawa yoleyo yi andze kukondza swirho swa yona swi va madzana. *

Loko swi ri karhi swi hlaya minkandziyiso leyi siyiweke hi phayona, swirho swo sungula swa Bibelkring swi xiye ntiyiso wa le Bibeleni. Dame Simbolon, loyi na yena a a ri xirho xa kona naswona a amukeleke ntiyiso hi 1972, u te: “A swi pfumelanga ku losa mujeko naswona swi papalate ku tlangela Khisimusi swin’we ni masiku ya ku velekiwa. Swin’wana swi chumayele hi yindlu ni yindlu.” Kambe, leswi a swi nga wu kumi nseketelo lowu humaka eka nhlengeletano ya Xikwembu, swi sungule ku kanganyisiwa hi mavonelo ya vanhu. Limeria Nadap-Dap, loyi a a ri xirho xa ntlawa wolowo kambe sweswi a nga Mbhoni u ri: “Vavasati a va nga pfumeleriwi ku tisasekisa, ku ambala swin’wetsin’wetsi, ku ambala hi ndlela ya manguva lawa hambi ku ri ku ambala tintangu. Nakambe swirho swa kona a swi yirisiwe ku teka mapasi, ku nga xiboho lexi nga endla leswaku swi lwisana ni nawu wa mfumo.”

Swirho swa Bibelkring swi sungule ku avana kutani swi hunguteka hakatsongotsongo. Loko maphayona ma tlhelela eTiveni ra Toba, khale ka swirho swo tala swa Bibelkring se a swi amukele ntiyiso.